កាលពីថ្ងៃអង្គារ (ទី២៤ ខែកុម្ភៈ ឆ្នាំ២០២៦) ប្រធានាធិបតីម៉ិកស៊ិក លោកស្រី Claudia Sheinbaum បាននិយាយថា មាន «ការធានាគ្រប់យ៉ាង» សម្រាប់ព្រឹត្តិការណ៍បាល់ទាត់ពិភពលោកឆ្នាំ២០២៦ (2026 FIFA World Cup) ដែលត្រូវរៀបចំនៅក្នុងប្រទេសរបស់លោកស្រី ដោយការអះអាងនេះកើតឡើងបន្ទាប់ពីការចាប់ខ្លួន និងការស្លាប់មេខ្លោងជួញដូរគ្រឿងញៀនដែលម៉ិកស៊ិកចង់បានខ្លួនបំផុត បានបង្កឲ្យមានការបិទផ្លូវ ការដុតបំផ្លាញ និងការប៉ះទង្គិចគ្នាខាងសន្តិសុខ ជាពិសេសនៅក្នុងរដ្ឋ Jalisco។

នៅពេលត្រូវបានសួរថា តើការប្រកួតបាល់ទាត់អន្តរជាតិដ៏ធំបំផុតនេះ ដែលត្រូវបានគេរំពឹងថា នឹងទាក់ទាញអ្នកគាំទ្រមកពីជុំវិញពិភពលោកឲ្យទៅទស្សនាការប្រកួតនៅទីក្រុង Mexico ទីក្រុង Monterrey និងរដ្ឋធានី Guadalajara របស់រដ្ឋ Jalisco នឹងបង្កជាហានិភ័យដល់អ្នកទស្សនាដែរ ឬទេ លោកស្រី Sheinbaum បានឆ្លើយថា «មិនមានហានិភ័យអ្វីឡើយ»។

លោកស្រី Sheinbaum បានបញ្ជាក់ថា ស្ថានភាពកំពុងមានភាពប្រក្រតីឡើងវិញ បន្ទាប់ពីសមាជិកក្រុមជួញដូរគ្រឿងញៀន បានធ្វើការវាយប្រហារដោយហិង្សាជាបន្តបន្ទាប់ កាលពីថ្ងៃអាទិត្យចុងសប្ដាហ៍កន្លងមក បន្ទាប់ពីមានប្រតិបត្តិការចាប់ខ្លួនមេជួញដូរគ្រឿងញៀន លោក Nemesio Oseguera ដែលត្រូវបានគេស្គាល់ថា «El Mencho» ដែលបន្ទាប់មកបានស្លាប់។ លោកស្រី Sheinbaum បានប្រាប់សន្និសីទសារព័ត៌មាននាពេលព្រឹកថា មានការរំខានថ្មីៗជាច្រើន បានកើតឡើងពេញមួយយប់ ប៉ុន្តែបានប្រាប់ថា កងកម្លាំងសន្តិសុខកំពុងធ្វើការ ដើម្បីស្តារសន្តិសុខឡើងវិញ។

សូមបញ្ជាក់ថា ប្រទេសម៉ិកស៊ិកនឹងធ្វើជាម្ចាស់ផ្ទះរៀបចំការប្រកួតចំនួន ១៣ប្រកួត ក្នុងចំណោម ១០៤ប្រកួតនៃព្រឹត្តិការណ៍បាល់ទាត់ពិភពលោក។ ក្នុងចំណោមការប្រកួតទាំងនេះមាន ៤ប្រកួត ត្រូវបានកំណត់ឲ្យធ្វើនៅទីក្រុង Guadalajara។ ទីក្រុងនេះក៏នឹងធ្វើជាម្ចាស់ផ្ទះការប្រកួតកម្តៅសាច់ដុំមួយចំនួនមុនពេលការប្រកួតបើកដំណើរការផ្លូវការនៅថ្ងៃទី១១ ខែមិថុនា៕