រដ្ឋាភិបាលគុយបា បាននិយាយថា កងកម្លាំងរបស់ខ្លួន បានសម្លាប់មនុស្ស ៤នាក់ និងបណ្ដាលឱ្យមនុស្ស ៦នាក់ ផ្សេងទៀតរងរបួស លើទូកល្បឿនលឿនមួយគ្រឿងចុះបញ្ជីនៅរដ្ឋ Florida ដែលបានចូលដែនទឹកគុយបា កាលពីថ្ងៃពុធ (២៥ កុម្ភៈ) ហើយដោយសារ ទូកនោះបើកការបាញ់ប្រហារលើក្រុមល្បាតគុយបា ក្នុងឧប្បត្តិហេតុដ៏គ្រោះថ្នាក់មួយស្របពេលភាពតានតឹងខ្លាំងជាមួយសហរដ្ឋអាមេរិក។

ក្រសួងមហាផ្ទៃគុយបា និយាយថា ក្រុមមនុស្សលើទូកនោះ រួមមានជនជាតិគុយបាដែលប្រឆាំងរដ្ឋាភិបាល ដោយអ្នកខ្លះក៏ធ្លាប់ត្រូវនគរបាលគុយបាតាមចាប់ខ្លួនផងដែរ។ សេចក្តីថ្លែងការណ៍និយាយថា ក្រុមនេះបានមកពីអាមេរិក ប្រដាប់ដោយកាំភ្លើងវែងវាយប្រហារ កាំភ្លើងខ្លី គ្រឿងផ្ទុះផលិតដោយខ្លួនឯង អាវក្រោះបាលីស្ទិក និងកែវយឹត។ សេចក្តីថ្លែងការណ៍បន្តថា ជនសង្ស័យជនជាតិគុយបាម្នាក់ទៀតត្រូវបានឃុំខ្លួនក្នុងទឹកដីគុយបា ទាក់ទងនឹងគម្រោងនេះ។

ក្រោយហេតុការណ៍នេះ លោករដ្ឋមន្ត្រីការបរទេសអាមេរិក Marco Rubio និយាយថា នោះមិនមែនជាប្រតិបត្តិការរបស់អាមេរិកទេ ហើយពុំមានបុគ្គលិករដ្ឋាភិបាលអាមេរិកណាម្នាក់ ជាប់ពាក់ព័ន្ធឡើយ។ លោក Rubio បន្តថា អាជ្ញាធរគុយបាបានជូនដំណឹងដល់អាមេរិកអំពីឧប្បត្តិហេតុនេះ ប៉ុន្តែស្ថានទូតអាមេរិកនៅទីក្រុងឡាហាវ៉ាន នឹងព្យាយាមផ្ទៀងផ្ទាត់ដោយឯករាជ្យនូវអ្វីដែលបានកើតឡើង។

គុយបា និយាយថា ទូកល្បឿនលឿននេះ បានចូលមកក្នុងចម្ងាយ ១ម៉ាយល៍ណត់ប៉ុណ្ណោះ ពីច្រកសមុទ្រមួយលើកោះ Falcones Cay និងចូលទៅជិតសមាជិក ៥នាក់ នៃអង្គភាពល្បាតព្រំដែនសមុទ្រគុយបា រួចក៏បើកការបាញ់ប្រហារ បណ្តាលឱ្យមន្រ្តីគុយបារងរបួស។ គុយបាអះអាងថា ដោយប្រឈមនឹងហេតុការណ៍នេះ ក្រុមមន្រ្តីក៏ចាត់វិធានការការពារខ្លួន និងការពារអធិបតេយ្យភាពដែនទឹករបស់គុយបា។

អ្នកនយោបាយរដ្ឋ Florida របស់អាមេរិក បានអំពាវនាវឱ្យមានការស៊ើបអង្កេតដាច់ដោយឡែក ដោយនិយាយថា ពួកគេមិនទុកចិត្តលើរបាយការណ៍គុយបាទេ។ ហេតុការណ៍នេះបានកើតឡើង ខណៈដែលអាមេរិក បានរារាំងការដឹកជញ្ជូនប្រេងស្ទើរតែទាំងអស់ទៅកាន់កោះនេះ ដើម្បីបង្កើនសម្ពាធលើរដ្ឋាភិបាលដែលដឹកនាំតាមបែបកុម្មុយនិស្តរបស់ខ្លួន៕