អ្នកស្រុកបាននិយាយថា អ្នកតាំងលំនៅអ៊ីស្រាអែល បានដុតបំផ្លាញរថយន្តជាច្រើនគ្រឿង និងតង់ នៅក្នុងភូមិ Susiya កាលពីយប់ថ្ងៃអង្គារ ដែលជាឧប្បត្តិហេតុចុងក្រោយបំផុតនៃអំពើហិង្សារបស់អ្នកតាំងលំនៅឋាបប្រឆាំងនឹងជនជាតិប៉ាឡេស្ទីន នៅក្នុងតំបន់វេសបែងដែលគ្រប់គ្រងដោយអ៊ីស្រាអែល។

វីដេអូដែលបានផ្ទៀងផ្ទាត់ដោយសារព័ត៌មានរ៉យទ័រ បានបង្ហាញក្រុមបុរសពាក់ម៉ាស់មួយក្រុម ដែលអ្នកស្រុកនិយាយថា ជាអ្នកតាំងលំនៅអ៊ីស្រាអែល បានចូលទៅជិតភូមិក្បែរទីក្រុង Hebron ហើយក្រោយមកបានដុតរថយន្ត និងទ្រព្យសម្បត្តិរបស់ប្រជាជនប៉ាឡេស្ទីន។

អ្នកស្រី Halima Abu Eid ដែលជាអ្នកភូមិ Susiya ម្នាក់ បានប្រាប់សារព័ត៌មានរ៉យទ័រ កាលពីថ្ងៃពុធថា    ៖«ពួកគេវាយប្រហារយើងស្ទើរតែរាល់ថ្ងៃ ម្តងហើយម្តងទៀត ពីព្រោះយើងរស់នៅជិតផ្លូវធំ ហើយពួកគេបានដុតបំផ្លាញគ្រប់ទីកន្លែងកាលពីយប់ថ្ងៃអង្គារ»។

យោធាអ៊ីស្រាអែលបាននិយាយថា ពួកគេបានបញ្ជូនទាហានទៅដោះស្រាយរបាយការណ៍អំពី «ការដុតបំផ្លាញទ្រព្យសម្បត្តិរបស់ប៉ាឡេស្ទីនដោយចេតនា» ហើយបានបើកការស៊ើបអង្កេតលើហេតុការណ៍នេះ។ អំពើហិង្សាដែលបង្កឡើងដោយអ្នកតាំងលំនៅអ៊ីស្រាអែលប្រឆាំងនឹងប្រជាជនប៉ាឡេស្ទីន នៅតំបន់វេសបែង បានកើនឡើងយ៉ាងខ្លាំង ចាប់តាំងពីការចាប់ផ្តើមនៃសង្គ្រាមនៅតំបន់ហ្កាហ្សា ក្នុងខែតុលា ឆ្នាំ ២០២៣ ដោយមានប្រជាជនប៉ាឡេស្ទីនជាង ៨០០នាក់ ត្រូវបានផ្លាស់ទីលំនៅ ដោយសារតែការវាយប្រហាររបស់អ្នកតាំងលំនៅ ក្នុងឆ្នាំ ២០២៦។ នេះបើយោងតាមទិន្នន័យរបស់អង្គការសហប្រជាជាតិ៕