អធិការបតីអាល្លឺម៉ង់ លោក Friedrich Merz បាននិយាយថា លោកបានស្នើសុំឲ្យថ្នាក់ដឹកនាំចិនប្រើប្រាស់ឥទ្ធិពលរបស់ខ្លួន ដើម្បីជួយនាំជម្លោះនៅអ៊ុយក្រែនឲ្យឈានដល់ការបញ្ចប់បានយ៉ាងឆាប់រហ័ស។

លោក Merz បានកត់សម្គាល់ថា៖«ប្រទេសចិនបានក្លាយជាមហាអំណាចមួយ»។ លោកបានប្រាប់អ្នកសារព័ត៌មានក្នុងអំឡុងពេលទស្សនកិច្ចរបស់លោកទៅកាន់ទីក្រុងប៉េកាំងថា៖«សំឡេងរបស់ប្រទេសចិន ត្រូវបានឮទូទាំងពិភពលោក។ ការសម្រេចចិត្តរបស់ខ្លួន ពិតជាមានទម្ងន់គួរឲ្យកត់សម្គាល់។ ប៉ុន្តែរឿងនេះ ក៏តម្រូវឲ្យមានការទទួលខុសត្រូវផងដែរ»។ លោកបានបញ្ជាក់ថា លោកបានជំរុញឲ្យភាគីចិនប្រើប្រាស់ឥទ្ធិពលរបស់ខ្លួន ដើម្បីជួយសម្រួលដល់ការបញ្ចប់ជម្លោះនៅអ៊ុយក្រែន។

លោកអធិការបតីអាល្លឺម៉ង់ បានសង្កត់ធ្ងន់ថា៖«ទីក្រុងប៉េកាំងអាចបញ្ចេញឥទ្ធិពលក្នុងការសម្របសម្រួល នេះ។ យើងក៏ដឹងដែរថា សញ្ញាពីប្រទេសចិន ត្រូវបានយកចិត្តទុកដាក់យ៉ាងខ្លាំងនៅទីក្រុងមូស្គូ។ គោលការណ៍នេះ អនុវត្តទាំងទ្រឹស្តី និងសកម្មភាពជាក់ស្តែង»។

ក្នុងពេលជាមួយគ្នានេះ លោក Merz បានស្វាគមន៍ការប្តេជ្ញាចិត្តរបស់ប្រទេសចិនចំពោះសន្តិភាព នៅក្នុងតំបន់។ លោកអធិការបតីអាល្លឺម៉ង់ បានសន្និដ្ឋានថា៖«ខ្ញុំសង្ឃឹមថា ផ្អែកលើមូលដ្ឋាននេះ យើងនឹងអាចបន្តសហការ។ យើងប្តេជ្ញាចិត្តចំពោះកិច្ចសហប្រតិបត្តិការនេះ នៅក្នុងកិច្ចខិតខំប្រឹងប្រែងការទូតរបស់យើង ដើម្បីសម្រេចបាននូវសន្តិភាព»។

នាពេលនេះ លោក Merz កំពុងស្ថិតនៅក្នុងប្រទេសចិន ក្នុងដំណើរទស្សនកិច្ចផ្លូវការ។

លោកបាន ជួបពិភាក្សាជាមួយនាយករដ្ឋមន្ត្រីចិន លោក Li Qiang និងជាមួយប្រធានាធិបតីចិន លោក ស៊ី ជីងពីង (Xi Jinping)។ លោកអធិការបតីអាល្លឺម៉ង់ ត្រូវបានអមដំណើរដោយតំណាងថ្នាក់ដឹកនាំនៃក្រុមហ៊ុនឈានមុខគេរបស់អាល្លឺម៉ង់ប្រហែល ៣០ នៅក្នុងដំណើរទស្សនកិច្ចនេះ។ ប្រទេសអាល្លឺម៉ង់ និងចិន បានចុះហត្ថលេខាលើកិច្ចព្រមព្រៀងអន្តររដ្ឋាភិបាលចំនួន ៥ ក្នុងនោះមានវិស័យសេដ្ឋកិច្ចផងដែរ៕