ប្រភពឧស្សាហកម្មបានប្រាប់សារព័ត៌មានរ៉យទ័រថា អ្នកផ្គត់ផ្គង់ដល់បណ្ដាក្រុមហ៊ុនផលិតយន្តហោះ និងក្រុមហ៊ុនអេឡិចត្រូនិករបស់អាមេរិក កំពុងប្រឈមកង្វះខាតរ៉ែកម្រយ៉ាងខ្លាំង។ កង្វះខាតដ៏អាក្រក់នេះកាន់តែធ្ងន់ធ្ងរឡើងៗ ត្រឹមតែប៉ុន្មានសប្តាហ៍ប៉ុណ្ណោះមុនពេលលោកប្រធានាធិបតី Donald Trump ត្រូវបានរំពឹងថា នឹងជួបសមភាគីចិន លោក Xi Jinping សម្រាប់កិច្ចប្រជុំកំពូលនៅទីក្រុងប៉េកាំង។

ប្រភពនិយាយថា កង្វះខាតនេះផ្តោតលើធាតុរ៉ែកម្រដូចជា អ៊ីទ្រីញ៉ូម (Yttrium) និងស្កង់ដ្យូម (Scandium) ដែលជាធាតុពិសេសនៃក្រុមរ៉ែកម្រចំនួន ១៧មុខ ដែលដើរតួនាទីមិនអាចខ្វះបាន ក្នុងបច្ចេកវិទ្យាការពារជាតិ អាកាសចរណ៍ និងឧបករណ៍អេឡិចត្រូនិក ហើយរ៉ែកម្រស្ទើរតែទាំង ១៧មុខនោះ ត្រូវបានផលិតនៅប្រទេសចិន។

បញ្ហាចម្បងគឺសារធាតុ អ៊ីទ្រីយ៉ូម ដែលត្រូវបានប្រើប្រាស់សម្រាប់ស្រោបការពារម៉ាស៊ីនអវកាស និងទួរប៊ីន កុំឱ្យរលាយក្នុងសីតុណ្ហភាពខ្ពស់។ បើគ្មានការស្រោបសារធាតុនេះជាប្រចាំទេ ម៉ាស៊ីនអវកាសទាំងនោះមិនអាចដំណើរការបានឡើយ។ ទន្ទឹមនឹងនេះ ក្រុមហ៊ុនផលិតបន្ទះឈីប កំពុងខ្វះខាតសារធាតុ ស្កង់ដ្យូម ដែលធ្វើឱ្យការផលិតបន្ទះឈីប 5G ប្រឈមនឹងហានិភ័យ។

ទិន្នន័យគយចិនបង្ហាញថា ខណៈដែលទីក្រុងប៉េកាំង បានអនុញ្ញាតឱ្យការនាំចេញរ៉ែកម្រជាច្រើនបន្តឡើងវិញ ការដឹកជញ្ជូនវត្ថុធាតុដើមទាំងនេះកម្រនឹងទៅដល់អាមេរិកណាស់ ទោះបីទំនាក់ទំនងពាណិជ្ជកម្មធូរស្រាលខ្លាំងនៅខែតុលាឆ្នាំមុន ក្រោមកិច្ចព្រមព្រៀងពាណិជ្ជកម្មបណ្ដោះអាសន្នមួយក៏ដោយ។ ការបន្ធូរបន្ថយភាពតានតឹងថែមទៀត ជាពិសេសបញ្ហារ៉ែសំខាន់ៗនេះ នឹងត្រូវយកមកពិភាក្សានៅពេលលោក Trump និងលោក Xi ជួបគ្នានៅទីក្រុងប៉េកាំង នាចុងខែមីនាខាងមុខនេះ៕