ប្រព័ន្ធសុខាភិបាលរបស់ប្រទេសស៊ូដង់ បានរងការដួលរលំដែលមិនធ្លាប់មានពីមុនមក ចាប់តាំងពីសង្គ្រាមផ្ទុះឡើង នៅពាក់កណ្តាលខែមេសា ឆ្នាំ ២០២៣ ដោយមន្ទីរពេទ្យភាគច្រើននៅក្នុងរដ្ឋធានីខាទុំ និងទីក្រុងដទៃទៀត នៅទូទាំងរដ្ឋជាច្រើន ត្រូវបានប្រែក្លាយទៅជាបន្ទាយយោធា។

កង្វះខាតសេវាវេជ្ជសាស្រ្តយ៉ាងធ្ងន់ធ្ងរ បានជំរុញឲ្យមានជំងឺរាតត្បាតរីករាលដាល ការផ្ទុះឡើងនៃជំងឺ និងកង្វះអាហារូបត្ថម្ភកាន់តែអាក្រក់ឡើងៗ។

រដ្ឋមន្ត្រីក្រសួងសុខាភិបាល Haitham Mohamed Ibrahim បានប្រាប់សារព័ត៌មាន Asharq Al-Awsat ថា ការខាតបង់ចំពោះវិស័យនេះ គឺ «ពិតជាមានទំហំធំណាស់»។

លោកបាននិយាយថា៖«ការបំផ្លិចបំផ្លាញនេះ បានប៉ះពាល់ដល់រដ្ឋស៊ូដង់ទាំងអស់» ដោយលើកឡើងពីការធ្វើឲ្យខូចខាតមន្ទីរពេទ្យ និងស្ថាប័នសុខាភិបាល ការលួចយកថ្នាំពេទ្យ យានយន្ត និងឧបករណ៍ និងការកំណត់គោលដៅដោយផ្ទាល់ទៅលើបុគ្គលិកសុខាភិបាល។

លោកបាននិយាយថា អារ៉ាប៊ីសាអ៊ូឌីត គឺជាអ្នកគាំទ្រដ៏សំខាន់មួយរបស់ប្រទេសស៊ូដង់ ជាពិសេសតាម   រយៈមជ្ឈមណ្ឌលជំនួយ និងសង្គ្រោះមនុស្សធម៌ King Salman ដែលភាគច្រើនផ្តល់សម្ភារៈវេជ្ជសាស្ត្រ ឧបករណ៍ និងថ្នាំពេទ្យ។

លោក Ibrahim បានបញ្ជាក់ថា ការប៉ាន់ស្មានបឋម បានបង្ហាញថា ការខាតបង់ក្នុងវិស័យសុខាភិបាលមានប្រមាណ ១១ ពាន់លានដុល្លារ ដោយកត់សម្គាល់ថា តួលេខចុងក្រោយ នឹងត្រូវបានកំណត់តែបន្ទាប់ពីសង្គ្រាមបញ្ចប់ប៉ុណ្ណោះ ដោយសារតំបន់ធំៗ នៅតែស្ថិតនៅក្រោមការគ្រប់គ្រងរបស់កងកម្លាំងគាំទ្ររហ័ស(RSF)៕