ប្រធានាធិបតីបារាំង លោក Emmanuel Macron នឹងធ្វើបច្ចុប្បន្នភាពគោលនយោបាយនុយក្លេអ៊ែររបស់បារាំង នៅថ្ងៃចន្ទសប្ដាហ៍ក្រោយនេះ ដោយបដិសេធការគ្រប់គ្រងរួមគ្នាជាមួយអឺរ៉ុប ប៉ុន្តែក៏នឹងបង្ហាញពីអ្វីដែលទីក្រុងប៉ារីសអាចផ្តល់ជូនដល់បណ្តាសម្ព័ន្ធមិត្ត ដែលកំពុងបារម្ភពីភាពជឿជាក់នៃ «ឆ័ត្រនុយក្លេអ៊ែរ» របស់អាមេរិក ក្រោមការដឹកនាំរបស់លោកប្រធានាធិបតី Donald Trump។

ថ្វីដ្បិតតែបារាំង និងអង់គ្លេស សុទ្ធតែជាមហាអំណាចនុយក្លេអ៊ែរ ប៉ុន្តែប្រទេសអឺរ៉ុបភាគច្រើននៅតែពឹងផ្អែកជាចម្បងលើអាមេរិក ដើម្បីរារាំងសត្រូវណាមួយ ដែលនេះគឺជាសសរស្តម្ភសន្តិសុខឆ្លងមហាសមុទ្រអាត្លង់ទិក មានអាយុកាលរាប់ទសវត្សរ៍មកហើយ។ ប៉ុន្តែ ការផ្សះផ្សារបស់លោក Trump ជាមួយរុស្ស៊ីលើសង្គ្រាមអ៊ុយក្រែន និងជំហររឹងត្អឹងរបស់លោកចំពោះសម្ព័ន្ធមិត្តប្រពៃណី រួមទាំងការគំរាមកំហែងដណ្តើមយកកោះហ្គ្រីនលែន (Greenland) ទឹកដីស្វយ័តរបស់ដាណឺម៉ាក ដែលជាសមាជិកណាតូផងនោះ បានធ្វើឱ្យរដ្ឋាភិបាលអឺរ៉ុបមានការរង្គោះរង្គើ។

កាលពីដើមខែនេះ អធិការបតីអាល្លឺម៉ង់ បាននិយាយថា ទីក្រុងប៊ែរឡាំង បានបើកកិច្ចពិភាក្សាជាមួយបារាំង អំពីលទ្ធភាពបង្កើតកម្លាំងរារាំងនុយក្លេអ៊ែរអឺរ៉ុប ដែលលោក Macron ធ្លាប់បានលើកឡើងថា គួរតែជា «វិធីសាស្ត្ររួមបញ្ចូលគ្នាទាំងស្រុងនៃវិស័យការពារជាតិ និងសន្តិសុខ»។

បារាំងចំណាយប្រហែល ៥,៦ ពាន់លានអឺរ៉ូ (៦,០៤ ពាន់លានដុល្លារអាមេរិក) ក្នុងមួយឆ្នាំ ដើម្បីថែទាំឃ្លាំងអាវុធរបស់ខ្លួនចំនួន ២៩០ ប្រភេទ ទាំងអាវុធបាញ់ចេញពីនាវាមុជទឹក និងអាវុធបាញ់ចេញពីអាកាស ដែលជាឃ្លាំងអាវុធធំជាងគេទី៤ របស់ពិភពលោក។ យោងតាមការប៉ាន់ស្មានរបស់អ្នកជំនាញបានឱ្យដឹងថា ដើម្បីជាផ្នែកមួយនៃការទប់ស្កាត់នុយក្លេអ៊ែររបស់ណាតូ អាមេរិកមានគ្រាប់បែកនុយក្លេអ៊ែរសរុបប្រហែល ១០០គ្រាប់ ទុកនៅបែលហ្ស៊ិក អាល្លឺម៉ង់ អ៊ីតាលី ហូឡង់ និងទួរគី៕