នាយករដ្ឋមន្ត្រីឥណ្ឌា លោក Narendra Modi បានការពារសង្គ្រាមដ៏បំផ្លិចបំផ្លាញរបស់អ៊ីស្រាអែល នៅតំបន់ហ្កាហ្សា ដោយនិយាយថា ខ្លួនគាំទ្រប្រទេសនេះ «ដោយមានការជឿជាក់យ៉ាងពេញទំហឹង» ទោះបីជាមានការចោទប្រកាន់ពីបទប្រល័យពូជសាសន៍ប្រឆាំងនឹងប្រជាជនប៉ាឡេស្ទីនក៏ដោយ។

លោក Modi បានថ្លែងសុន្ទរកថាទៅកាន់សភា Knesset របស់អ៊ីស្រាអែល កាលពីថ្ងៃពុធ (ទី២៥ ខែកុម្ភៈ ឆ្នាំ២០២៦) ដែលជាថ្ងៃដំបូងនៃដំណើរទស្សនកិច្ចរយៈពេល ២ថ្ងៃរបស់លោក ហើយបានទទួលការអបអរសាទរយ៉ាងកក់ក្តៅ ខណៈដែលលោកបានសង្កត់ធ្ងន់លើការគាំទ្រដ៏យូរអង្វែងរបស់ឥណ្ឌា ចំពោះអ៊ីស្រាអែល។ នេះជាលើកដំបូងដែលមេដឹកនាំឥណ្ឌា បានថ្លែងទៅកាន់សភា Knesset។

លោក Modi បានថ្លែងថា «ប្រទេសឥណ្ឌាឈរជាមួយអ៊ីស្រាអែលយ៉ាងរឹងមាំ ដោយមានការជឿជាក់យ៉ាងពេញទំហឹង ទាំងនៅពេលនេះ និងអនាគត» ដោយថ្កោលទោសការវាយប្រហារកាលពីថ្ងៃទី៧ ខែតុលា ឆ្នាំ២០២៣ ដោយក្រុមសកម្មប្រយុទ្ធដឹកនាំដោយក្រុមហាម៉ាសថា ជា «ទង្វើព្រៃផ្សៃ» ដោយបន្ថែមថា «គ្មានហេតុផលណាមួយអាចរាប់ជាភាពត្រឹមត្រូវនោះឡើយ ក្នុងការសម្លាប់ជនស៊ីវិល»។

មេដឹកនាំឥណ្ឌាត្រូវបានស្វាគមន៍ដោយនាយករដ្ឋមន្ត្រីអ៊ីស្រាអែល លោក Benjamin Netanyahu នៅអាកាសយានដ្ឋាន Ben Gurion ជាកន្លែងដែលពិធីស្វាគមន៍មួយត្រូវបានធ្វើឡើង។

ជាមួយគ្នានេះ លោក Modi បានលើកឡើងទៀតថា ទីក្រុងញូវដេលី បានសម្តែង «ការគាំទ្រយ៉ាងខ្លាំង» ចំពោះគំនិតផ្តួចផ្តើមសន្តិភាពហ្កាហ្សា ដែលត្រូវបានអនុម័តដោយក្រុមប្រឹក្សាសន្តិសុខអង្គការសហប្រជាជាតិ កាលពីខែវិច្ឆិកាឆ្នាំមុន។ លោកបានសង្កត់ធ្ងន់ថា វា «ផ្តល់នូវផ្លូវមួយ» ដោយបន្ថែមថា ប្រទេសឥណ្ឌា ជឿជាក់ថា «វាបង្កើតឲ្យមានការសន្យា ដែលនាំមកនូវសន្តិភាពប្រកបដោយយុត្តិធម៌ និងយូរអង្វែង សម្រាប់ប្រជាជនទាំងអស់នៅក្នុងតំបន់នេះ»៕