លោក ខេស៊ី បាណេត (Casey Barnett) ប្រធានសភាពាណិជ្ជកម្មអាមេរិកប្រចាំនៅកម្ពុជា(AmCham) បានលើកឡើងថា វិនិយោគិនអាមេរិកដែលមានមូលដ្ឋាននៅប្រទេសកម្ពុជាគឺមិនរងផលប៉ះពាល់ពីសកម្មភាពឆបោកតាមប្រព័ន្ធបច្ចេកវិទ្យា (Online Scam) នោះទេ។ ទោះបីយ៉ាងណា លោកថា ពលរដ្ឋអាមេរិកកាំងជាច្រើនបានក្លាយជាជនរងគ្រោះដោយសារអំពើឆបោកតាមអនឡាញនៅជុំវិញពិភពលោក។

ក្នុងកិច្ចសម្ភាសន៍ផ្តាច់មុខជាមួយ BTV នៅថ្ងៃទី ២៦ កុម្ភៈនេះ លោក ខេស៊ី បាណេត បានបញ្ជាក់ថា សម្រាប់ការឆបោកតាមអនឡាញ វាមិនសូវមានផលប៉ះពាល់ដល់វិនិយោគិនមកពីអាមេរិនោះទេ ប៉ុន្តែប្រជាពលរដ្ឋអាមេរិកកាំងជាច្រើនបានក្លាយជាជនរងគ្រោះពីសកម្មភាពឆបោកតាមអនឡាញនៅជុំវិញពិភពលោក។ 

លោកកត់សម្គាល់ថា ការបង្រ្កាបអំពើឆបោកតាមអនឡាញនៅកម្ពុជានាពេលនេះគឺជាជោគជ័យមួយសម្រាប់រដ្ឋាភិបាល ដោយ លោកសង្ឃឹមថា រដ្ឋាភិបាលកម្ពុជានឹងខិតខំបន្ថែមទៀតក្នុងការបោសសម្អាតអំពើឆបោកតាមអនឡាញឱ្យអស់ ១០០% បើមិនដូច្នេះទេ ប្រទេសកម្ពុជានៅតែប្រឈមនឹងការតម្លើងពន្ធបដិការរបស់អាមេរិកនាពេលអនាគត។

ក្នុងកិច្ចសម្ភាសន៍ជាមួយទីភ្នាក់ងារសារព័ត៌មានបារាំង AFP នៅថ្ងៃទី២៥ ខែកុម្ភៈ ឆ្នាំ២០២៦ សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានបញ្ជាក់ជាថ្មីថា «រាជរដ្ឋាភិបាលកម្ពុជា ប្តេជ្ញាចិត្តយ៉ាងមុតមាំក្នុងការប្រយុទ្ធប្រឆាំងជាមួយការឆបោកតាមប្រព័ន្ធបច្ចេកវិទ្យា ឬ Online Scam ដោយចាត់បណ្តាញឆបោកនេះជា «សេដ្ឋកិច្ចខ្មៅ» កំពុងបំផ្លាញសេដ្ឋកិច្ចដ៏ស្មោះត្រង់របស់កម្ពុជា»។

សូមបញ្ជាក់ថា ចាប់តាំងពីខែមិថុនា ឆ្នាំ២០២៥ រហូតដល់ ដើមឆ្នាំ២០២៦នេះ សមត្ថកិច្ចចម្រុះបានបង្ក្រាបការឆបោកអនឡាញចំនួន ២០០ករណី ដែលរកឃើញទីតាំងពាក់ព័ន្ធសរុប ២.៥០០ កន្លែង។ នេះបើតាមរបាយការណ៍ពីលេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.)។ អត្ថបទ៖ ធូ វិរៈ