អាជ្ញាធរកុងហ្គោ និងក្រុមសង្គមស៊ីវិលមួយ បាននិយាយកាលពីថ្ងៃព្រហស្បតិ៍ថា ផ្នូរដ៏ធំត្រូវបានរកឃើញនៅក្នុងផ្នែកមួយនៃភាគខាងកើតប្រទេសកុងហ្គោ ដែលក្រុមឧទ្ទាម M23 បានដកចេញនាពេលថ្មីៗនេះ     ខណៈដែលការប្រយុទ្ធគ្នានៅក្នុងតំបន់នេះ កាន់តែខ្លាំងឡើង ទោះបីជាមានកិច្ចព្រមព្រៀងសន្តិភាពដែលសម្របសម្រួលដោយសហរដ្ឋអាមេរិកក៏ដោយ។

អភិបាលខេត្ត Kivu ខាងត្បូង លោក Jacques Purusi បាននិយាយថា អាជ្ញាធរបានរកឃើញផ្នូរធំៗចំនួនពីរ ដែលមានសាកសពយ៉ាងហោចណាស់ ១៧១ នាក់ នៅក្នុងស្រុក Kiromoni និង Kavimvira នៅជាយក្រុង Uvira ភាគខាងកើត។

លោក Purusi បានប្រាប់សារព័ត៌មាន APតាមទូរស័ព្ទថា៖«នៅដំណាក់កាលនេះ យើងបានកំណត់អត្តសញ្ញាណទីតាំងពីរ៖ ផ្នូរដ៏ធំមួយដែលមានសាកសពប្រហែល ៣០នាក់ នៅសង្កាត់ Kiromoni មិនឆ្ងាយពីព្រំដែនប៊ូរុនឌីនៅខាងកុងហ្គោ និងមួយទៀតនៅក្នុងស្រុក Kavimvira ជាកន្លែងដែលសាកសពចំនួន ១៤១ នាក់ ត្រូវបានរកឃើញ»។

កាសែត AP មិនអាចផ្ទៀងផ្ទាត់ការអះអាងដោយឯករាជ្យបានទេ។ អ្នកនាំពាក្យរបស់ក្រុមឧទ្ទាម M23 មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។

លេខាធិការដ្ឋានប្រតិបត្តិនៃបណ្តាញមូលដ្ឋានសម្រាប់ការការពារជនស៊ីវិល ដែលជាក្រុមសង្គមស៊ីវិលនៅក្នុងតំបន់ បាននិយាយកាលពីថ្ងៃព្រហស្បតិ៍ថា ខ្លួនចង់ទៅពិនិត្យមើលផ្នូរសពធំៗ ប៉ុន្តែត្រូវបានយោធាកុងហ្គោរារាំងមិនឲ្យធ្វើដូច្នេះទេ៕