ភ្នំពេញ៖ ក្រុមសភាជាតិកម្ពុជានៃអ្នកនយោបាយសភាស្ត្រីនារសៀលថ្ងៃទី២៧ ខែកុម្ភៈ ឆ្នាំ២០២៦នេះបានបន្តកិច្ចប្រជុំពិភាក្សាយ៉ាងស៊ីជម្រៅលើខ្លឹមសារឯកសារ ដើម្បីត្រៀមរៀបចំកម្មវិធី “សភាត្រាប់” ក្នុងគោលដៅបណ្តុះបណ្តាល និងជំរុញយុវតីកម្ពុជាឱ្យឈានជើងចូលក្នុងវិស័យនយោបាយ និងភាពជាអ្នកដឹកនាំ។ 

កិច្ចប្រជុំនេះបានប្រព្រឹត្តទៅ ក្រោមការដឹកនាំរបស់ លោកជំទាវ គ្រួច សំអាន អនុប្រធានគណៈកម្មការ ទី៦ និង លោកជំទាវ សាន្ត អារុណ សមាជិកគណៈកម្មការទី៨ នៃរដ្ឋសភា ដោយមានការចូលរួមពីតំណាងអង្គការ UN Women និង UNFPA ប្រចាំកម្ពុជា។

កម្មវិធី “សភាត្រាប់” ដែលគ្រោងនឹងអនុវត្តនាពេលខាងមុខនេះ គឺជាកម្មវិធីសាកល្បងលើកទី១ ដែលនឹងផ្តល់ឱកាសឱ្យស្ត្រីវ័យក្មេងមកពីសាកលវិទ្យាល័យនានា បានមកកាន់វិមានរដ្ឋសភា ដើម្បីសិក្សាពីបទពិសោធន៍ជាក់ស្តែង។ យុវតីដែលចូលរួមនឹងមានឱកាសសិក្សាផ្ទាល់ពីតួនាទីរបស់សមាជិកសភាស្ត្រី និងសមាជិកសភាវ័យក្មេងក្នុងការបំពេញភារកិច្ចស្នូលសំខាន់ៗមួយចំនួនរួមមាន៖ ការធ្វើច្បាប់ ការធ្វើជាតំណាងឱ្យពលរដ្ឋ និងការតាមដានការអនុវត្តច្បាប់ ក៍ដូចជាមុខងារការទូតសភាជាដើម។

គួររំលឹកផងដែរថា ចាប់ពីឆ្នាំ២០១៩ ដល់ឆ្នាំ២០២២ ក្រុមអ្នកនយោបាយសភាស្ត្រីកម្ពុជា បានសម្រេចជោគជ័យគួរអោយកត់សំគាល់ក្នុងយុទ្ធនាការ girl2leader នៅទូទាំងប្រទេស ដើម្បីលើកទឹកចិត្តឱ្យក្មេងស្រីហ៊ានសុបិន្តក្លាយជាអ្នកដឹកនាំ។ ដោយឡែក កម្មវិធី “សភាត្រាប់” គឺជាការវិវត្តទៅមុខមួយកម្រិតទៀតដែលប្តូរពីការចែករំលែកបទពិសោធន៍មកជាការផ្តល់បទពិសោធន៍ជាក់ស្តែងក្នុងបរិយាកាសសភាពិតៗ។

កម្មវិធី “សភាត្រាប់” គឺជាគំនិតផ្តួចផ្តើមដ៏មានសារៈសំខាន់ ទទួលបានការគាំទ្រផ្នែកថវិកា និងបច្ចេកទេសពីអង្គការ UN Women និងមូលនិធិសហប្រជាជាតិសម្រាប់ប្រជាជន (UNFPA)។ 

លោកស្រី Sandra Bernklau តំណាងអង្គការដៃគូ បានចូលរួមផ្តល់យោបល់យ៉ាងសកម្ម ដើម្បីធានាថាឯកសារត្រៀមរៀបចំកម្មវិធីនេះ មានភាពគ្រប់ជ្រុងជ្រោយ និងឆ្លើយតបទៅនឹងតម្រូវការជាក់ស្តែងរបស់យុវជន។

ក្រុមសភាជាតិកម្ពុជានៃអ្នកនយោបាយសភាស្ត្រី រំពឹងយ៉ាងមុតមាំថា កម្មវិធី “សភាត្រាប់” នឹងក្លាយជាវេទិកាគន្លឹះក្នុងការកសាងយុវជនជំនាន់ក្រោយ ជាពិសេសស្ត្រីវ័យក្មេង ឱ្យកាន់តែមានទំនុកចិត្ត និងមានចំណេះដឹងទូលំទូលាយ ក្នុងវិស័យនយោបាយ និងការអភិវឌ្ឍជាតិប្រកបដោយចីរភាព៕