ក្រុមមន្រ្តីនិយាយថា ជនភៀសខ្លួនប៊ូរុនដី ៤.២០០នាក់ ដែលបានរស់នៅក្នុងជំរំនៅប្រទេសជិតខាងតង់ហ្សានី បានវិលត្រឡប់មកផ្ទះពួកគេវិញកាលពីថ្ងៃព្រហស្បតិ៍ ក្នុងរលកថ្មីនៃការធ្វើមាតុភូមិនិវត្តន៍ដោយស្ម័គ្រចិត្តរៀបចំឡើងដោយទីភ្នាក់ងារជនភៀសខ្លួនអង្គការសហប្រជាជាតិ(UNHCR) ។

អ្នកវិលត្រឡប់មកវិញ ដែលបានរស់នៅក្នុងប្រទេសតង់ហ្សានីអស់រយៈពេលជាច្រើនឆ្នាំ ក្រោយរត់ភៀសខ្លួនចេញពីភាពរំជើបរំជួល និងការលំបាកសេដ្ឋកិច្ចនោះ បានធ្វើដំណើរត្រឡប់មកវិញ ក្រោមកម្មវិធី រៀបចំឡើង ដើម្បីធានាថា ពួកគេអាចធ្វើការសម្រេចចិត្តដោយត្រឹមត្រូវចំពោះការធ្វើមាតុភូមិនិវត្តន៍ និងទទួលបានការគាំទ្រពេញមួយការធ្វើដំណើររបស់ពួកគេ ។

ពេលមកដល់ប្រទេសប៊ូរុនដី អ្នកវិលត្រឡប់មកវិញទាំងនេះ ត្រូវបានទទួលស្វាគមន៍ដោយមន្រ្តីទីភ្នាក់ងារ UNHCR ក្រុមអាជ្ញាធររដ្ឋាភិបាល និងអង្គការដៃគូ ដែលបានចុះបញ្ជីពួកគេ និងផ្តល់អាហារក្តៅដល់ពួកគេ ទឹកផឹក ជម្រកបណ្តោះអាសន្ន ការពិនិត្យសុខភាព និងការគំាទ្រផ្នែកជំងឺផ្លូវចិត្ត ។

អ្នកស្រី Dindurugo Sibane ពេលបង្ហាញភាពសប្បាយរីករាយរបស់គាត់ចំពោះការជួបជុំគ្នាវិញជាមួយគ្រួសាររបស់គាត់ និយាយថា គាត់សប្បាយចិត្តកាលដែលគាត់អាចវិលត្រឡប់មកកាន់ប្រទេសកំណើតរបស់ខ្លួនវិញ ។ 

អ្នកស្រីបន្តថា នៅទីនេះ គាត់មានឪពុករបស់គាត់ ម្តាយរបស់គាត់ បងប្អូនបង្កើតរបស់គាត់ គឺគ្រួសារធំរបស់គាត់នៅទីនេះ ប៉ុន្តែកន្លែងដែលគាត់បានទៅ គឺគាត់នៅតែជាមួយកូនៗរបស់គាត់ប៉ុណ្ណោះ ដូច្នេះហើយ គាត់ពិតជារំភើបចិត្តខ្លាំងណាស់ ពេលបានវិលត្រឡប់មកផ្ទះវិញបែបនេះ ។

គ្រួសារនិមួយៗទទួលបានកញ្ចប់ជំនួយ ដែលរួមទាំងការផ្តល់ប្រាក់ និងជំនួយស្បៀងអាហាររយៈពេល ៣ខែ ពីកម្មវិធីស្បៀងអាហារពិភពលោក ជាមួយនឹងការគាំទ្រការធ្វើដំណើរ ដើម្បីជួយឲ្យពួកគេទៅដល់ខេត្តកំណើតរបស់ពួកគេ ។

យោងតាមការអះអាងរបស់មន្រ្តីទំនាក់ទំនងទីភ្នាក់ងារ UNHCR លោក Bernard Ntwari បានឲ្យដឹងថា ការគាំទ្រច្រើននៅត្រូវការទៀត ដើម្បីធ្វើមាតុភូមិនិវត្តន៍ជនភៀសខ្លួនទាំងនេះ ៕