នាយករដ្ឋមន្ត្រីឥណ្ឌា លោក ណារិនដ្រា ម៉ូឌី ( Narendra Modi) បាននិយាយនៅថ្ងៃចន្ទនេះថា លោកបាននិយាយជាមួយសមភាគីអ៊ីស្រាអែលរបស់លោក និងបានជំរុញឲ្យបញ្ចប់ជម្លោះនេះ «ឲ្យបានឆាប់» បន្ទាប់ពីការវាយប្រហារលើអ៊ីរ៉ង់។

លោក ម៉ូឌី ដែលបានជួបជាមួយលោក បេនចាមីន ណេតាន់យ៉ាហ៊ូ (Benjamin Netanyahu) នៅទីក្រុងហ្ស៊េរុយសាឡឹមកាលពីថ្ងៃព្រហស្បតិ៍ បានសរសេរនៅលើប្រព័ន្ធផ្សព្វផ្សាយសង្គម X បន្ទាប់ពីការសន្ទនាតាមទូរស័ព្ទថា «ឥណ្ឌាបញ្ជាក់ជាថ្មីអំពីតម្រូវការសម្រាប់ការបញ្ឈប់អរិភាពឲ្យបានឆាប់តាមដែលអាចធ្វើទៅបាន»។

លោក ម៉ូឌី «បានបង្ហាញការព្រួយបារម្ភរបស់ឥណ្ឌាចំពោះការវិវត្តថ្មីៗ និងបានសង្កត់ធ្ងន់លើសុវត្ថិភាពរបស់ជនស៊ីវិលជាអាទិភាព»។

លោក ម៉ូឌី ក៏បាននិយាយជាមួយប្រធានាធិបតីអេមីរ៉ាតអារ៉ាប់រួម លោក Mohamed bin Zayed Al Nahyan បន្ទាប់ពីយុទ្ធនាការសងសឹករបស់អ៊ីរ៉ង់ នៅឈូងសមុទ្រនេះ។

លោក ម៉ូឌី បាននិយាយនៅលើប្រព័ន្ធផ្សព្វផ្សាយសង្គម X ថា៖«ឥណ្ឌាឈរក្នុងសាមគ្គីភាពជាមួយអេមី     រ៉ាតអារ៉ាប់រួម ក្នុងគ្រាលំបាកទាំងនេះ»។

«យើងគាំទ្រការបន្ធូរបន្ថយភាពតានតឹង សន្តិភាព សន្តិសុខ និងស្ថិរភាពក្នុងតំបន់»៕