រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា ការបោះឆ្នោតជ្រើសរើសមេដឹកនាំកំពូលថ្មីរបស់ប្រទេសនេះ អាចនឹងធ្វើឡើង ក្នុងរយៈពេលពីរបីថ្ងៃទៀត។

លោកបានប្រាប់ប៉ុស្តិ៍ទូរទស្សន៍ Al Jazeera ថា៖«ស្ថាប័នរដ្ឋនៅក្នុងប្រទេសនេះ កំពុងដំណើរការ យើងមាននីតិវិធីរដ្ឋធម្មនុញ្ញ។ ប្រហែលជាអ្នកនឹងឃើញការបោះឆ្នោតជ្រើសរើសមេដឹកនាំកំពូល ក្នុងរយៈពេលពីរបីថ្ងៃទៀត»។

សហរដ្ឋអាមេរិក និងអ៊ីស្រាអែល បានចាប់ផ្តើមប្រតិបត្តិការយោធាប្រឆាំងនឹងអ៊ីរ៉ង់ ដោយកំណត់គោលដៅទីក្រុងធំៗរបស់ប្រទេសនេះ រួមទាំងទីក្រុងតេអេរ៉ង់ផងដែរ។ ទូរទស្សន៍រដ្ឋអ៊ីរ៉ង់ បានរាយការណ៍ពីការស្លាប់របស់មេដឹកនាំកំពូល លោក Ayatollah Ali Khamenei។ លោក Ali Larijani លេខានៃក្រុមប្រឹក្សាសន្តិសុខជាតិកំពូលរបស់អ៊ីរ៉ង់ បានប្រកាសថា ក្រុមប្រឹក្សាភិបាលនេះ នឹងទទួលភារកិច្ចរបស់មេដឹកនាំកំពូលរហូតដល់អ្នកស្នងតំណែងរបស់លោក ត្រូវបានជ្រើសរើស៕