យោងតាមទីភ្នាក់ងារសារព័ត៌មានសកម្មជនសិទ្ធិមនុស្ស (HRANA)មានមូលដ្ឋាននៅអាមេរិក បានឲ្យដឹងថាមនុស្សជាង ៧០០ នាក់ត្រូវបានសម្លាប់នៅអ៊ីរ៉ង់ចាប់តាំងពីសហរដ្ឋអាមេរិកនិងអ៊ីស្រាអែលពួតដៃគ្នាវាយប្រហារអ៊ីរ៉ង់ នៅថ្ងៃសៅរ៍ ២៨កុម្ភៈសប្ដាហ៍មុន។

 យោងតាមទីភ្នាក់ងារសារព័ត៌មានសកម្មជនសិទ្ធិមនុស្សនេះ គិតត្រឹមរសៀលថ្ងៃចន្ទ២មីនា ម៉ោងក្នុងស្រុក យ៉ាងហោចណាស់មានជនស៊ីវិល ៧៤២ នាក់ត្រូវបានសម្លាប់នៅអ៊ីរ៉ង់ រួមទាំងកុមារ ១៧៦ នាក់ ។ ទីភ្នាក់ងារនេះរាយការណ៍ថា ជនស៊ីវិលជាង ៩០០ នាក់បានរងរបួស។ យ៉ាងហោចណាស់មានមនុស្ស ៨៥ នាក់ត្រូវបានសម្លាប់ក្នុងរយៈពេល ២៤ ម៉ោងកន្លងមកនេះ ហើយខ្លួនកំពុងផ្ទៀងផ្ទាត់ការស្លាប់រាប់រយនាក់បន្ថែមទៀត។

យោងតាមក្រុមសិទ្ធិមនុស្សខាងលើ ក៏មានរបាយការណ៍អំពីការខូចខាតដល់អគារសាសនា និងផ្ទះសម្បែងក្នុងរយៈពេល ២៤ ម៉ោងចុងក្រោយនេះផងដែរ។ ក្នុងចំណោមនោះ ក៏មានវិហារអ៊ីស្លាមមួយនៅទីក្រុង Karaj ក្បែររដ្ឋធានី តេអេរ៉ង់ អគារលំនៅឋានជាច្រើន ការិយាល័យអភិបាលរដ្ឋនៅភាគខាងត្បូងនៃរដ្ឋធានី និងកំពង់ផែ Shahid Bahonar ក្នុងទីក្រុង Bandar Abbas នៅលើច្រកសមុទ្រ Hormuz ផងដែរ ។ជាមួយគ្នាអ៊ីរ៉ង់ក៏បានអះអាងពីការខូចខាតមន្ទីរពេទ្យនៅទីក្រុងតេអេរ៉ង់ដែរ។

ទីភ្នាក់ងារដដែលនិយាយថា ក្នុងចំណោមគោលដៅយោធាដែលត្រូវបានវាយប្រហារក្នុងរយៈពេល២៤ម៉ោងកន្លងមកនេះ គឺទីស្នាក់ការកណ្តាលនៃបញ្ជាការអនុវត្តន៍ច្បាប់ឃឺដ និងមជ្ឈមណ្ឌលបញ្ជាការឆ្មាំព្រំដែនឃឺដ នៅភាគខាងលិចទីក្រុង Sanandaj ។ មូលដ្ឋានទ័ពអាកាសមួយនៅទីក្រុង Isfahan និងមូលដ្ឋានទ័ពមួយនៅរដ្ឋធានីតេអេរ៉ង់ក៏ត្រូវបានខូចខាតផងដែរ។ CNN មិនអាចផ្ទៀងផ្ទាត់របាយការណ៍ដោយឯករាជ្យបានទេ ។ទីភ្នាក់ងារ HRANA និយាយថា ការវិភាគរបស់ពួកគេគឺជាព័ត៌មានបឋម ហើយអាចមានការប្រែប្រួល។

ក្រុមអាជ្ញាធរនៅទីក្រុងតេអេរ៉ង់បានអំពាវនាវឱ្យមានចំណាត់ការអន្តរជាតិ និងសាមគ្គីភាព បន្ទាប់ពីមន្ទីរពេទ្យ និងសាលារៀនជាច្រើនត្រូវបានរងផលប៉ះពាល់ដោយការវាយប្រហារតាមអាកាសរបស់អាមេរិក និងអ៊ីស្រាអែលលើប្រទេសនេះ ខណៈអ៊ីរ៉ង់បន្តបាញ់មីស៊ីល និងយានដ្រូននៅទូទាំងតំបន់៕