អង្គការលើកលែងទោសអន្តរជាតិ បាននិយាយថា យ៉ាងហោចណាស់មនុស្ស ១៥នាក់ ត្រូវបានសម្លាប់បន្ទាប់ពីក្រុមខ្មាន់កាំភ្លើង បានវាយប្រហារសហគមន៍ចំនួនបី នៅភាគខាងជើងកណ្តាលប្រទេសនីហ្សេរីយ៉ា។ 

ក្រុមសិទ្ធិមនុស្សនេះ បាននិយាយនៅក្នុងសេចក្តីថ្លែងការណ៍មួយដែលបង្ហោះនៅលើប្រព័ន្ធផ្សព្វផ្សាយ X ថា ការវាយប្រហារក្នុងពេលដំណាលគ្នា បានកើតឡើង នៅក្នុងភូមិ Tashan Maje, Saduro និង Runtuwa ដែលមានទីតាំងនៅតំបន់ Borgu នៃរដ្ឋនីហ្សេរីយ៉ា។ 

អង្គការលើកលែងទោសនេះ បាននិយាយថា៖«ក្រុមខ្មាន់កាំភ្លើង បានលុកលុយភូមិនានា ... ដោយជិះម៉ូតូរាប់សិបគ្រឿង បាញ់ប្រហារគ្រប់ទិសទី។ ពួកគេក៏បានប្លន់ហាងលក់ទំនិញផងដែរ។

សេចក្តីថ្លែងការណ៍នេះ បានឲ្យដឹងថា៖«ការវាយប្រហារដ៏គួរឲ្យរន្ធត់» គឺជាការចង្អុលបង្ហាញមួយទៀតដែលថា «ប្រជាជនរស់នៅក្នុងស្ថានភាពដ៏គ្រោះថ្នាក់ និងមានអារម្មណ៍ថា គ្មានក្តីសង្ឃឹមឡើយ»។

ភាគខាងជើងប្រទេសនីហ្សេរីយ៉ា កំពុងស្ថិតក្នុងវិបត្តិសន្តិសុខដ៏ស្មុកស្មាញមួយ ដែលមានទាំងក្រុមសកម្មប្រយុទ្ធដែលកំពុងប្រតិបត្តិការនៅភាគឦសាន និងក្រុមឧក្រិដ្ឋជនប្រដាប់អាវុធចាប់ជំរិតមនុស្ស ដើម្បីប្រាក់លោះ ដែលបានបង្កឲ្យមានភាពវឹកវរនៅតំបន់ភាគពាយ័ព្យ និងភាគខាងជើងកណ្តាលនៃប្រទេសនេះ។

ប្រទេសដែលមានប្រជាជនច្រើនបំផុតនៅទ្វីបអាហ្វ្រិក គឺជាគោលដៅរបស់ទីក្រុងវ៉ាស៊ីនតោន បន្ទាប់ពីប្រធានាធិបតីអាមេរិក ដូណាល់ ត្រាំ បាននិយាយថា ប្រទេសនេះ មិនបានការពារគ្រិស្តបរិស័ទពីការប្រល័យពូជសាសន៍ដែលត្រូវបានចោទប្រកាន់នោះទេ។ រដ្ឋាភិបាលនីហ្សេរីយ៉ា បានបដិសេធការចោទប្រកាន់នេះ ហើយអ្នកវិភាគនិយាយថា អំពើប្រល័យពូជសាសន៍នោះ ធ្វើឲ្យស្ថានភាពកាន់តែស្មុកស្មាញ ដែលប្រជាជនតែងតែត្រូវបានកំណត់គោលដៅ ដោយមិនគិតពីជំនឿរបស់ពួកគេទេ៕