សារព័ត៌មានរ៉យទ័រ បានរាយការណ៍កាលពីថ្ងៃចន្ទ (២ មីនា) ថា បណ្ដាក្រុមហ៊ុនធានារ៉ាប់រង កំពុងលុបចោលការធានាលើហានិភ័យសង្គ្រាម សម្រាប់នាវាក្នុងតំបន់ឈូងសមុទ្រមជ្ឈិមបូព៌ា ខណៈជម្លោះអ៊ីរ៉ង់ ដែលកំពុងរីករាលដាលស្ទើរពាសពេញតំបន់ បានធ្វើឱ្យប៉ះពាល់ដល់ការដឹកជញ្ជូនទូទាំងពិភពលោក នាំឱ្យនាវាដឹកប្រេងរងការខូចខាត ឬជាប់គាំង និងបានសម្លាប់មនុស្សមួយចំនួន។

ការដឹកជញ្ជូនតាមច្រកសមុទ្រ Hormuz រវាងអ៊ីរ៉ង់ និងអូម៉ង់ ដែលជាផ្លូវដឹកជញ្ជូនប្រេងប្រហែល ១ភាគ៥ នៃតម្រូវការពិភពលោក រួមទាំងឧស្ម័នក្នុងបរិមាណដ៏ច្រើនផងនោះ បានឈានដល់ការផ្អាកស្ទើរតែទាំងស្រុង បន្ទាប់ពីនាវានៅក្នុងតំបន់នោះត្រូវបានវាយប្រហារ ជាការសងសឹករបស់អ៊ីរ៉ង់ ចំពោះការវាយប្រហាររបស់សហរដ្ឋអាមេរិក និងអ៊ីស្រាអែល។

នាវាដឹកប្រេងមួយគ្រឿងបានផ្ទុះឆេះយ៉ាងសន្ធោសន្ធៅកាលពីថ្ងៃចន្ទ និងនាវា ៤គ្រឿងផ្សេងទៀតបានរងការខូចខាត ហើយនាវាប្រហែល ១៥០គ្រឿងត្រូវបានជាប់គាំង។ ទិន្នន័យដឹកជញ្ជូនកាលពីថ្ងៃអាទិត្យ បានបង្ហាញថា នាវាដទៃទៀតយ៉ាងហោចណាស់ ១៥០ គ្រឿង រួមមានទាំងនាវាដឹកប្រេង និងនាវាដឹកឧស្ម័នធម្មជាតិរាវ (LNG) បានបោះយុថ្កាចតចោលនៅក្នុងច្រកសមុទ្រ Hormuz និងដែនទឹកជុំវិញនោះ ដោយមិនហ៊ានចេញដំណើរនោះទេ។

នាយកប្រតិបត្តិនៃក្រុមហ៊ុនដឹកជញ្ជូនផ្លូវសមុទ្រ Ocean Network Express បាននិយាយកាលពីថ្ងៃចន្ទថា អត្រាប្រហែល ១០% នៃនាវាដឹកទូកុងតឺន័រនៅទូទាំងពិភពលោក កំពុងជាប់គាំងនៅក្នុងភាពកកស្ទះនេះ ហើយទំនិញអាចនឹងចាប់ផ្តើមគរទុកចោលនៅតាមកំពង់ផែ និងមជ្ឈមណ្ឌលផ្ទេរទំនិញនានានៅអឺរ៉ុប និងអាស៊ី ក្នុងពេលឆាប់ៗ ដោយមិនអាចដឹកជញ្ជូនចេញបាននោះទេ៕