រូបភាពផ្កាយរណបពាណិជ្ជកម្ម បានចាប់យកអ្វីដែលហាក់ដូចជាការវាយប្រហារលើកដំបូង លើទីតាំងនុយក្លេអ៊ែររបស់អ៊ីរ៉ង់ គិតចាប់តាំងពីមាននូវការចាប់ផ្តើមប្រតិបត្តិការផ្លូវអាកាស រវាងសហរដ្ឋអាមេរិក និងអ៊ីស្រាអែល។ នេះបើយោងតាមវិទ្យាស្ថានគោលនយោបាយឯករាជ្យមួយ ដែលបានប្រាប់ឲ្យដឹងកាលពីថ្ងៃចន្ទ (ទី២ ខែមីនា ឆ្នាំ២០២៦)។

វិទ្យាស្ថានវិទ្យាសាស្ត្រ និងសន្តិសុខអន្តរជាតិ បានឲ្យដឹងថា រូបភាពពីក្រុមហ៊ុន Vantor ដែលមានមូលដ្ឋាននៅរដ្ឋ Colorado សហរដ្ឋអាមេរិក បានបង្ហាញពីការវាយប្រហារ ២លើក លើចំណុចច្រកចូលរោងចក្រចម្រាញ់អ៊ុយរ៉ានីញ៉ូមក្រោមដី នៅទីក្រុង Natanz ដែលត្រូវបានវាយប្រហារដោយសហរដ្ឋអាមេរិក កាលពីខែមិថុនាឆ្នាំមុន។

លោក David Albright អតីតមន្ត្រីអធិការកិច្ចនុយក្លេអ៊ែររបស់អង្គការសហប្រជាជាតិ (UN) និងជាស្ថាបនិកនៃវិទ្យាស្ថាននេះ បាននិយាយថា ការវាយប្រហារទាំងនេះ ហាក់ដូចជាបានកើតឡើង នៅចន្លោះរសៀលថ្ងៃអាទិត្យ និងព្រឹកថ្ងៃចន្ទ តាមពេលវេលាម៉ោងក្នុងស្រុក ដោយផ្អែកលើរូបភាពផ្កាយរណបដែលក្រុមរបស់លោកបានពិនិត្យ។ លោកមិនអាចកំណត់អត្តសញ្ញាណថា តើសហរដ្ឋអាមេរិក ឬអ៊ីស្រាអែល បានវាយប្រហារទីតាំងនេះ នៅទីក្រុង Natanz ដែលជាកន្លែងសំខាន់មួយនៃកម្មវិធីនុយក្លេអ៊ែររបស់អ៊ីរ៉ង់នោះទេ។ 

ការរកឃើញរបស់លោក Albright នេះ ហាក់ដូចជាគាំទ្រដល់សេចក្តីថ្លែងការណ៍មុនរបស់លោក Reza Najafi បេសកជនអ៊ីរ៉ង់ ប្រចាំទីភ្នាក់ងារថាមពលបរមាណូអន្តរជាតិ (IAEA) ដែលថា ទីតាំង Natanz ត្រូវបានវាយប្រហារកាលពីថ្ងៃអាទិត្យ។ លោក Najafi បានជំទាស់នឹងការអត្ថាធិប្បាយរបស់លោក Raphael Grossi ប្រធាន IAEA ដែលបាននិយាយថា មិនមានសញ្ញាដែលបង្ហាញថា ទីតាំងនុយក្លេអ៊ែរណាមួយត្រូវបានវាយប្រហារនោះឡើយ។

គួរបញ្ជាក់ថា សហរដ្ឋអាមេរិក និងអ៊ីស្រាអែល បានចាប់ផ្តើមសង្គ្រាមផ្លូវអាកាសរបស់ពួកគេ ប្រឆាំងនឹងអ៊ីរ៉ង់ កាលពីព្រឹកថ្ងៃសៅរ៍ (ទី២៨ ខែកុម្ភៈ) ដែលបង្កឲ្យមានការវាយប្រហារសងសឹកវិញពីសំណាក់អ៊ីរ៉ង់ នៅជុំវិញតំបន់៕