ប្រទេសចិនបានអំពាវនាវឲ្យគ្រប់ភាគីទាំងអស់ នៅក្នុងសង្គ្រាមមជ្ឈិមបូព៌ា បន្តរក្សាសុវត្ថិភាព នៅក្នុងច្រកសមុទ្រហ័រមូស (Hormuz) ដែលជាផ្លូវដឹកជញ្ជូនដ៏សំខាន់ សម្រាប់ប្រេង និងឧស្ម័ន ហើយបានប្ដេជ្ញាចាត់នូវវិធានការនានា ដើម្បីធានាសន្តិសុខថាមពលរបស់ខ្លួន។

ស្ទើរតែ ១ភាគ៤នៃការផ្គត់ផ្គង់ប្រេងរបស់ពិភពលោកដែលត្រូវបានដឹកជញ្ជូនតាមសមុទ្រ ឆ្លងកាត់ច្រកសមុទ្រនេះ ក៏ដូចជាទំនិញមួយចំនួនធំផងដែរ។ កាលពីថ្ងៃសៅរ៍ចុងសប្ដាហ៍កន្លមក កងឆ្មាំបដិវត្តន៍អ៊ីរ៉ង់ បានប្រកាសបិទ ដែលជំរុញឲ្យក្រុមដឹកជញ្ជូនអន្តរជាតិជាច្រើនបញ្ឈប់ការធ្វើដំណើរឆ្លងកាត់តាមផ្លូវទឹកនេះ។

នៅថ្ងៃអង្គារ (ទី៣ ខែមីនា ឆ្នាំ២០២៦) នេះ អ្នកនាំពាក្យក្រសួងការបរទេស លោកស្រី Mao Ning បានប្រាប់សន្និសីទសារព័ត៌មានប្រចាំថ្ងៃថា៖ «ប្រទេសចិនជំរុញឲ្យគ្រប់ភាគីទាំងអស់បញ្ឈប់ប្រតិបត្តិការយោធាជាបន្ទាន់ ជៀសវាងការកើនឡើងនូវភាពតានតឹងបន្ថែមទៀត បន្តរក្សាសុវត្ថិភាពនៃផ្លូវដឹកជញ្ជូន នៅក្នុងច្រកសមុទ្រហ័រមូស និងទប់ស្កាត់ផលប៉ះពាល់ ដែលមានកាន់តែធំឡើង ចំពោះសេដ្ឋកិច្ចពិភពលោក»។

លោកស្រីបានបន្ថែមថា៖ «សន្តិសុខថាមពលមានសារៈសំខាន់ខ្លាំងណាស់ ចំពោះសេដ្ឋកិច្ចពិភពលោក។ ប្រទេសចិននឹងចាត់វិធានការចាំបាច់នានា ដើម្បីធានាសន្តិសុខថាមពលរបស់ខ្លួន»។

ប្រទេសចិនគឺជាអ្នកទិញប្រេងអ៊ីរ៉ង់ដ៏ធំ ដែលភាគច្រើនឆ្លងកាត់ច្រកសមុទ្រនេះ៕