ទីភ្នាក់ងារសារព័ត៌មានស៊ីប (CNA) ពាក់កណ្តាលផ្លូវការ នៅថ្ងៃអង្គារ (ទី៣ ខែមីនា ឆ្នាំ២០២៦) នេះ បានឲ្យដឹងថា បារាំងមានគម្រោងបញ្ជូនប្រព័ន្ធប្រឆាំងមីស៊ីល និងប្រឆាំងយានដ្រូន ទៅកាន់ប្រទេសស៊ីប បន្ទាប់ពីមូលដ្ឋានទ័ពអាកាសអង់គ្លេសនៅលើកោះនេះ ត្រូវបានវាយប្រហារដោយយានដ្រូន។

របាយការណ៍របស់ CNA បានឲ្យដឹងថា ប្រទេសបារាំងនឹងបញ្ជូនប្រព័ន្ធប្រឆាំងមីស៊ីល និងប្រឆាំងយានដ្រូន ក៏ដូចជានាវាចម្បាំង ១គ្រឿង។ សារព័ត៌មាននេះបានឲ្យដឹងទៀតថា ប្រធានាធិបតីបារាំង លោក Emmanuel Macron បានជូនដំណឹងអំពីគោលបំណងនេះទៅកាន់ប្រធានាធិបតីស៊ីប លោក Nikos Christodoulides នៅព្រឹកថ្ងៃអង្គារនេះ។

ប្រភពមួយពីរដ្ឋាភិបាលស៊ីប ដែលបាននិយាយក្នុងលក្ខខណ្ឌមិនបញ្ចេញឈ្មោះ បានបញ្ជាក់ពីរបាយការណ៍នេះ។ ក្រសួងការពារជាតិបារាំងមិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយ។

ជំនួយរបស់បារាំងដែលត្រូវបានរាយការណ៍ទៅកាន់កោះនេះ បានកើតឡើងបន្ទាប់ពីការផ្តល់ជំនួយរបស់ប្រទេសក្រិក ប៉ុន្មានម៉ោងបន្ទាប់ពី RAF Akrotiri ដែលជាមូលដ្ឋានអធិបតេយ្យភាពរបស់អង់គ្លេស ត្រូវបានកំណត់គោលដៅក្នុងឧប្បត្តិហេតុយានដ្រូនចំនួន ២លើកដាច់ដោយឡែកពីគ្នា កាលពីថ្ងៃចន្ទ។

ក្នុងករណីដំបូង យានដ្រូន Shahed ដែលផលិតនៅអ៊ីរ៉ង់ បានធ្លាក់ចូលទៅក្នុងផ្លូវរត់របស់មូលដ្ឋាននេះ ដែលបណ្តាលឲ្យមានការខូចខាតតិចតួច។ ប៉ុន្មានម៉ោងក្រោយមក យានដ្រូន ២គ្រឿងផ្សេងទៀត ត្រូវបានស្ទាក់ចាប់បាន។ មន្ត្រីជាន់ខ្ពស់ស៊ីប និយាយថា ការវាយប្រហារនេះត្រូវបានធ្វើឡើងដោយយានដ្រូន Shahed របស់អ៊ីរ៉ង់ ដែលទំនងជាបាញ់ដោយក្រុមសកម្មប្រយុទ្ធហេបូឡាគាំទ្រដោយអ៊ីរ៉ង់ ពីប្រទេសលីបង់៕