ចក្រភពអង់គ្លេស បារាំង និងប្រទេសក្រិក កំពុងបញ្ជូនកងកម្លាំងការពារដែនអាកាសទៅកាន់ប្រទេសស៊ីប បន្ទាប់ពីយានដ្រូន បានវាយប្រហារមូលដ្ឋានទ័ពអាកាស Akrotiri នៅលើប្រទេសកោះមួយនេះ ដែលជំរុញឱ្យមានការឆ្លើយតបពីយោធាការពារជាតិក្នុងតំបន់កាន់តែទូលំទូលាយកាលពីថ្ងៃអង្គារ ទី៣ ខែមីនា ពីសម្ព័ន្ធមិត្តអឺរ៉ុប។

មន្ត្រីជាន់ខ្ពស់ប្រទេសស៊ីប បាននិយាយថា យានដ្រូន Shahed ផលិតដោយអ៊ីរ៉ង់មួយគ្រឿង បានវាយប្រហារផ្លូវយន្តហោះរត់នៅមូលដ្ឋានកងទ័ពអង់គ្លេស បន្ទាប់ពីហោះហើរក្នុងរយៈកម្ពស់ទាបដើម្បីគេចចេញពីរ៉ាដា ដែលទំនងជាបានបង្ហោះដោយក្រុមហេសបូឡាគាំទ្រដោយអ៊ីរ៉ង់ ចេញពីប្រទេសលីបង់។ យានដ្រូនពីរគ្រឿងផ្សេងទៀត ត្រូវបានស្ទាក់ចាប់។

មូលដ្ឋាន Akrotiri ទោះបីជាត្រូវបានចាត់ទុកថាជាដែនដីអធិបតេយ្យរបស់អង់គ្លេសក៏ដោយ ក៏វានៅជិតតំបន់មានប្រជាជនស៊ីបរស់នៅច្រើន ដែលជំរុញឱ្យមនុស្សរាប់រយនាក់ជម្លៀសចេញពីលំនៅឋានរបស់ពួកគេ ខណៈរដ្ឋជាសមាជិកសហភាពអឺរ៉ុបមួយនេះត្រូវបានទាញចូលទៅក្នុងភាពវឹកវរមិននឹកស្មានដល់ បន្ទាប់ពីការវាយប្រហាររបស់សហរដ្ឋអាមេរិក និងអ៊ីស្រាអែល លើអ៊ីរ៉ង់ និងការវាយប្រហារសងសឹកនៅទូទាំងតំបន់ដោយទីក្រុងតេអេរ៉ង់។ ប្រទេសស៊ីប ដែលមានសមត្ថភាពការពារជាតិខ្សោយ និងគ្មានកងទ័ពអាកាស បានបង្កើនកិច្ចខិតខំប្រឹងប្រែងធ្វើទំនើបកម្មក្នុងប៉ុន្មានឆ្នាំថ្មីៗនេះ រួមទាំងការទិញប្រព័ន្ធការពារដែនអាកាស Barak MX។ អ្នកនាំពាក្យរដ្ឋាភិបាលស៊ីប បាននិយាយថា ប្រទេសបារាំង នៅក្នុងផែនការមួយដែលបានទាក់ទងទៅប្រធានាធិបតីស៊ីប លោក Nikos Christodoulides កាលពីថ្ងៃអង្គារ នឹងកំពុងបញ្ជូនប្រព័ន្ធប្រឆាំងមីស៊ីល និងប្រឆាំងយានដ្រូន ព្រមទាំងនាវាចម្បាំងមួយគ្រឿង។ ចក្រភពអង់គ្លេសនិយាយថា ខ្លួននឹងដាក់ពង្រាយនាវាពិឃាត HMS Dragon និងឧទ្ធម្ភាគចក្រ Wildcat ចំនួនពីរគ្រឿងបំពាក់ដោយមីស៊ីល Martlet ដើម្បីពង្រឹងការការពារនៅភាគខាងកើតសមុទ្រមេឌីទែរ៉ាណេ។