រុស្ស៊ី និងចិន បានរិះគន់ការវាយប្រហាររបស់សហរដ្ឋអាមេរិកនិងអ៊ីស្រាអែល លើប្រទេសអ៊ីរ៉ង់ ដោយទីក្រុងមូស្គូ និយាយថា ខ្លួនពុំបានឃើញភស្តុតាងណាមួយបង្ហាញថា ទីក្រុងតេអេរ៉ង់ កំពុងអភិវឌ្ឍអាវុធនុយក្លេអ៊ែរនោះទេ ហើយទីក្រុងប៉េកាំង ទាមទារឱ្យបញ្ឈប់ការវាយប្រហាររួមគ្នានេះជាបន្ទាន់។

យោងតាមក្រសួងការបរទេសចិនបានឲ្យដឹងថា រដ្ឋមន្ត្រីការបរទេសចិន លោក Wang Yi បានប្រាប់សមភាគីអ៊ីស្រាអែលរបស់លោក លោក Gideon Saar កាលពីថ្ងៃអង្គារថា ការវាយប្រហារលើប្រទេសអ៊ីរ៉ង់បានកើតឡើង ខណៈការចរចារវាងទីក្រុងវ៉ាស៊ីនតោន និងទីក្រុងតេអេរ៉ង់ ធ្វើឲ្យមាន «វឌ្ឍនភាពគួរឱ្យកត់សម្គាល់ រួមមានទាំងការដោះស្រាយក្តីបារម្ភសន្តិសុខរបស់អ៊ីស្រាអែល» ។

លោក Wang បានប្រាប់រដ្ឋមន្ត្រីការបរទេសអ៊ីស្រាអែលក្នុងអំឡុងពេលសន្ទនាតាមទូរស័ព្ទថា «ជាការសោកស្តាយ ដែលដំណើរការនេះត្រូវបានរំខានដោយសកម្មភាពយោធា។ ប្រទេសចិន ប្រឆាំងទៅនឹងការវាយប្រហារដោយយោធាណាមួយធ្វើឡើងដោយអ៊ីស្រាអែល និងសហរដ្ឋអាមេរិក ប្រឆាំងនឹងអ៊ីរ៉ង់» នេះបើយោងតាមក្រសួង។

លោក Wang និយាយថា «ប្រទេសចិន អំពាវនាវឱ្យបញ្ឈប់ប្រតិបត្តិការយោធាជាបន្ទាន់ ដើម្បីទប់ស្កាត់ការរីកធំបន្ថែមទៀត និងការបាត់បង់ការគ្រប់គ្រងជម្លោះ» ហើយ «ការប្រើប្រាស់កម្លាំងមិនអាចដោះស្រាយបញ្ហាបានពិតប្រាកដទេ។ ផ្ទុយទៅវិញ វានឹងនាំមកនូវបញ្ហាថ្មីៗ និងផលវិបាកធ្ងន់ធ្ងររយៈពេលវែង»។ យោងតាមក្រសួងការបរទេសចិន លោក Saar បានព្រមព្រៀងតាមសំណើរបស់លោក Wang ចាត់វិធានការជាក់ស្តែង ដើម្បីធានាសុវត្ថិភាពរបស់បុគ្គលិក និងស្ថាប័នរបស់ប្រទេសចិននៅក្នុងប្រទេសអ៊ីរ៉ង់។ រដ្ឋមន្ត្រីការបរទេសរុស្ស៊ី លោក Sergey Lavrov បានរិះគន់សហរដ្ឋអាមេរិក និងអ៊ីស្រាអែលកាលពីថ្ងៃអង្គារ ដោយនិយាយថា សង្គ្រាមរបស់ប្រទេសទាំងពីរលើអ៊ីរ៉ង់ អាចនាំទៅរកផលវិបាកខណៈប្រទេសទាំងពីរអះអាងថាមានបំណងទប់ស្កាត់ការរីកសាយអាវុធនុយក្លេអ៊ែរ។