កងកម្លាំងអាមេរិក បានបន្តការវាយប្រហារឥតឈប់ឈរលើអ៊ីរ៉ង់ ហើយអ៊ីស្រាអែល បានធ្វើការវាយប្រហារយ៉ាងទូលំទូលាយនៅថ្ងៃពុធ (៤ មីនា) នេះ ដោយកំណត់គោលដៅទីតាំងមីស៊ីល និងប្រព័ន្ធការពារដែនអាកាសរបស់អ៊ីរ៉ង់ នៅក្នុងយុទ្ធនាការមួយដែលមេបញ្ជាការកំពូលអាមេរិកប្រចាំមជ្ឈិមបូព៌ា បាននិយាយថា ធ្វើឡើងគឺមុនផែនការដែលគ្រោងទុក។

សង្គ្រាមដែលអូសបន្លាយរយៈពេលប្រាំថ្ងៃមកហើយ គិតត្រឹមថ្ងៃពុធនេះ បានបន្តអង្រួនទីផ្សារសកល។ ដំបូងឡើយ អាមេរិករំពឹងថាផ្តួលរំលំថ្នាក់ដឹកនាំបែបសាសនារបស់ទីក្រុងតេអេរ៉ង់ យ៉ាងឆាប់រហ័ស និងម៉ឺងម៉ាត់ ក៏ប៉ុន្តែអ៊ីរ៉ង់នៅតែបន្តវាយប្រហារសងសឹកប្រឆាំងនឹងអ៊ីស្រាអែល និងតំបន់ជុំវិញឈូងសមុទ្រ ហើយបានប្ដេជ្ញាជ្រើសរើសមេដឹកនាំកំពូលថ្មីដើម្បីជំនួសលោក Ali Khamenei ដែលត្រូវបានសម្លាប់ក្នុងការបាញ់ប្រហារបើកឆាក នៅថ្ងៃសៅរ៍កន្លងទៅ។

ប្រភពដែលដឹងពីផែនការសង្គ្រាមអ៊ីស្រាអែល បានប្រាប់សារព័ត៌មានរ៉យទ័រថា យុទ្ធនាការនេះគ្រោងទុកថាមានរយៈពេលពីរសប្តាហ៍។ លោកប្រធានាធិបតីអាមេរិក Donald Trump បាននិយាយកាលពីថ្ងៃចន្ទថា ការប៉ាន់ស្មានដំបូងរបស់អាមេរិកសម្រាប់ប្រតិបត្តិការនេះ គឺមានរយៈពេលពី ៤ទៅ៥ សប្តាហ៍។

ឧត្តមនាវីឯក Brad Cooper ប្រធានបញ្ជាការកណ្តាលអាមេរិក ដែលដឹកនាំយុទ្ធនាការនេះ បាននិយាយថា «តាមការវាយតម្លៃសរុបរបស់លោកលើប្រតិបត្តិការ គឺថា យោធាឈានទៅមុខលើសពីផែនការដែលបានដាក់ចេញ»។ លោក Cooper បានបន្តថា ប្រព័ន្ធការពារដែនអាកាសរបស់អ៊ីរ៉ង់ ត្រូវបានបំផ្លាញយ៉ាងធ្ងន់ធ្ងរ កងទ័ពជើងទឹកអ៊ីរ៉ង់ ពុំមាននាវាសម្រាប់ប្រតិបត្តិការលើផ្លូវទឹកសំខាន់ៗទៀតទេ បន្ទាប់ពីនាវាចំនួន ១៧ គ្រឿងត្រូវបានពន្លិច ហើយគោលដៅអ៊ីរ៉ង់ជាង ២.០០០ កន្លែងត្រូវបានវាយប្រហារ។

លោកបានបន្ថែមថា កងទ័ពអាមេរិកប្រហែល ៥០.០០០ នាក់ យន្តហោះចម្បាំង ២០០គ្រឿង និងនាវាផ្ទុកយន្តហោះ ២គ្រឿង កំពុងចូលរួមក្នុងប្រតិបត្តិការនេះ ហើយ «សមត្ថភាពបន្ថែម» ជាច្រើនទៀត កំពុងបញ្ជូនទៅបន្តបន្ទាប់៕