រដ្ឋមន្ត្រីការបរទេសចិន លោក Wang Yi បានប្រាប់សមភាគីអ៊ីស្រាអែលរបស់លោក គឺលោក Gideon Saar កាលពីថ្ងៃអង្គារ (ទី៣ ខែមីនា ឆ្នាំ២០២៦)ថា ប្រទេសចិនប្រឆាំងនឹងការវាយប្រហារដោយយោធាដែលធ្វើឡើងដោយអ៊ីស្រាអែល និងសហរដ្ឋអាមេរិក លើអ៊ីរ៉ង់ ហើយទាមទារឲ្យមានការបញ្ឈប់អរិភាពជាបន្ទាន់។ នេះបើយោងតាមការឲ្យដឹងពីក្រសួងរបស់លោក។

ក្រសួងបានដកស្រង់សម្ដីរបស់លោក Wang ដែលបាននិយាយប្រាប់លោក Saar អំឡុងការជជែកតាមទូរសព្ទថា៖ «កម្លាំងមិនអាចដោះស្រាយបញ្ហាបានពិតប្រាកដឡើយ។ ផ្ទុយទៅវិញ វាជារឿយៗបង្កើតបញ្ហាថ្មី និងបន្សល់ទុកផលវិបាកធ្ងន់ធ្ងររយៈពេលវែង។ តម្លៃពិតនៃអំណាចយោធា មិនមែនស្ថិតនៅលើសមរភូមិទេ ប៉ុន្តែស្ថិតនៅក្នុងការទប់ស្កាត់សង្គ្រាម»។

សំឡេងផ្ទុះបានលាន់ឡើងកងរំពង នៅទូទាំងទីក្រុងតេអេរ៉ង់របស់ប្រទេសអ៊ីរ៉ង់ និងបេរូតរបស់លីបង់ កាលពីថ្ងៃអង្គារ ហើយទីផ្សារហិរញ្ញវត្ថុនៅជុំវិញពិភពលោក បានធ្លាក់ចុះដោយសារការរំពឹងទុកនៃការមានរំខានយូរអង្វែងដល់ការផ្គត់ផ្គង់ថាមពលសកល ដែលបណ្ដាលមកពីសង្គ្រាមផ្លូវអាកាស ដោយសហរដ្ឋអាមេរិក និងអ៊ីស្រាអែល ប្រឆាំងនឹងអ៊ីរ៉ង់។

ក្នុងជំនួបតាមរូរសព្ទនោះ លោក Wang បានប្រាប់លោក Saar ថា ប្រទេសចិនជឿជាក់លើការដោះស្រាយបញ្ហាអន្តរជាតិ និងតំបន់ តាមរយៈការសន្ទនា និងការចរចា ហើយនឹងបន្តដើរតួនាទីស្ថាបនា ដើម្បីបន្ធូរបន្ថយស្ថានភាពតានតឹង៕