យោងតាមសេចក្តីថ្លែងការណ៍របស់ក្រសួងការបរទេសចិន កាលពីថ្ងៃពុធ (៤ មីនា) ម្សិលមិញនេះ លោក Wang Yi រដ្ឋមន្ត្រីការបរទេសចិន បានថ្លែងទៅកាន់សមភាគីអារ៉ាប៊ីសាអ៊ូឌីត និងអារ៉ាប់រួម នៅក្នុងកិច្ចសន្ទនាតាមទូរសព្ទដាច់ដោយឡែកពីគ្នាថា ប្រទេសចិន នឹងបញ្ជូនប្រេសិតពិសេសទៅកាន់តំបន់មជ្ឈិមបូព៌ា ដើម្បីធ្វើការសម្របសម្រួល ខណៈជម្លោះក្នុងតំបន់នេះ នៅតែបន្តរីករាលដាលខ្លាំង។

ក្នុងកិច្ចសន្ទនាជាមួយរដ្ឋមន្ត្រីអារ៉ាប៊ីសាអ៊ូឌីត លោក Wang បានលើកឡើងថា ប្រទេសចិន វាយតម្លៃខ្ពស់ចំពោះភាពអត់ធ្មត់របស់អារ៉ាប៊ីសាអ៊ូឌីត និងការប្រកាន់ខ្ជាប់នូវការដោះស្រាយជម្លោះតាមរយៈមធ្យោបាយសន្តិវិធី។ លោកបន្តថា ចិនតែងតែជាកម្លាំងនៃសន្តិភាព និងត្រៀមខ្លួនជាស្រេចក្នុងការបន្តដើរតួនាទីប្រកបដោយស្មារតីស្ថាបនា ដោយក្នុងនោះ ចិននឹងបញ្ជូនប្រេសិតពិសេសទទួលបន្ទុកបញ្ហាមជ្ឈិមបូព៌ា ទៅកាន់បណ្តាប្រទេសក្នុងតំបន់ ដើម្បីអនុវត្តកិច្ចខិតខំប្រឹងប្រែងសម្របសម្រួល។

លោក Wang បញ្ជាក់ថា ការរីករាលដាល និងការកើនឡើងនៃជម្លោះនៅមជ្ឈិមបូព៌ា ដែលបច្ចុប្បន្នកំពុងជះឥទ្ធិពលដល់អារ៉ាប៊ីសាអ៊ូឌីត និងបណ្តាប្រទេសឈូងសមុទ្រផ្សេងទៀត គឺជាអ្វីដែលចិនមិនចង់ឃើញនោះទេ។ លោកបន្ថែមថា ទោះក្នុងហេតុផលណាក៏ដោយ ការប្រើប្រាស់កម្លាំងយោធាដោយមិនរើសមុខគឺមិនអាចទទួលយកបានឡើយ។ ប្រមុខការទូតចិនរូបនេះ បានជំរុញយ៉ាងខ្លាំងដល់គ្រប់ភាគីទាំងអស់ ឱ្យបញ្ឈប់រាល់ប្រតិបត្តិការយោធា វិលមករកការសន្ទនា និងការចរចាឱ្យឆាប់តាមដែលអាចធ្វើទៅបាន ដើម្បីបង្ការកុំឱ្យភាពតានតឹងកាន់តែធ្ងន់ធ្ងរឡើង។

នៅក្នុងកិច្ចសន្ទនាដាច់ដោយឡែកមួយទៀតជាមួយរដ្ឋមន្ត្រីការបរទេសនៃអេមីរ៉ាតអារ៉ាប់រួម លោក Wang បានសង្កត់ធ្ងន់ថា «បន្ទាត់ក្រហម» ក្នុងការការពារជនស៊ីវិលក្នុងជម្លោះ មិនត្រូវរំលោភបំពានដាច់ខាត ហើយគោលដៅមិនមែនយោធា រួមទាំងហេដ្ឋារចនាសម្ព័ន្ធពាក់ព័ន្ធនឹងថាមពល ក៏មិនគួរត្រូវបានវាយប្រហារនោះដែរ៕