ក្រុមស៊ើបអង្កេតឯករាជ្យរបស់អង្គការសហប្រជាជាតិ ដែលកំពុងអង្កេតលើការរំលោភសិទ្ធិមនុស្សក្នុងប្រទេសអ៊ីរ៉ង់ កាលពីថ្ងៃពុធ (៤ មីនា) បានថ្កោលទោសចំពោះការវាយប្រហារដោយអ៊ីស្រាអែល និងសហរដ្ឋអាមេរិក ទៅលើប្រទេសអ៊ីរ៉ង់ ក៏ដូចជាការវាយបកសងសឹករបស់ទីក្រុងតេអេរ៉ង់ នៅទូទាំងតំបន់ ដោយលើកឡើងថា សកម្មភាពទាំងនេះបានរំលោភលើធម្មនុញ្ញអង្គការសហប្រជាជាតិ។

គួរឱ្យដឹងថា ធម្មនុញ្ញអង្គការសហប្រជាជាតិ ហាមឃាត់ការប្រើប្រាស់កម្លាំងយោធា ប្រឆាំងនឹងបូរណភាពទឹកដី ឬឯករាជ្យភាពនយោបាយនៃរដ្ឋណាមួយ។ បេសកកម្មស្វែងរកការពិតអន្តរជាតិឯករាជ្យរបស់អង្គការសហប្រជាជាតិស្តីពីអ៊ីរ៉ង់ បានលើកឡើងក្នុងសេចក្តីថ្លែងការណ៍ថា៖ «ការវាយប្រហារទាំងនេះ ដែលបន្តពីក្រោយដោយការវាយបកសងសឹករបស់អ៊ីរ៉ង់ នៅទូទាំងតំបន់ គឺផ្ទុយនឹងធម្មនុញ្ញអង្គការសហប្រជាជាតិ»។

ស្ថាប័ននេះក៏សម្តែងនូវការតក់ស្លុតយ៉ាងខ្លាំង ចំពោះការវាយប្រហារដែលបានប៉ះចំសាលារៀនកុមារី Shajareh Tayyebeh ក្នុងក្រុង Minab ភាគខាងត្បូងប្រទេសអ៊ីរ៉ង់ កាលពីថ្ងៃសៅរ៍កន្លងទៅ ដែលជាថ្ងៃដំបូងនៃការវាយប្រហារពីសំណាក់សហរដ្ឋអាមេរិក និងអ៊ីស្រាអែល។ ក្រុមស៊ើបអង្កេតនេះបានបន្តថា ជនរងគ្រោះភាគច្រើនហាក់ដូចជាកុមារីសិស្សសាលា ដែលមានអាយុចន្លោះពី ៧ ដល់ ១២ ឆ្នាំ។ កាលពីព្រឹកថ្ងៃពុធដដែលនោះ ក្រុមអ្នកជំនាញដាច់ដោយឡែកមួយទៀតរបស់អង្គការសហប្រជាជាតិ បាននិយាយដោយយោងតាមរបាយការណ៍ថា មានកុមារលើសពី ១៦០ នាក់ត្រូវបានសម្លាប់។

សេចក្តីថ្លែងការណ៍បាននិយាយទៀតថា ការសម្លាប់មន្ត្រីអ៊ីរ៉ង់រាប់សិបនាក់ រួមទាំងមេដឹកនាំកំពូល លោក Ayatollah Ali Khamenei ក្នុងការវាយប្រហារតាមអាកាសរបស់អាមេរិក និងអ៊ីស្រាអែល មិនមែនជាមធ្យោបាយដែលអាចទទួលយកបាន ក្នុងការផ្តល់យុត្តិធម៌ក្រោមច្បាប់អន្តរជាតិនោះទេ៕