ឧបនាយករដ្ឋមន្ត្រី Maria Jesus Montero បាននិយាយកាលពីថ្ងៃពុធ ទី៤ ខែមីនា ថា ប្រទេសអេស្ប៉ាញ «នឹងពុំមែនជាប្រទេសចំណុះ» របស់ប្រទេសណាមួយឡើយ ដោយប្រឆាំងនឹងការគំរាមកំហែងរបស់ប្រធានាធិបតីសហរដ្ឋអាមេរិក លោក Donald Trump ក្នុងការកាត់ផ្តាច់ពាណិជ្ជកម្មជាមួយទីក្រុងម៉ាឌ្រីដ ជុំវិញជំហររបស់ខ្លួនប្រឆាំងការវាយប្រហាររបស់សហរដ្ឋអាមេរិក-អ៊ីស្រាអែល លើប្រទេសអ៊ីរ៉ង់។

លោក Trump បានដាក់ទណ្ឌកម្មពាណិជ្ជកម្មលើទីក្រុងម៉ាឌ្រីដ ជុំវិញការបដិសេធរបស់ខ្លួនមិនអនុញ្ញាតឱ្យយន្តហោះសហរដ្ឋអាមេរិកប្រើប្រាស់មូលដ្ឋានកងទ័ពជើងទឹកនិងអាកាស ដែលធ្វើប្រតិបត្តិការរួមគ្នានៅភាគខាងត្បូងប្រទេសអេស្ប៉ាញដើម្បីវាយលុកប្រឆាំងទីក្រុងតេអេរ៉ង់។ ប្រទេសអេស្ប៉ាញ បានថ្កោលទោសការទម្លាក់គ្រាប់បែករបស់សហរដ្ឋអាមេរិក និងអ៊ីស្រាអែល លើអ៊ីរ៉ង់ថាជាការធ្វេសប្រហែស និងខុសច្បាប់ ខណៈប្រទេសអឺរ៉ុបភាគច្រើនផ្សេងទៀត បានបដិសេធការរិះគន់ផ្ទាល់ចំពោះការវាយប្រហារនេះ។លោក Montero បានប្រាប់អ្នកសារព័ត៌មានដោយលើកឡើងពីការគាំទ្រចំពោះអេស្ប៉ាញពីគណៈកម្មការអឺរ៉ុបថា «យើងពិតជាពុំមែនជាប្រទេសចំណុះរបស់ប្រទេសណាមួយទេ យើងនឹងមិនអត់ឱនចំពោះការគំរាមកំហែងណាមួយឡើយ ហើយយើងនឹងការពារតម្លៃរបស់យើង»។

គណៈកម្មការបាននិយាយនៅក្នុងសេចក្តីថ្លែងការណ៍មួយកាលពីថ្ងៃពុធថា ខ្លួនរំពឹងថាសហរដ្ឋអាមេរិកនឹងគោរពតាមកិច្ចព្រមព្រៀងពាណិជ្ជកម្មរបស់ខ្លួនជាមួយសហភាពអឺរ៉ុប និងបានបង្ហាញ «សាមគ្គីភាពពេញលេញ» ជាមួយរដ្ឋជាសមាជិក ប៉ុន្តែបានឈប់ភ្លាមៗនិយាយពីឈ្មោះប្រទេសអេស្ប៉ាញ។ នៅក្នុងសុន្ទរកថាតាមទូរទស្សន៍កាលពីថ្ងៃពុធ នាយករដ្ឋមន្ត្រីអេស្ប៉ាញ លោក Pedro Sanchez បានបញ្ជាក់ជាថ្មីអំពីជំហរប្រឆាំងសង្គ្រាមរបស់អេស្ប៉ាញ ដោយព្រមានថាជម្លោះនេះប្រឈមនឹងការបង្កមហន្តរាយសកលដ៏ធំ។