ស៊ុយអែត បាននិយាយកាលពីថ្ងៃពុធ (៤ មីនា) ថា ប្រទេសចំនួនដប់នៅទូទាំងអឺរ៉ុបខាងជើង បានព្រមព្រៀងគ្នារៀបចំសម្រាប់លទ្ធភាពនៃការជម្លៀសប្រជាជនស៊ីវិលឆ្លងកាត់ព្រំដែន ក្នុងករណីមានវិបត្តិ ឬជម្លោះយោធាណាមួយកើតឡើងនៅក្នុងតំបន់ ដែលបង្ហាញពីការដកស្រង់បទពិសោធន៍ជាក់ស្ដែងពីសង្គ្រាមនៅអ៊ុយក្រែន។

ប្រទេសទាំង ១០ នឹងរួមគ្នារៀបចំផែនការដែលគ្របដណ្តប់លើការដឹកជញ្ជូន ការត្រួតពិនិត្យព្រំដែន ច្រករបៀងធ្វើដំណើរ និងបញ្ហាផ្សេងៗទៀត។ ប្រទេសអាល្លឺម៉ង់ និងប៉ូឡូញ រួមជាមួយសមាជិកអង្គការណាតូ (NATO) ផ្សេងទៀតដូចជា អេស្តូនី ឡាតវី លីទុយអានី ស៊ុយអែត ន័រវែស ហ្វាំងឡង់ អ៊ីស្លង់ និងដាណឺម៉ាក បានបង្កើនការរៀបចំផែនការរបស់ពួកគេក្នុងរយៈពេលប៉ុន្មានឆ្នាំចុងក្រោយនេះ សម្រាប់លទ្ធភាពនៃជម្លោះប្រដាប់អាវុធជាមួយរុស្ស៊ីនាពេលអនាគត។ វិមានក្រឹមឡាំង បានលើកឡើងដដែលៗថា រុស្ស៊ីមិនមានបំណងវាយប្រហារបណ្តាប្រទេសណាតូនោះទេ។

ក្រសួងការពារជាតិស៊ុយអែត បានលើកឡើងក្នុងសេចក្តីថ្លែងការណ៍ប្រកាសពីកិច្ចព្រមព្រៀងអឺរ៉ុបខាងជើងនេះថា៖ «បទពិសោធន៍ពីអ៊ុយក្រែន បានបង្ហាញថា ការផ្លាស់ទីលំនៅបណ្តោះអាសន្នរបស់ប្រជាជន នឹងអនុញ្ញាតឱ្យការការពារប្រទេសអាចបន្តទៅមុខបាន ខណៈដែលប្រជាជនស៊ីវិលត្រូវបានការពារ»។

មនុស្សរាប់លាននាក់បានភៀសខ្លួនចេញពីប្រទេសអ៊ុយក្រែន ក្នុងរយៈពេលបួនឆ្នាំមកនេះ ចាប់តាំងពីប្រតិបត្តការយោធាទ្រង់ទ្រាយធំរបស់រុស្ស៊ី ក្នុងខែកុម្ភៈ ឆ្នាំ២០២២ ដោយភាគច្រើននៃប្រជាជនទាំងនោះ បានស្វែងរកទីជ្រកកោននៅក្នុងបណ្តាប្រទេសអឺរ៉ុបផ្សេងទៀត ខណៈដែលជម្លោះនៅអ៊ុយក្រែន នៅតែបន្តយ៉ាងក្ដៅគគុក៕