ការកើនឡើងកម្តៅនៃសង្គ្រាមនៅមជ្ឈិមបូព៌ា បានធ្វើឱ្យរោងចក្រផលិតជីនៅក្នុងតំបន់នេះ ត្រូវបិទទ្វារ និងបង្កការរំខានយ៉ាងធ្ងន់ធ្ងរដល់ផ្លូវដឹកជញ្ជូនតាមនាវា ដែលអាចនឹងកាត់បន្ថយការផ្គត់ផ្គង់ដល់ប្រទេសនាំចូលសំខាន់ៗនៅអាស៊ី ស្របពេលដែលកសិករកំពុងត្រៀមលក្ខណៈសម្រាប់រដូវដាំដុះធញ្ញជាតិដ៏សំខាន់របស់ពួកគេ។

ក្រុមពាណិជ្ជករ និងអ្នកនាំចូលបានប្រាប់សារព័ត៌មានរ៉យទ័រថា ប្រទេសទាំងពីរដែលមានប្រជាជនច្រើនជាងគេបំផុតក្នុងលោក គឺឥណ្ឌា និងចិន ព្រមទាំងប្រទេសនាំចេញកសិផលសំខាន់ៗដូចជា អូស្ត្រាលី និងឥណ្ឌូនេស៊ី អាចនឹងប្រឈមមុខនឹងសម្ពាធលើការផ្គត់ផ្គង់សារធាតុចិញ្ចឹមរុក្ខជាតិ ដូចជាជីអាសូត និងជីផូស្វាត ជាដើម។

ការដឹកជញ្ជូនពីមជ្ឈិមបូព៌ាទំនងជានឹងធ្លាក់ចុះ មិនត្រឹមតែដោយសារការធ្វើដំណើរឆ្លងកាត់ច្រកសមុទ្រ Hormuz ដែលជាច្រកផ្លូវសម្រាប់មួយភាគបីនៃពាណិជ្ជកម្មជីសកល ត្រូវបានផ្អាកស្ទើរតែទាំងស្រុងនោះទេ ប៉ុន្តែក៏ដោយសារតែការកាត់បន្ថយផលិតកម្មផងដែរ។ ទិន្នន័យបង្ហាញថា ប្រទេសឥណ្ឌា ទិញជីអ៊ុយរ៉េ និងជីផូស្វាត ច្រើនជាង ៤០% ពីតំបន់មជ្ឈិមបូព៌ា។

ក្រុមហ៊ុន Qatar Energy បានបង្ខំចិត្តបញ្ឈប់ការផលិតនៅរោងចក្រផលិតជីអ៊ុយរ៉េដ៏ធំបំផុតក្នុងពិភពលោក ដោយសារតែបាត់បង់ប្រភពឧស្ម័នធម្មជាតិដែលជាវត្ថុធាតុដើម បន្ទាប់ពីក្រុមហ៊ុននេះ បានបិទការផលិតឧស្ម័ន ក្រោយមានការវាយប្រហារលើរោងចក្រផលិតកម្មឧស្ម័នធម្មជាតិរាវ (LNG) របស់ខ្លួន។ ទន្ទឹមនឹងនេះដែរ ទិន្នផលស្ពាន់ធ័រក៏ត្រូវបានកាត់បន្ថយនៅក្នុងតំបន់ផ្សេងទៀតនៃមជ្ឈិមបូព៌ាផងដែរ ដែលនាំមានកង្វះខាតកាន់តែធ្ងន់ធ្ងរ៕