នាយករដ្ឋមន្ត្រី និងជាមេបញ្ជាការកំពូល លោក Mohammed al-Sudani បានថ្លែងក្នុងអំឡុងពេលទស្សនកិច្ចរបស់លោក ទៅកាន់ទីបញ្ជាការយោធាថា អាជ្ញាធរអ៊ីរ៉ាក់ នឹងមិនអនុញ្ញាតឲ្យប្រទេសនេះ ធ្លាក់ចូលទៅក្នុងសង្គ្រាមនោះទេ។

លោក al-Sudani បានសង្កត់ធ្ងន់ថា៖«យើងនឹងមិនអត់ឱនចំពោះការប៉ុនប៉ងអូសទាញប្រទេសអ៊ីរ៉ាក់ចូលទៅក្នុងសង្គ្រាម ឬធ្វើឲ្យស្ថានការណ៍នៅក្នុងប្រទេសនេះ អស្ថិរភាពនោះទេ។ ផលប្រយោជន៍ជាតិ ត្រូវតែជាអាទិភាពទី១»។ លោកនាយករដ្ឋមន្ត្រីអ៊ីរ៉ាក់ បានចង្អុលបង្ហាញថា កងកម្លាំងសន្តិសុខនៅក្នុងខេត្តមួយចំនួនបាន «ធ្វេសប្រហែស» ក្នុងកាតព្វកិច្ចរបស់ពួកគេ ហើយបានប្រកាសបណ្តេញមន្ត្រីស៊ើបការណ៍សម្ងាត់ទាំងអស់ចេញពីទីបញ្ជាការនៅក្នុងខេត្ត Nineveh ភាគពាយ័ព្យនៃប្រទេសអ៊ីរ៉ាក់។

ទន្ទឹមនឹងនេះ ទីភ្នាក់ងារសារព័ត៌មាន INA បានរាយការណ៍ថា ជើងទម្របាញ់រ៉ូកែតមួយគ្រឿង ត្រូវបាន រឹបអូស នៅភាគខាងត្បូងខេត្ត Basra ដែលក្រុមខុសច្បាប់បានគ្រោងនឹងប្រើប្រាស់ ដើម្បីវាយប្រហារប្រទេសជិតខាង៕