នៅថ្ងៃព្រហស្បតិ៍នេះ ចិនប្រកាសទិសដៅកំណើនសេដ្ឋកិច្ចសម្រាប់ឆ្នាំ ២០២៦ ចំនួន ៤,៥-៥ភាគរយ ពោលគឺធ្លាក់ចុះតិចតួចពីកំណើន ៥ភាគរយ ដែលសម្រេចបានកាលពីឆ្នាំមុន ។

ទិសដៅកំណើននេះ ត្រូវបានប្រកាសនៅក្នុងរបាយការណ៍ការងាររដ្ឋាភិបាល បង្ហាញជូនដោយនាយករដ្ឋមន្រ្តីចិនលោក Li Qiang នៅក្នុងសភា ដែលបានបើកអង្គប្រជុំប្រចាំឆ្នាំរបស់ខ្លួននៅថ្ងៃព្រហស្បតិ៍នេះ ។

ចិនបានបញ្ចេញផងដែរផែនការរយៈពេល ៥ឆ្នាំលើកទី ១៥របស់ខ្លួន និងការវិនិយោគតាមការសន្យាលើនវានុវត្តន៍ ឧស្សាហកម្មបច្ចេកវិទ្យាខ្ពស់ ការស្រាវជ្រាវវិទ្យាសាស្រ្ត ហើយរឿងគួរឲ្យកត់សំគាល់ ប៉ុន្តែពុំច្បាស់លាស់គឺ ការកើនឡើងការប្រើប្រាស់គ្រួសារជាចំណែកមួយនៃទិន្នផលសេដ្ឋកិច្ច ។

ទិសដៅកំណើនសេដ្ឋកិច្ចនេះ បង្ហាញថា ទីក្រុងប៉េកាំងព្រួយបារម្ភថា តម្រូវការក្នុងស្រុកខ្សោយ នឹងធ្វើឲ្យប្រទេសសេដ្ឋកិច្ចធំបំផុតទី ២របស់ពិភពលោកមួយនេះ ពឹងផ្អែកខ្លាំងលើការនាំចេញសម្រាប់កំណើនសេដ្ឋកិច្ច ប៉ុន្តែពួកគេមិនចង់បោះបង់ផងដែរកិច្ចខិតខំ ធ្វើឲ្យល្អប្រសើរឡើងបណ្តុំឧស្សាហកម្មដ៏ធំធេងរបស់ខ្លួន ដែលនឹងផ្តល់នូវអានុភាពខ្សែចង្វាក់ផ្គត់ផ្គង់លើទីក្រុងវ៉ាស៊ីនតោន និងសម្ព័ន្ធមិត្តរបស់ខ្លួន នៅពេលដែលការប្រកួតប្រជែងកាន់តែតានតឹងខ្លាំង ។

ក្រុមសេដ្ឋវិទូនិយាយថា ទិសដៅកំណើនសេដ្ឋកិច្ចទាបបែបនេះ នឹងផ្តល់ទីក្រុងប៉េកាំងនូវភាពបត់បែនច្រើនជាងមុន ដើម្បីអនុវត្តការកំណែទម្រង់ ដូចជាការកាត់បន្ថយសមត្ថភាពលើសឧស្សាហកម្ម ប៉ុន្តែពួកគេព្រមានថា ការផ្លាស់ប្តូរនេះមិនមានន័យថា ជាការចាកចេញពីគំរូកំណើនសេដ្ឋកិច្ចផ្តោតលើផលិតកម្មរបស់ខ្លួននោះឡើយ ៕