ក្រុមហេសបូឡា Kataeb នៅប្រទេសអ៊ីរ៉ាក់ដែលគាំទ្រដោយអ៊ីរ៉ង់ បាននិយាយនៅថ្ងៃព្រហស្បតិ៍នេះថា មេបញ្ជាការម្នាក់របស់ខ្លួន ត្រូវបានសម្លាប់ នៅក្នុងការវាយប្រហារមួយនៅភាគខាងត្បូងប្រទេសនេះ កាលពីថ្ងៃពុធ។

លោក Ahmad Al-Hamidawi អគ្គលេខាធិការនៃក្រុមប្រដាប់អាវុធនេះ បានកាន់ទុក្ខនៅក្នុងសេចក្តីថ្លែងការណ៍មួយចំពោះការបាត់បង់ «មេបញ្ជាការដ៏អស្ចារ្យ» គឺលោក Ali Hussein Al-Freiji ដែលបានចូលរួមជាមួយក្រុមនេះ ជាងពីរទសវត្សរ៍ហើយនោះ។

ប្រភពពីរពីក្រុមនេះ បានប្រាប់សារព័ត៌មាន AFP កាលពីថ្ងៃពុធថា ការវាយប្រហារមួយ បានត្រូវចំយានយន្តមួយគ្រឿង នៅជិតមូលដ្ឋានសំខាន់របស់ក្រុមនេះនៅភាគខាងត្បូងប្រទេសអ៊ីរ៉ាក់ ដោយបានសម្លាប់យុទ្ធជនពីរនាក់។

ចំនួនអ្នកស្លាប់ បានកើនឡើងដល់បីនាក់ ក្នុងនោះមានមេបញ្ជាការរូបនេះផងដែរ។

ប្រភពមួយបានពិពណ៌នាអំពីការវាយប្រហារនេះថា ជា «ការវាយប្រហាររបស់អ៊ីស្រាអែល និងអាមេរិក»។

មូលដ្ឋានទ័ព Jurf Al-Nasr របស់ក្រុមនេះ គឺជាគោលដៅវាយប្រហារដំបូងរបស់អ៊ីរ៉ាក់ ដែលត្រូវបានស្តីបន្ទោសទៅលើអ៊ីស្រាអែល និងសហរដ្ឋអាមេរិក ដែលក្រោយមកបានពង្រីកដល់តំបន់ផ្សេងទៀត។

ចាប់តាំងពីការចាប់ផ្តើមនៃសង្គ្រាមមក ការវាយប្រហារទាំងនោះ បានសម្លាប់យុទ្ធជនចំនួន ១៥នាក់ ភាគច្រើនមកពីក្រុមហេសបូឡា Kataeb៕