តាកែវ ៖ លទ្ធផលតេស្តលើកទី១ លើមនុស្សជាង១០០នាក់ ដែលបានចូលរួមក្នុងពិធីមង្គលការ នៅភូមិក្រាំងលាវ ឃុំរវៀង ស្រុកសំរោង ខេត្តតាកែវ គឺអវិជ្ជមានទាំងអស់ តែពួកគេនឹងត្រូវយកសំណាកពីរដងទៀត ដើម្បី បញ្ជាក់ច្បាស់ថា ពួកគេ មិនមានឆ្លងកូវីដ-១៩នោះទេ។
លោកវេជ្ជបណ្ឌិត នុត ស៊ីណាត ប្រធានមន្ទីរសុខាភិបាលខេត្តតាកែវ បានប្រាប់BTVថា សំណាក របស់មនុស្សចំនួន១០១នាក់ ដែលជាអ្នកប៉ះពាល់ផ្ទាល់ជាមួយអ្នកផ្ទុកកូវីដ-១៩ ដែលបានចូលរួមពិធី មង្គលការនៅក្នុងស្រុកសំរោង កាលពីចុងសប្ដាហ៍មុននោះ ត្រូវបានធ្វើវិភាគរួចរាល់លើកទី១ ដោយបាន បង្ហាញលទ្ធផលអវិជ្ជមានកូវីដ-១៩ តែទោះបីជាយ៉ាងណា មន្ត្រីសុខាភិបាល នឹងបន្តយកសំណាកពួកគេ ពីរដងទៀត ដើម្បីអោយច្បាស់ថា ពួកគេឆ្លងជំងឺកូវីដ១៩ ឬយ៉ាងណា។
លោក បានបញ្ជាក់ថា បើទោះបីជាលទ្ធផលអវិជ្ជមានយ៉ាងណាក៏ដោយ ក៏អ្នកប៉ះពាល់ផ្ទាល់ទាំង នេះ ត្រូវដាក់ឱ្យធ្វើចត្តាឡីស័ក បន្តទៅទៀត ហើយអ្នកប៉ះពាល់ដោយប្រយោលជិត៥រយនាក់ ដែលបាន ចូលរួមពិធីមង្គលការនេះដែរ ក៏ត្រូវបានមន្ត្រីសុខាភិបាល និងអាជ្ញាធរ ណែនាំឱ្យធ្វើចត្តាឡីស័កបន្តទៀត ផងដែរ។
កាលពីថ្ងៃទី១១ និងថ្ងៃទី១២ ខែមីនា នេះ បុគ្គលភេទទីបីម្នាក់ បានទៅចូលរួមពិធីមង្គលការមិត្ត ភក្តិរបស់ខ្លួន នៅក្នុងភូមិក្រាំងលាវ ឃុំរវៀង ស្រុកសំរោង ខេត្តតាកែវ ដែលពិធីមង្គលការនេះ មានអ្នកចូល រួមប្រមាណ៣០០នាក់។ បន្ទាប់ពីបានចូលរួមមង្គលការបានពីរថ្ងៃ ដោយមានអាការៈ មិនស្រួល បុគ្គលនេះ បានទៅធ្វើតេស្តរកជំងឺកូវីដ-១៩ ហើយលទ្ធផល គឺវិជ្ជមាន។
បន្ទាប់ពីទទួលបានដំណឹងវិជ្ជមាននេះ អាជ្ញាធរខេត្តតាកែវ បានរកឃើញអ្នកពាក់ព័ន្ធផ្ទាល់ និងប្រយោលជាមួយបុគ្គលនេះ ជិត៥រយនាក់ និងបានយកសំណាកពួកគេទៅពិនិត្យរកជំងឺកូវីដ១៩ ហើយ អាជ្ញាធរ ក៏បិទភូមិក្រាំងលាវ និងបានបន្តបិទសាលារៀន នៅក្នុងឃុំចំនួន២ របស់ស្រុកបាទី និងស្រុកសំរោង ផងដែរ ដើម្បីទប់ស្កាត់ការរីករាលដាលជំងឺកូវីដ១៩ ឆ្លងចូលសហគមន៍៕
អត្ថបទ៖ គុជ វិភាគ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
