យោធាបារាំង បានឲ្យដឹងនៅថ្ងៃព្រហស្បតិ៍ (ទី៥ ខែមីនា ឆ្នាំ២០២៦) នេះថា ប្រទេសបារាំងបានអនុញ្ញាតឲ្យយន្តហោះអាមេរិកចុះចតនៅមូលដ្ឋានមួយចំនួនរបស់ខ្លួន នៅក្នុងតំបន់មជ្ឈិមបូព៌ា បន្ទាប់ពីការវាយប្រហាររបស់សហរដ្ឋអាមេរិក-អ៊ីស្រាអែលលើអ៊ីរ៉ង់ បានបង្កឲ្យមានជម្លោះក្នុងតំបន់នេះ។

អ្នកនាំពាក្យរបស់អគ្គសេនាធិការយោធា បានប្រាប់សារព័ត៌មាន AFP ថា៖ «ជាផ្នែកមួយនៃទំនាក់ទំនងរបស់យើងជាមួយសហរដ្ឋអាមេរិក វត្តមានយន្តហោះរបស់ពួកគេ ត្រូវបានអនុញ្ញាតជាបណ្តោះអាសន្នឲ្យចុះចតនៅមូលដ្ឋានរបស់យើង នៅក្នុងតំបន់នេះ។ យន្តហោះទាំងនេះរួមចំណែកដល់ការការពារដៃគូរបស់យើងនៅឈូងសមុទ្រ»។

បារាំងមានមូលដ្ឋានទ័ពអាកាស នៅអេមីរ៉ាតអារ៉ាប់រួម និងយន្តហោះដែលឈរជើង នៅហ្ស៊កដានី ក៏ដូចជាមូលដ្ឋានទ័ពអាកាស នៅខាងក្រៅតំបន់ ក្នុងប្រទេសជីប៊ូទី។

ប្រធានាធិបតីបារាំង លោក Emmanuel Macron កាលពីថ្ងៃអង្គារ បាននិយាយថា ប្រតិបត្តិការយោធារវាងសហរដ្ឋអាមេរិក-អ៊ីស្រាអែលនៅអ៊ីរ៉ង់ ចាប់តាំងពីថ្ងៃសៅរ៍ចុងសប្ដាហ៍កន្លងមក ត្រូវបានធ្វើឡើង «នៅខាងក្រៅច្បាប់អន្តរជាតិ»។ ប៉ុន្តែលោកបានដាក់ការស្តីបន្ទោសចម្បងទៅលើសាធារណរដ្ឋឥស្លាម ចំពោះការធ្វើឲ្យកើតមានជម្លោះនេះ ដែលបានរីករាលដាលដល់ផ្នែកផ្សេងទៀតនៃតំបន់មជ្ឈិមបូព៌ា៕