អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរេស (Antonio Guterres) កាលពីថ្ងៃព្រហស្បតិ៍ បានអំពាវនាវឲ្យមេដឹកនាំពិភពលោកបញ្ឈប់ការប្រណាំងប្រជែងសព្វាវុធ និងវិនិយោគលើស្ថាបត្យកម្មនៃសន្តិភាព មិនមែនឧបករណ៍នៃសង្គ្រាមទេ។

លោក ហ្គុយតឺរេស បានព្រមាននៅក្នុងសាររបស់លោកសម្រាប់ទិវាអន្តរជាតិសម្រាប់ការយល់ដឹងអំពីការរំសាយអាវុធ និងមិនរីកសាយអាវុធថា «ក្តីស្រមៃរបស់យើងអំពីសន្តិភាព កំពុងស្ថិតក្នុងស្ថានភាពគ្រោះថ្នាក់»។

លោកបានថ្លែងថា៖ «ការគំរាមកំហែងនៃការប្រើប្រាស់អាវុធនុយក្លេអ៊ែរ គឺខ្ពស់បំផុតក្នុងរយៈពេលប៉ុន្មានទសវត្សរ៍នេះ» ដោយភាពតានតឹងទូទាំងពិភពលោក បានជំរុញឲ្យការចំណាយលើយោធាដល់កម្រិតខ្ពស់បំផុត អាវុធធុនតូច និងអាវុធស្រាល កំពុងរីកសាយភាយ និងបច្ចេកវិទ្យាថ្មីៗ ធ្វើឲ្យជម្លោះកាន់តែសាហាវឡើង។

លោកប្រមុខUN បានជំរុញឲ្យសហគមន៍អន្តរជាតិបន្ថយសីតុណ្ហភាព និងក្រុមមេដឹកនាំពិភពលោកឲ្យដកថយពីស្ថានភាពដ៏គ្រោះថ្នាក់នេះ។ លោកបាននិយាយថា៖«សូមបញ្ឈប់ការគំរាមកំហែងដោយប្រើអាវុធនុយក្លេអ៊ែរ និងបញ្ឈប់ការប្រណាំងប្រជែងសព្វាវុធ»។

លោក ហ្គុយតឺរេស បានសង្កត់ធ្ងន់ថា៖«ដល់ពេលត្រូវវិនិយោគលើស្ថាបត្យកម្មនៃសន្តិភាព មិនមែនឧបករណ៍នៃសង្គ្រាមទេ» ដែលមានន័យថា រស់នៅតាមកាតព្វកិច្ចរំសាយអាវុធ ការកសាងទំនុកចិត្តឡើងវិញ និងពង្រឹងប្រព័ន្ធ និងឧបករណ៍ដែលទប់ស្កាត់ការរីកសាយភាយ ការសាកល្បង និងការប្រើប្រាស់អាវុធប្រល័យលោក។

លោកបានថ្លែងថា៖««រួបរួមគ្នា យើងអាចទប់ស្កាត់គ្រោះមហន្តរាយ និងធានាបាននូវពិភពលោកដ៏មានសុវត្ថិភាព និងសន្តិភាពសម្រាប់ទាំងអស់គ្នា»៕