រដ្ឋមន្ត្រីក្រសួងការពារជាតិសហរដ្ឋអាមេរិក លោក Pete Hegseth បាននិយាយកាលពីថ្ងៃព្រហស្បតិ៍ថា សហរដ្ឋអាមេរិក មិនបានពង្រីកគោលបំណងយោធារបស់ខ្លួន នៅក្នុងប្រទេសអ៊ីរ៉ង់ទេ បន្ទាប់ពីលោកប្រធានាធិបតី ដូណាល់ ត្រាំ បានប្រាប់សារព័ត៌មានថា សហរដ្ឋអាមេរិក ត្រូវតែចូលរួមក្នុងការជ្រើសរើសមេដឹកនាំបន្ទាប់របស់ប្រទេសនេះ។

នៅដើមសប្តាហ៍នេះ មន្ទីរបញ្ចកោណ បាននិយាយថា យុទ្ធនាការយោធា ដែលត្រូវបានគេស្គាល់ថា ជា ប្រតិបត្តិការ Epic Fury គឺផ្តោតលើការបំផ្លាញមីស៊ីលវាយប្រហាររបស់អ៊ីរ៉ង់ ការផលិតមីស៊ីល និងកងទ័ពជើងទឹក ខណៈពេលដែលមិនអនុញ្ញាតឲ្យទីក្រុងតេអេរ៉ង់មានអាវុធនុយក្លេអ៊ែរនោះ។

លោកបានបន្ថែមថា លោក ត្រាំ «កំពុងមានសិទ្ធិអំណាចក្នុងការសម្រេចថាតើអ្នកណាដឹកនាំប្រទេសអ៊ីរ៉ង់ ដោយសារប្រតិបត្តិការដែលកំពុងដំណើរការ»។

នៅក្នុងបទសម្ភាសន៍តាមទូរស័ព្ទជាមួយសារព័ត៌មានរ៉យទ័រ កាលពីថ្ងៃព្រហស្បតិ៍ លោក ត្រាំ បាននិយាយថា សហរដ្ឋអាមេរិក នឹងត្រូវជួយជ្រើសរើសមនុស្សបន្ទាប់ ដើម្បីដឹកនាំប្រទេសនេះ។ យុទ្ធនាការយោធារបស់សហរដ្ឋអាមេរិក និងអ៊ីស្រាអែល ដែលបានចាប់ផ្តើមនៅថ្ងៃសៅរ៍ (ទី២៨ ខែកុម្ភៈ) បានវាយប្រហារគោលដៅនៅទូទាំងប្រទេសនេះ និងបង្កឲ្យមានការវាយប្រហារសងសឹករបស់អ៊ីរ៉ង់ នៅក្នុងតំបន់ ខណៈដែលទីក្រុងតេអេរ៉ង់ កំពុងស្វែងរកការដាក់បន្ទុកធ្ងន់ធ្ងរលើសហរដ្ឋអាមេរិក អ៊ីស្រាអែល និងសម្ព័ន្ធមិត្តរបស់ពួកគេ៕