ប្រធានាធិបតីអេហ្ស៊ីប លោក Abdel Fattah El-Sisi បាននិយាយកាលពីថ្ងៃព្រហស្បតិ៍ថា ប្រទេសរបស់លោក កំពុងស្ថិតក្នុង «ស្ថានភាពជិតដល់គ្រាអាសន្ន»ផ្នែកសេដ្ឋកិច្ច ដែលបណ្តាលមកពីសង្គ្រាមមជ្ឈិមបូព៌ា ដោយព្រមានអំពីអតិផរណាដែលកើនឡើងខ្ពស់។

ប្រទេសដែលមានប្រជាជនច្រើនបំផុតរបស់ពិភពលោកអារ៉ាប់នេះ មិនទាន់រងផលប៉ះពាល់ជាក់ស្តែង ដោយសង្គ្រាមរបស់សហរដ្ឋអាមេរិក និងអ៊ីស្រាអែលជាមួយអ៊ីរ៉ង់ ដែលបានឃើញការវាយប្រហារលើសម្ព័ន្ធមិត្តឈូងសមុទ្រដ៏មានទ្រព្យសម្បត្តិរបស់អេហ្ស៊ីប និងធ្វើឲ្យពាណិជ្ជកម្មជាប់គាំងតាមរយៈច្រកសមុទ្រ Hormuz ដ៏សំខាន់នោះទេ។

ប៉ុន្តែនៅពេលបិទអាជីវកម្មកាលពីថ្ងៃព្រហស្បតិ៍ ប្រាក់ផោនអេហ្ស៊ីប បានធ្លាក់ចុះដល់កម្រិតទាបបំផុត ក្នុងរយៈពេល ៨ខែ ធៀបនឹងប្រាក់ដុល្លារអាមេរិក ដោយជួញដូរនៅ ៥០,២ ក្នុងមួយដុល្លារអាមេរិក ក្នុងចំណោមរបាយការណ៍អំពីលំហូរចេញនៃការវិនិយោគរយៈពេលខ្លី។

សេដ្ឋកិច្ចដែលពឹងផ្អែកលើការនាំចូលរបស់ប្រទេសអេហ្ស៊ីប បានបង្ហាញពីការប្រែប្រួលយ៉ាងខ្លាំងនៃរូបិយ   ប័ណ្ណ ដែលបានបាត់បង់តម្លៃពីរភាគបី ចាប់តាំងពីឆ្នាំ ២០២២។

នៅក្នុងព្រឹត្តិការណ៍មួយនៅសាលាយោធា លោក El-Sisi បាននិយាយថា៖«វិបត្តិបច្ចុប្បន្ន អាចមានផលវិបាកខ្លះទៅលើតម្លៃ» ដោយព្រមានថា ពាណិជ្ជករដែលដំឡើងថ្លៃ អាចត្រូវបានកាត់ទោស «នៅតុលាការយោធា»។ នេះបើយោងតាមសេចក្តីថ្លែងការណ៍មួយពីអ្នកនាំពាក្យរបស់លោក៕