ប្រធានាធិបតីអាមេរិក លោក ដូណាល់ ត្រាំ (Donald Trump) បានលើកទឹកចិត្តកងកម្លាំងឃើដអ៊ីរ៉ង់ នៅអ៊ីរ៉ាក់ ឲ្យបើកការវាយប្រហារប្រឆាំងនឹងអ៊ីរ៉ង់ ខណៈដែលជម្លោះនៅមជ្ឈិមបូព៌ាកាន់តែរីករាលដាលធំឡើង ដោយអាស៊ែរបៃហ្សង់ព្រមានថា ខ្លួននឹងសងសឹកចំពោះការវាយប្រហារដោយមីស៊ីលរបស់ទីក្រុងតេ អេរ៉ង់។ 

អ៊ីស្រាអែលបាននិយាយនៅថ្ងៃសុក្រនេះថា ខ្លួនបានចាប់ផ្តើមរលកវាយប្រហារ «ទ្រង់ទ្រាយធំ» ប្រឆាំងនឹងគោលដៅហេដ្ឋារចនាសម្ព័ន្ធនៅទីក្រុងតេអេរ៉ង់ ខណៈដែលទីក្រុងឈូងសមុទ្រ នៅបន្តរងការវាយប្រហារ ដោយអ៊ីរ៉ង់។

ឥឡូវនេះ សង្គ្រាមរយៈពេល ៧ថ្ងៃ បានឃើញអ៊ីរ៉ង់វាយប្រហារអ៊ីស្រាអែល រដ្ឋឈូងសមុទ្រ ប្រទេសកោះ  ស៊ីប ទួរគី និងអាស៊ែរបៃហ្សង់ ហើយរីករាលដាលដល់មហាសមុទ្រឥណ្ឌា នៅឆ្នេរសមុទ្រស្រីលង្កា ជាកន្លែងដែលនាវាមុជទឹកអាមេរិក បានវាយប្រហារពន្លិចនាវាកងទ័ពជើងទឹកអ៊ីរ៉ង់។

ចំពោះលទ្ធភាពនៃកងកម្លាំងឃើដអ៊ីរ៉ង់ចូលទៅក្នុងប្រទេសអ៊ីរ៉ង់ លោក ត្រាំ បានប្រាប់សារព័ត៌មាន  រ៉យទ័រនាថ្ងៃព្រហស្បតិ៍ថា៖«ខ្ញុំគិតថា វាពិតជាអស្ចារ្យណាស់ដែលពួកគេចង់ធ្វើបែបនោះ ខ្ញុំនឹងគាំទ្រពួកគេយ៉ាងពេញទំហឹង»។

ប្រភពសន្តិសុខ បាននិយាយថា ការវាយប្រហារដោយយានដ្រូនរបស់អ៊ីរ៉ង់ចំនួនពីរ បានកំណត់គោលដៅជំរំប្រឆាំងអ៊ីរ៉ង់មួយ នៅក្នុងតំបន់ឃើដឌីស្តង់អ៊ីរ៉ាក់ កាលពីថ្ងៃព្រហស្បតិ៍៕