ប្រដាល់សកល៖ ក្រុមកីឡាប្រដាល់សកលជម្រើសជាតិកម្ពុជា ៤រូបរួមមានកីឡាករ ៣នាក់ និងគ្រូបង្វឹកម្នាក់នឹងត្រូវចេញទៅបោះជុំរុំហ្វឹកហាត់ ក៏ដូចជាចូលរួមប្រកួតលក្ខណៈអន្ដរជាតិនៅប្រទេសថៃនាថ្ងៃទី២៦ ខែមីនានេះរហូតដល់ថ្ងៃទី១០ ខែមេសាខាងមុខ។
មុនចាកចេញពីមាតុភូមិកាលពីថ្ងៃទី២៤ ខែមីនាម្សិលមិញ លោក ប៊ុយ សុភ័ណ្ឌ អគ្គលេខាធិការសហព័ន្ធកីឡាប្រដាលសកលកម្ពុជាបានកោះប្រជុំ និងជួបសំណេះសំណាលជាមួយគ្រូបង្វឹក និងកីឡាករទាំង ៣រូបព្រមទាំងផ្ដល់នូវការឧបត្ថម្ភលើកទឹកចិត្តទាំងសម្ភារៈ និងថវិកាមួយចំនួនទៀតផង។ អគ្គលេខាធិការសហព័ន្ធដដែលបានបញ្ជាក់ថា ការកោះប្រជុំនេះ ទី១-ដើម្បីធ្វើការពិនិត្យឯកសារសំខាន់ៗសម្រាប់ចូលរួមប្រកួត និងធ្វើដំណើរ ក៏ដូចជាធ្វើការណែនាំអំពីនីតិវិធីធ្វើការហោះហើរ និងការប្រកួត ហើយក៏ពាំនាំនូវការផ្តាំផ្ញើរសួរសុខទុក្ខពីថ្នាក់ដឹកនាំសហព័ន្ធផងដែរ។ ទី២-ការឧបត្ថម្ភសម្ភារៈហ្វឹកហាត់ និងថវិកាលើកទឹកចិត្ដ។ ចំពោះថវិកាឧបត្ថម្ភរួមមានឯកឧត្តម ម៉ម ប៊ុននាង ប្រធានកិត្តិយសសហព័ន្ធបានឧបត្ថម្ភម្នាក់ៗ ៣០ម៉ឺនរៀល ស្របពេលលោក តាវ ម៉េងហួរ អនុប្រធានកិត្តិយសសហព័ន្ធ ឧបត្ថម្ភក្នុងម្នាក់ៗ ៤០ម៉ឺនរៀល រួមទាំងលោក ប៊ុយ សុភ័ណ្ឌ ផ្ទាល់ ក៏បានឧបត្ថម្ភក្នុងម្នាក់ៗ ៣០ម៉ឺនរៀលផងដែរ។ សរុបកីឡាករ និងគ្រូក្នុងម្នាក់ៗទទួលបាន ១លានរៀល។ លើសពីនេះក៏មានថ្នាក់ដឹកនាំ និងសប្បុរសជនមួយចំនួនបានចូលរួមឧបត្ថម្ភក្នុងនោះក៏មានម្ចាស់ផ្ទះថៃផងដែរ។
សម្រាប់បេក្ខភាពកីឡាករ ៣រូបដែលត្រៀមចេញទៅបោះជុំរុំហ្វឹកហាត់នៅថៃស្អែកនេះ រួមមានកីឡាករ សៅ រង្ស៊ី (ទម្ងន់ ៥៧គីឡូក្រាម) កីឡាករ ទូច ដេវីត (ទម្ងន់ ៦០គីឡូក្រាម) និងកីឡាករ វី សុភ័ស (ទម្ងន់ ៦៩គីឡូក្រាម) ក្រោមការដឹកនាំរបស់លោកគ្រូបង្វឹកម្នាក់គឺលោក ជ័យ ណារ៉ា។ ការបោះជុំរុំហ្វឹកហាត់នេះមានរយៈពេល ៦ថ្ងៃចាប់ពីថ្ងៃទី២៦-៣១ ខែមីនា ឆ្នាំ២០២២ មុនបន្ដចូលរួមប្រកួតក្នុងព្រឹត្តិការណ៍ Thailand Open International Boxing Tournament 2022 ចាប់ពីថ្ងៃទី០១ ដល់ថ្ងៃទី១០ ខែមេសា។ លោក ប៊ុយ សុភ័ណ្ឌ បានបញ្ជាក់ថា ការចូលរួមបោះជំរុំហ្វឹកហាត់ និងប្រកួតនៅថៃនេះគឺជាឱកាសដ៏សំខាន់ សម្រាប់ក្រុមជម្រើសជាតិប្រដាល់សកលក្នុងការពង្រឹង និងវាស់វែងកម្រិតបច្ចេកទេសរបស់ពួកគេ ដើម្បីត្រៀមខ្លួនចូលរួមការប្រកួតកីឡាស៊ីហ្គេមលើកទី៣១ ឆ្នាំ២០២២ នៅវៀតណាមចាប់ពីថ្ងៃទី១២ ដល់ថ្ងៃទី២៣ ខែឧសភា ឆ្នាំ២០២២ ខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
