ប្រធានាធិបតីអាមេរិក លោក Donald Trump ដែលបានថ្លែងទៅកាន់សមាជិកសភាគណបក្សសាធារណរដ្ឋដោយផ្ទាល់ កាលពីថ្ងៃចន្ទ (ទី៩ ខែមីនា ឆ្នាំ២០២៦) បានជំរុញឲ្យអ្នកទាំងនោះអនុវត្តច្បាប់រឹតបន្តឹងការបោះឆ្នោតថ្មីយ៉ាងទូលំទូលាយ ជាមធ្យោបាយ ដើម្បី «ធានា» ជ័យជម្នះ នៅក្នុងការបោះឆ្នោតពាក់កណ្ដាលអាណត្តិ នាខែវិច្ឆិកា ដោយបានបញ្ជាក់ថា លោកនឹងបដិសេធមិនចុះហត្ថលេខាលើសេចក្ដីព្រាងច្បាប់ថ្មីឲ្យក្លាយជាច្បាប់ជាធរមាន រហូតដល់ពួកគេអនុវត្តកិច្ចការនោះ។

ច្បាប់ស្តីពីការការពារសិទ្ធិបោះឆ្នោតជនជាតិអាមេរិក (SAVE) នឹងដាក់ការរឹតបន្តឹងការបោះឆ្នោតថ្មី ក្នុងនោះរួមទាំងការតម្រូវឲ្យផ្ដល់ភស្តុតាងសញ្ជាតិ សម្រាប់អ្នកដែលចុះឈ្មោះបោះឆ្នោត។ វាបានលេចឡើងជាលើកដំបូង កាលពី ២ឆ្នាំមុន ដើម្បីឆ្លើយតបទៅនឹងការអះអាងមិនពិតរបស់លោក Trump ដែលថា ប្រជាជនក្នុងប្រទេសនេះ បានបោះឆ្នោតដោយខុសច្បាប់នៅក្នុងការបោះឆ្នោតអាមេរិក។

អំឡុងពេលមានជួបជុំ នៅឯក្លឹបវាយកូនហ្គោល Doral របស់លោក ក្នុងទីក្រុង Miami ដើម្បីពិភាក្សាអំពីរបៀបវារៈនីតិបញ្ញត្តិរបស់លោកប្រធានាធិបតី មេដឹកនាំអាមេរិករូបនេះបានប្រាប់សមាជិកសភាគណបក្សសាធារណរដ្ឋថា៖ «វា (ការឹតបន្តឹង) នឹងធានាដល់ការបោះឆ្នោតពាក់កណ្ដាលអាណត្តិ។ បើអ្នកមិនយល់ទេនោះ នេះគឺជាបញ្ហាធំណាស់ តាមការយល់ឃើញរបស់ខ្ញុំ» ។

គណបក្សសាធារណរដ្ឋរបស់លោក កំពុងឆ្ពោះទៅរកការធ្វើយុទ្ធនាការដែលប្រឈមនឹងផលប៉ះពាល់ផ្នែកនយោបាយ ហើយអ្នកវិភាគ លើកឡើងថា ក្រុមនេះអាចនឹងជួបការលំបាក ក្នុងការរក្សាសំឡេងភាគច្រើនស្ដួចស្ដើងរបស់ខ្លួន នៅក្នុងសភា ខណៈដែលគណបក្សប្រជាធិបតេយ្យទាញយកផលពីការមិនពេញចិត្តរបស់អ្នកបោះឆ្នោត ពាក់ព័ន្ធនឹងបញ្ហាសេដ្ឋកិច្ច។

ច្បាប់រឹតបន្តឹងនេះនឹងតម្រូវឲ្យជនជាតិអាមេរិកបញ្ជាក់ពីសញ្ជាតិរបស់ពួកគេ នៅពេលចុះឈ្មោះបោះឆ្នោត និងបង្ហាញអត្តសញ្ញាណប័ណ្ណដែលមានរូបថតមុនពេលបោះឆ្នោត។ វាក៏នឹងរឹតបន្តឹងការប្រើប្រាស់សន្លឹកឆ្នោតតាមប្រៃសណីយ៍ផងដែរ។ វាគឺករណីខុសច្បាប់រួចទៅហើយ សម្រាប់អ្នកដែលមិនមែនជាពលរដ្ឋទៅបោះឆ្នោត នៅក្នុងការបោះឆ្នោតសហព័ន្ធ។ ក្រុមឯករាជ្យ ទាំងនៅខាងឆ្វេងនិយម និងខាងស្តាំនិយម ក៏ដូចជាមន្ត្រីបោះឆ្នោតរដ្ឋ បានរកឃើញថា ការបោះឆ្នោតបែបនេះកម្រកើតមានណាស់៕