អ្នកនាំពាក្យក្រសួងការបរទេសកាតានិយាយនៅថ្ងៃអង្គារនេះថា កាតាចងពង្រឹងភាពជាដៃគូរការពារជាតិរបស់ខ្លួនជាមួយសហរដ្ឋអាមេរិក ស្របពេលមានការវាយប្រហារតាមច្រកអាកាសរបស់អ៊ីរ៉ង់លើទឹកដីរបស់ពួកគេ ។

អ៊ីរ៉ង់វាយប្រហារដោយមីស៊ីល និងយានដ្រូនលើប្រទេសជិតខាងឈូងសមុទ្រផលិតប្រេងរបស់ខ្លួន ក្រោយការវាយប្រហាររបស់សហរដ្ឋអាមេរិក-អ៊ីស្រាអែល បានសម្លាប់មេដឹកនាំកំពូលៗរបស់ពួកគេ ។ ជម្លោះមួយនេះ បានបង្អាក់ដល់ទិន្នផលប្រេងក្នុងតំបន់ ហើយនិងធ្វើឲ្យតម្លៃប្រេងឡើងថ្លៃ ។

កាតាមានមូលដ្ឋានទ័ពធំបំផុតរបស់សហរដ្ឋអាមេរិកនៅមជ្ឈិមបូព៌ា គឺមូលដ្ឋានទ័ពអាកាស Al Udeid ដែលរងការវាយប្រហារពីអ៊ីរ៉ង់ អំឡុងសង្រ្គាមដែលបានផ្ទុះឡើងកាលពីថ្ងៃទី ២៨ ខែមីនា ។

អ្នកនាំពាក្យក្រសួងការបរទេសកាតាលោក Majed Al Ansari និយាយប្រាប់សន្និសីទសារព័ត៌មាននាថ្ងៃអង្គារនេះថា ភាពជាដៃគូសន្តិសុខជាមួយសហរដ្ឋអាមេរិក មិនមែនជាសំណួរចោទនោះទេ ប៉ុន្តែកិច្ចព្រមព្រៀងរបស់ពួកគេជាមួយសហរដ្ឋអាមេរិក និងបណ្តាប្រទេសអឺរ៉ុប ត្រូវការពង្រឹង ។

កាលពីខែតុលា ឆ្នាំមុន ប្រធានាធិបតីសហរដ្ឋអាមេរិកលោក Donald Trump បានសន្យាចាត់ទុកការវាយប្រហារប្រដាប់អាវុធណាមួយលើកាតា ថាជាការគំរាមកំហែងចំពោះសន្តិសុខផ្ទាល់ខ្លួនរបស់សហរដ្ឋអាមេរិក ខណៈអ៊ីរ៉ង់សន្យាវាយប្រហារសងសឹកលើគោលដៅសហរដ្ឋអាមេរិកនៅទូទាំងតំបន់ ក្នុងករណីមានការវាយប្រហារណាមួយកើតឡើង ៕