គិតមកទល់ពេលនេះ មានរយៈពេលជិត ៤ថ្ងៃហើយ ចាប់តាំងពីអ៊ីរ៉ង់បានតែងតាំង លោក Mojtaba Khamenei ជាមេដឹកនាំកំពូលបន្ទាប់របស់ប្រទេស ប៉ុន្តែទីតាំងរបស់លោក និងស្ថានភាពរបស់លោក នៅតែស្ថិតក្នុងអាថ៌កំបាំង។ លោកមិនបានបង្ហាញខ្លួននៅចំពោះមុខអ្នកគាំទ្រ ឬចែករំលែកសុន្ទរកថាវីដេអូឡើយ។ រូបលោកផ្ទាល់ ឬការិយាល័យរបស់លោក មិនទាន់បានចេញសេចក្តីថ្លែងការណ៍ជាលាយលក្ខណ៍អក្សរនៅឡើយទេ ខណៈដែលប្រព័ន្ធផ្សព្វផ្សាយរដ្ឋបានពឹងវីដេអូបណ្ណសារ ដើម្បីណែនាំពីរូបលោក។

តាមរបាយការណ៍នៅក្នុងប្រព័ន្ធផ្សព្វផ្សាយរដ្ឋអ៊ីរ៉ង់ ឲ្យដឹងថា បព្វជិតវ័យ ៥៦ឆ្នាំរូបនេះ អាចនឹងរងរបួស អំឡុងការវាយប្រហាររបស់សហរដ្ឋអាមេរិក-អ៊ីស្រាអែល ប្រឆាំងនឹងអ៊ីរ៉ង់ដែលរបបអ៊ីរ៉ង់បានឲ្យឈ្មោះថា សង្គ្រាមរ៉មាដន (Ramadan War)។ ទូរទស្សន៍រដ្ឋអ៊ីរ៉ង់ បានសំដៅទៅរូបលោក ជា «Jaanbaz of Ramadan» ដែលមានន័យថា «អតីតយុទ្ធជនរងរបួស»។

ពិធីករ នៅលើទូរទស្សន៍រដ្ឋអ៊ីរ៉ង់ ពិពណ៌នាអំពីលោក Mojtaba Khamenei ថា ជា «Jaanbaz» ឬការរងរបួសដោយសត្រូវ នៅក្នុង «សង្គ្រាមរ៉ម៉ាដាន» ខណៈពេលដែលកំពុងរាយការណ៍ អំពីការឡើងឋានៈរបស់លោក ជាមេដឹកនាំកំពូល។ យ៉ាងណាក្ដី ពួកគេមិនបានពន្យល់លម្អិតបន្ថែមទៀត ដែលបង្កើតឲ្យមានការសង្ស័យ អំពីស្ថានភាពរាងកាយរបស់លោក ជាពិសេសដោយសារតែរូបលោកមិនត្រូវបានគេឃើញជាសាធារណៈនោះឡើយ ចាប់តាំងពីសង្គ្រាមបានចាប់ផ្តើម។

នេះអាចឲ្យយល់បាន ចំពោះការមិនមានការថ្លែងសុន្ទរកថាផ្ទាល់ ឬវីដេអូទៅកាន់ប្រជាជាតិ ប៉ុន្តែការមិនចេញសេចក្តីថ្លែងការណ៍ជាលាយលក្ខណ៍អក្សរ នៅតែជារឿងធ្វើឲ្យគ្រប់គ្នាងឿងឆ្ងល់។ ប៉ុន្តែទោះបីជាលោក Mojtaba Khamenei នៅតែមិនត្រូវបានគេមើលឃើញក៏ដោយ ក៏ព្រឹត្តិការណ៍បង្ហាញភក្ដីភាពជាសាធារណៈ នៅតែបន្តកើតមាន៕