ប្រធានាធិបតីអាមេរិកលោក Donald Trump បាននិយាយកាលពីថ្ងៃពុធ ១១មីនាសប្ដាហ៍នេះថា ការវាយប្រហារដោយយោធាប្រឆាំងអ៊ីរ៉ង់នឹងបញ្ចប់ឆាប់ៗនេះ មុនពេលបញ្ជូនសញ្ញាចម្រុះអំពីពេលវេលា ខណៈប្រធានាធិបតីអ៊ីរ៉ង់លោក Masoud Pezeshkian បានដាក់ចេញលក្ខខណ្ឌបីយ៉ាងដើម្បីបញ្ចប់ជម្លោះ។

កាលពីថ្ងៃពុធ ខណៈជម្លោះរវាងសហរដ្ឋអាមេរិក-អ៊ីស្រាអែល-អ៊ីរ៉ង់ បានចូលដល់ថ្ងៃទី១២  លោក Pezeshkian បាននិយាយនៅលើបណ្ដាញសង្គម X ថា មធ្យោបាយតែមួយគត់ ដើម្បីបញ្ចប់សង្គ្រាមគឺ «ការទទួលស្គាល់សិទ្ធិស្របច្បាប់របស់អ៊ីរ៉ង់ ការបង់ប្រាក់សំណងខូចខាត និងការធានាដល់អន្តរជាតិយ៉ាងរឹងមាំថានឹងមានការឈ្លានពាននាពេលអនាគត»។

លោកត្រូវបានគេរាយការណ៍ថាបានប្រាប់នាយករដ្ឋមន្ត្រីប៉ាគីស្ថានលោក Shehbaz Sharif តាមទូរស័ព្ទថា អ៊ីរ៉ង់មិនស្វែងរកជម្លោះជាមួយប្រទេសក្នុងតំបន់ទេ ហើយនឹងកំណត់គោលដៅតែទីតាំងដែលប្រើដើម្បីវាយប្រហារមកលើទឹកដីរបស់ខ្លួន ក្នុងសិទ្ធិស្របច្បាប់របស់ខ្លួនក្នុងការការពារខ្លួន តែប៉ុណ្ណោះ។ 

សារព័ត៌មាន Axios បានរាយការណ៍ថា លោក Trump បាននិយាយថា ប្រតិបត្តិការយោធារបស់សហរដ្ឋអាមេរិកនៅក្នុងប្រទេសអ៊ីរ៉ង់គឺជាសង្គ្រាម និងជាដំណើររយៈពេលខ្លី ដោយផ្ញើសារចម្រុះអំពីពេលវេលាដែលការវាយប្រហារនឹងបញ្ចប់ ទោះបីជាលោកបាននិយាយកាលពីថ្ងៃនោះថា ប្រតិបត្តិការយោធានឹងបញ្ចប់ ឆាប់ៗនេះ ព្រោះគ្មានគោលដៅអ្វីនៅសល់ដើម្បីវាយប្រហារទៀត ក៏ដោយ។

យោងតាមរបាយការណ៍ មន្ត្រីអាមេរិក និងអ៊ីស្រាអែល បាននិយាយថា ពួកគេកំពុងរៀបចំសម្រាប់ការវាយប្រហារយ៉ាងហោចណាស់ពីរសប្តាហ៍ទៀតនៅក្នុងប្រទេសអ៊ីរ៉ង់ ហើយថាមិនមានការណែនាំផ្ទៃក្នុងណាមួយអំពីពេលណាដែលការវាយប្រហារបែបនេះអាចបញ្ឈប់បានទេ៕