យោងតាមអាជ្ញាធរនាវាចរណ៍ និងក្រុមអ្នកវិភាគបានឱ្យដឹងថា ដ្រូនសមុទ្រ ត្រូវបានយកមកប្រើប្រាស់ក្នុងការវាយប្រហារយ៉ាងហោចណាស់ពីរលើក លើនាវាដឹកប្រេងក្នុងតំបន់ឈូងសមុទ្រ ចាប់តាំងពីសង្រ្គាមបានផ្ទុះឡើងរវាងសហរដ្ឋអាមេរិក អ៊ីស្រាអែល ទល់នឹងអ៊ីរ៉ង់ ដែលនេះបង្ហាញពីការគំរាមកំហែងថ្មីដ៏គ្រោះថ្នាក់នៅក្នុងផ្លូវដឹកជញ្ជូនដ៏សំខាន់។

ការលេចឡើងនូវការប្រើប្រាស់ «នាវាដ្រូនផ្ទុកដោយជាតិផ្ទុះ» ឬហៅថា ដ្រូនសមុទ្រ ដែលអ៊ុយក្រែនធ្លាប់ប្រើយ៉ាងមានប្រសិទ្ធភាពក្នុងសង្រ្គាមជាមួយរុស្ស៊ី បានកើតឡើងស្របពេលដែលអ៊ីរ៉ង់កំពុងគំរាមកំហែងបិទការដឹកជញ្ជូនប្រេងតាមច្រកសមុទ្រហ័រមូស ដែលជាចំណុចយុទ្ធសាស្ត្រសម្រាប់ការដឹកជញ្ជូនប្រេងចំនួនមួយភាគប្រាំរបស់ពិភពលោក។

ទីភ្នាក់ងារនាវាចរណ៍អង់គ្លេសបានឱ្យដឹងថា ការវាយប្រហារដោយដ្រូនសមុទ្រលើកដំបូង កើតឡើងនៅថ្ងៃទី១ ខែមីនា នៅពេលនាវាដឹកប្រេងឆៅឈ្មោះ MKD VYOM ត្រូវបានវាយប្រហារនៅចម្ងាយប្រហែល ៤៤ម៉ាយណត់ ម្ដុំឆ្នេរអូម៉ង់ ដែលបណ្តាលឱ្យនាវិកម្នាក់ស្លាប់។ យោងតាមក្រុមហ៊ុនតំណាងអាមេរិកផ្នែកដែនសមុទ្រ Sonangol បានឱ្យដឹងថា ប៉ុន្មានថ្ងៃក្រោយមក នាវាដ្រូនខ្នាតតូចមួយគ្រឿង បានបំបុកនាវាដឹកប្រេងឆៅដែលដោតទង់ជាតិបាហាម៉ាស់ ឈ្មោះ Sonangol Namibe ខណៈពេលកំពុងបោះយុថ្កានៅជិតកំពង់ផែ Khor al Zubair របស់អ៊ីរ៉ាក់។

លោក Robert Peters អ្នកជំនាញមកពីក្រុមហ៊ុនសន្តិសុខនាវាចរណ៍ Ambrey បាននិយាយថា លោកជឿជាក់ថាអ៊ីរ៉ង់គឺជាអ្នកទទួលខុសត្រូវចំពោះការវាយប្រហារលើនាវា Sonangol Namibe ដោយកត់សម្គាល់ថា ទីក្រុងតេអេរ៉ង់ ធ្លាប់បង្ហាញសមត្ថភាពដ្រូនសមុទ្ររបស់ខ្លួន ក្នុងការតាំងពិពណ៌យោធានាពេលកន្លងមក។ យោងតាមលោក Peters ប្រសិនបើការចូលរួមរបស់អ៊ីរ៉ង់ត្រូវបានបញ្ជាក់ នេះនឹងក្លាយជាករណីដំបូងបង្អស់ដែលសាធារណរដ្ឋអ៊ិស្លាមមួយនេះ ប្រើប្រាស់ដ្រូនសមុទ្រដោយផ្ទាល់ ដើម្បីវាយប្រហារលើនាវាពាណិជ្ជកម្ម៕