ប្រធានាធិបតីរ៉ូម៉ានី បាននិយាយថា កាលពីថ្ងៃពុធ (ទី១១ ខែមីនា ឆ្នាំ២០២៦) រ៉ូម៉ានីបានសម្រេចអនុញ្ញាតឲ្យសហរដ្ឋអាមេរិកប្រើប្រាស់មូលដ្ឋានទ័ពអាកាស នៅក្នុងប្រទេសនៅអឺរ៉ុបខាងកើត ដើម្បីចាក់ប្រេងយន្តហោះដែលពាក់ព័ន្ធនឹងសង្គ្រាមអាមេរិក-អ៊ីស្រាអែល ប្រឆាំងនឹងអ៊ីរ៉ង់។

សភាបានអនុម័តវិធានការនេះ បន្ទាប់ពីវាត្រូវបានពិនិត្យដោយក្រុមប្រឹក្សាការពារជាតិជាន់ខ្ពស់ កាលពីព្រឹកព្រលឹមថ្ងៃនោះ។ លោកប្រធានាធិបតី Nicosor Dan បានហៅវាថា ជា «ការដាក់ពង្រាយឧបករណ៍ និងកងកម្លាំងយោធាអាមេរិកជាបណ្តោះអាសន្ន នៅក្នុងប្រទេសរ៉ូម៉ានី» នៅក្នុងសេចក្តីថ្លែងការណ៍មួយ បន្ទាប់ពីមានកិច្ចប្រជុំក្រុមប្រឹក្សា។

លោក Dan បានបញ្ជាក់ថា ចំណាត់ការនេះនឹងអនុញ្ញាតឲ្យយន្តហោះចាក់ប្រេង និងការដាក់ពង្រាយឧបករណ៍ត្រួតពិនិត្យ និងទំនាក់ទំនងតាមផ្កាយរណប។ លោក Dan បាននិយាយថា៖ «នេះគឺជាឧបករណ៍ដែលលើកកម្ពស់សន្តិសុខរបស់ប្រទេសរ៉ូម៉ានី។ ខ្ញុំចង់សង្កត់ធ្ងន់ថា ឧបករណ៍នេះគឺការពារ ហើយវាមិនត្រូវបានបំពាក់ដោយអាវុធទេ»។

ប្រភពផ្លូវការមួយ បានប្រាប់សារព័ត៌មាន AFP ថា សហរដ្ឋអាមេរិកនឹងអាចប្រើប្រាស់មូលដ្ឋាន Mihail Kogalniceanu នៅជិតទីក្រុង Constanta និង Campia Turzii ភាគកណ្តាលប្រទេសរ៉ូម៉ានី សម្រាប់រយៈពេល ៩០ថ្ងៃដំបូង។ ដោយមានទីតាំងស្ថិតនៅជិតសមុទ្រខ្មៅ មូលដ្ឋានទ័ព Mihail Kogalniceanu ដែលត្រូវបានគេស្គាល់ផងដែរថា ជា «MK» មានវត្តមានយោធាអាមេរិកធំជាងគេ នៅរ៉ូម៉ានី ដែលជារដ្ឋដ៏សំខាន់មួយ នៅព្រំដែនប៉ែកខាងកើតរបស់អង្គការណាតូ (NATO)៕