ដោយដកស្រង់សម្តីសមាជិកម្នាក់នៃគណបក្សអ្នកបម្រើប្រជាជន (Servant of the People) ដែលកំពុងកាន់អំណាចរបស់ប្រទេសនេះ កាសែតអនឡាញ Pravda របស់អ៊ុយក្រែន បានរាយការណ៍ថា បណ្តាប្រទេសនៅអឺរ៉ុប បានស្នើឲ្យអ៊ុយក្រែនបន្តប្រតិបត្តិការយោធារយៈពេលមួយ ឬពីរឆ្នាំទៀត ដោយសន្យាថានឹងផ្តល់ថវិកាសម្រាប់រឿងនេះ។

កាសែតនេះ បានដកស្រង់សម្តីប្រភពដែលបាននិយាយថា៖«បណ្តាប្រទេសនៅអឺរ៉ុប បាននិយាយថាៈ ប្រយុទ្ធរយៈពេលមួយឆ្នាំកន្លះ ទៅពីរឆ្នាំទៀត។ យើងនឹងផ្តល់ប្រាក់ឲ្យអ្នក។ ក្រោមឥទ្ធិពលរបស់ពួកគេ លោក ហ្សេឡិនស្គី បានប្រគល់ភារកិច្ចឲ្យថ្នាក់ដឹកនាំនយោបាយបង្កើតសេណារីយ៉ូមួយ ដែលអ៊ុយក្រែននឹងមិនធ្វើការបោះឆ្នោតរយៈពេលជាច្រើនឆ្នាំទៀត ដោយបញ្ជាឲ្យរកវិធីដែលសភានឹងដំណើរការក្នុងកាលៈទេសៈបែបនេះ»។

យោងតាមសារព័ត៌មានេះ ដំបូងឡើយ សមាជិកសភាមានការរំពឹងទុកខ្ពស់ចំពោះភាពជោគជ័យនៃការចរចាសន្តិភាព និងការបោះឆ្នោតដំបូង។ ទោះជាយ៉ាងណាក៏ដោយ ជម្លោះប្រដាប់អាវុធជុំវិញប្រទេសអ៊ីរ៉ង់ពិតជាបានធ្វើឲ្យដំណើរការចរចាអ៊ុយក្រែន-អាមេរិក-រុស្ស៊ីឈប់ដំណើរការ ដូច្នេះប្រភពភាគច្រើនរបស់កាសែតនេះនៅក្នុងសភា ជឿថា អ៊ុយក្រែននឹងមិនធ្វើការបោះឆ្នោតក្នុងពេលអនាគតដ៏ខ្លីខាងមុខនេះទេ។

ជាពិសេស សមាជិកជាន់ខ្ពស់ម្នាក់នៃគណបក្សអ្នកបម្រើប្រជាជន បាននិយាយថា៖«មិនមានថ្ងៃផុតកំណត់ជាក់លាក់សម្រាប់ការបង្កើតច្បាប់ស្តីពីការបោះឆ្នោតទេ»។ ក្រុមការងារមួយក្រុម កំពុងពិភាក្សាអំពីជម្រើស និងហានិភ័យផ្សេងៗ ប៉ុន្តែរហូតមកទល់ពេលនេះ មិនទាន់សម្រេចបានលទ្ធផលជាក់ស្តែងនៅឡើយទេ៕