សហរដ្ឋអាមេរិក និងសម្ព័ន្ធមិត្តលោកខាងលិច បានប៉ះទង្គិចពាក្យសម្ដីយ៉ាងតានតឹងជាមួយរុស្ស៊ី និងចិន កាលពីថ្ងៃព្រហស្បតិ៍ (១២ មីនា) ពាក់ព័ន្ធនឹងបំណងនុយក្លេអ៊ែររបស់អ៊ីរ៉ង់ ខណៈទីក្រុងវ៉ាស៊ីនតោន បានព្យាយាមស្វែងរកហេតុផលបន្ថែមទៀតប្រាប់ទៅកាន់អង្គការសហប្រជាជាតិ ដើម្បីបង្ហាញពីភាពត្រឹមត្រូវនៃសង្រ្គាមដែលខ្លួនបានចាប់ផ្តើមលើអ៊ីរ៉ង់ កាលពីពីរសប្តាហ៍មុន។

នៅក្នុងកិច្ចប្រជុំនៃក្រុមប្រឹក្សាសន្តិសុខអង្គការសហប្រជាជាតិ ដែលមានសមាជិក ១៥ប្រទេស ដោយក្នុងនោះមានសហរដ្ឋអាមេរិកគឺជាប្រធានក្នុងខែមីនានេះ រុស្ស៊ីនិងចិន បានព្យាយាមប៉ុន្តែមិនបានសម្រេច ក្នុងការរារាំងកិច្ចពិភាក្សាអំពីគណៈកម្មាធិការមួយ ដែលបង្កើតឡើងដើម្បីត្រួតពិនិត្យ និងអនុវត្តទណ្ឌកម្មរបស់អង្គការសហប្រជាជាតិលើអ៊ីរ៉ង់។ សំណើរបស់ចិននិងរុស្ស៊ីនោះ ត្រូវបានច្រានចោលដោយលទ្ធផលបោះឆ្នោត ១១ទល់នឹង ២សំឡេង ខណៈ ២សំឡេងទៀតអនុប្បវាទ។

ថ្លែងទៅកាន់ក្រុមប្រឹក្សា ប្រេសិតអាមេរិកប្រចាំ UN លោក Mike Waltz បានចោទទីក្រុងមូស្គូ និងទីក្រុងប៉េកាំងថា ព្យាយាមការពារទីក្រុងតេអេរ៉ង់ ដោយរារាំងការងាររបស់ «គណៈកម្មាធិការដែលបង្កើតក្រោមសេចក្ដីសម្រេចលេខ ១៧៣៧»។ ចក្រភពអង់គ្លេស និងបារាំង បានប្រាប់ក្រុមប្រឹក្សាសន្តិសុខថា ការដាក់ទណ្ឌកម្មឡើងវិញលើអ៊ីរ៉ង់ គឺជារឿងដ៏ត្រឹមត្រូវ ដោយសារបរាជ័យរបស់ទីក្រុងតេអេរ៉ង់ ក្នុងការដោះស្រាយកង្វល់អំពីកម្មវិធីនុយក្លេអ៊ែររបស់ខ្លួន។

អគ្គរដ្ឋទូតរុស្ស៊ីប្រចាំ UN បានចោទបកទៅអាមេរិក និងសម្ព័ន្ធមិត្តវិញថា បានបង្ក «ភាពភ័យស្លន់ស្លោជុំវិញផែនការដែលត្រឹមតែជាការសន្មតថា អ៊ីរ៉ង់ចង់បានអាវុធនុយក្លេអ៊ែរ» ហើយមិនដែលត្រូវបានបញ្ជាក់ដោយរបាយការណ៍របស់ទីភ្នាក់ងារ IAEA នោះទេ។ តំណាងរបស់ចិន លោក Fu Cong បានហៅទីក្រុងវ៉ាស៊ីនតោនថាជា «អ្នកញុះញង់» នៃវិបត្តិនុយក្លេអ៊ែរអ៊ីរ៉ង់ ហើយនិយាយថា អាមេរិកបាន «ប្រើកម្លាំងបាយយ៉ាងគំហុកប្រឆាំងនឹងអ៊ីរ៉ង់ទាំងដែលការចរចាកំពុងបន្តនៅឡើយ ដែលធ្វើឱ្យកិច្ចប្រឹងប្រែងផ្នែកការទូតក្លាយជាអសារបង់»៕