BTV NEWS

សម្តេចតេជោ ហ៊ុន សែន ជួបពិភាក្សាការងារតាមប្រព័ន្ធវីដេអូជាមួយប្រធានរដ្ឋសភា អាស៊ែបៃហ្សង់

គណៈប្រតិភូនៃសន្និសីទប្រធានសភានៃអន្តរសភា វាយតម្លៃខ្ពស់ចំពោះជោគជ័យនៃ «សន្និសីទប្រធានសភានៃអន្តរសភា លើកទី២» នៅកម្ពុជា

ប្រធានរដ្ឋសភាម៉ាឡេស៊ី ប្ដេជ្ញាបន្តលើកកម្ពស់កិច្ចសហប្រតិបត្តិការទ្វេភាគីជាមួយកម្ពុជាឱ្យកាន់តែរីកចម្រើន និងរឹងមាំ

ព្រីតថេន នឹងបន្តគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា

នយោបាយ និង ការអភិវឌ្ឍន៍

សមាគមយុវជនក្រុម៨នាំយកទេយ្យទានរបស់ឯកឧត្តម ហ៊ុន ម៉ាណែត ប្រគេនជូនព្រះសង្ឃគង់នៅ ចំនួន១៦វត្ដ ក្នុងស្រុកជើងព្រៃ

កំពង់ចាម៖ សមាគមយុវជនក្រុម៨ តាមរយៈលោកបណ្ឌិត ម៉ឹង មករា បាននាំយកបច្ច័យ ទេយ្យទាន និងស្បៀងអាហារជាអំណោយរបស់ឯកឧត្តមបណ្ឌិត ហ៊ុន ម៉ាណែត និងលោកជំទាវ ពេជ ចន្ទមុន្នី ប្រគេនព្រះសង្ឃដែលគង់នៅចំនួន១៦វត្ត នៅស្រុកជើងព្រៃ ខេត្ដកំពង់ចាម កាលពីថ្ងៃម្សិលមិញនេះ។សូមជម្រាបថា បច្ចុប្បន្នសមាគមយុវជនក្រុម៨ ក្រោមការដឹកនាំរបស់លោបណ្ឌិត ម៉ឹង មករា បានរួមចំណែកក្នុងការជួយដល់កិច្ចការមនុស្សធម៌ជាច្រើន ដូចជា វិស័យសុខាភិបាល វិស័យអប់រំ វិស័យកសិកម្ម និងការកសាងហេដ្ឋារចនាសម្ព័ន្ធជូនប្រជាពលរដ្ឋនៅជនបទជាដើម។សមាគមយុវជនក្រុម៨ ក៏តែងតែយកចិត្តទុកដាក់ជួយឧបត្ថម្ភគ្រឿងឧបភោគបរិភោគដល់គ្រួសារទីទាល់ក្រ ជនពិការ ចាស់ជរា សាងសង់ទីជម្រកជូនប្រជាពលរដ្ឋទីទាល់ក្រ ព្រមទាំងប្រគេននូវបច្ច័យ ម្ហូបអាហារ និងទេយ្យទានផ្សេងៗទៀតទៅដល់វត្តអារាមនានា ដែលខ្វះខាតចង្ហាន់សម្រាប់ព្រះសង្ឃ ក៏ដូចជាលោកតា លោកយាយចាស់ៗ ដែលស្នាក់នៅក្នុងវត្ត ពិសេសក្នុងកំឡុងវិបត្តិនៃជំងឺឆ្លងកូវីដ-១៩ ដើម្បីរួមចំណែកជាមួយរាជរដ្ឋាភិបាលក្នុងការកាត់បន្ថយភាពក្រីក្ររបស់ប្រជាពលរដ្ឋនៅតាមជនបទ។ទេយ្យទានដែលត្រូវបានប្រគេន រួមមាន៖ បច្ច័យចំនួន ៥,២២០,០០០រៀល, អង្ករ ២០០០គីឡូក្រាម, ទឹកបរិសុទ្ធ ១១០កេស និង៤០យួរ, ប្រេងឆា ១១កេស, មី ៤២កេស, ត្រីខ ៣៦យួរ, ទឹកត្រី ៤៥យួរ, ទឹកស៊ីអ៊ីវ ៤៥យួរ, ស្ករស ៣០គីឡូក្រាម, អំបិល ៥គីឡូក្រាម, តែ ២៦កញ្ចប់, ពងទាប្រៃ ២០០គ្រាប់, ទឹកផ្លែឈើ ១១កេស, ទឹកដោះគោខាប់ ៤០កំប៉ុង, ទឹកដោះគោឆៅ ១ឡូ, ទៀនវស្សា ៤គូរ និង ស្លាដក់ ២ឈុត៕អត្ថបទ៖ កុម្ភះ

ស្នងការខេត្តឧត្តរមានជ័យបញ្ជាក់ថា ការឆ្លងដែនខុសច្បាប់ចូលកម្ពុជាត្រូវបានទប់ស្កាត់ទាំងស្រុង

ឧត្តរមានជ័យ៖ លោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យបានបញ្ជាក់ថា ការឆ្លងដែនខុសច្បាប់របស់ពលករមកពីប្រទេសថៃ ត្រូវបានទប់ស្កាត់ទាំងស្រុងក្រោយពីមានការបង្ក្រាប និងអនុវត្តតាមផ្លូវច្បាប់ជាបន្តបន្ទាប់។ថ្លែងក្នុងសម្ភាសន៍ជាមួយ BTV កាលពីថ្មីៗនេះ លោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យបានឱ្យដឹងថា ពាក់ព័ន្ធនឹងកិច្ចការទប់ស្កាត់បញ្ហាឆ្លងរាតត្បាតជាសកលនូវជំងឺកូវីដ១៩ កងកម្លាំងនគរបាលខេត្តឧត្តរមានជ័យដោយអនុវត្តតាមបទបញ្ជា របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក៏ដូចជានាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ជុំវិញការរៀបចំផែនការអនុវត្តឱ្យបានម៉ឺងម៉ាត់ និងមានប្រសិទ្ធភាពបំផុត កងកម្លាំងនគរបាលខេត្តឧត្តរមានជ័យ ត្រូវបានចូលរួមយ៉ាងសកម្មក្នុងគោលដៅ ធានានូវការទប់ស្កាត់ការឆ្លងដែនខុសច្បាប់ របស់បងប្អូនពលករមកពីប្រទេសថៃ ខណៈ:ស្ថានភាពនៃការឆ្លងរាលដាលជំងឺកូវីដ១៩ ក្នុងប្រទេសថៃបន្តកើនឡើងជារៀងរាល់ថ្ងៃ។លោកឧត្តមសេនីយ៍ទោ ហួត សុធី បានបញ្ជាក់ថា កាលពីថ្មីៗនេះនគរបាលខេត្តឧត្តរមានជ័យ បានអនុវត្តទៅតាមផ្លូវច្បាប់ចំពោះករណីឆ្លងដែនខុសច្បាប់ ក៏ដូចជាមេខ្យល់មួយចំនួន ស្របពេលនគរបាលវរៈការពារព្រំដែនគោក ត្រូវបានដាក់ពង្រាយតាមច្រកនានា ពិសេសច្រកល្បៀងជាដើម ដើម្បីទប់ស្កាត់ការឆ្លងដែនខុសច្បាប់។ ពាក់ព័ន្ធនឹងការឆ្លងដែនរបស់ពលករមកពីប្រទេសថៃចូលតាមខេត្តឧត្តរមានជ័យ លោកឧត្តមសេនីយ៍ទោ ហួត សុធី បន្តថា ក្នុងពេលបច្ចុប្បន្នពលករបានប្រើប្រាស់មធ្យោបាយ នៃការធ្វើដំណើរចូលមកកម្ពុជាតាមច្រកព្រំដែនអន្តរជាតិអូរស្មាច់ ខណៈកងកម្លាំងនគរបាលចម្រុះបានសហការ ជាមួយកងកម្លាំងទាហានចុះល្បាតតាមបណ្ដាគោលដៅទាំង២៩ ២៤ម៉ោងលើ ២៤ម៉ោង។ដោយឡែកពាក់ព័ន្ធ នឹងការទប់ស្កាត់ការឆ្លងរាលដាលជំងឺកូវីដក្នុងសហគមន៍ លោកឧត្តមសេនីយ៍ទោ ហួត សុធី បានលើកឡើងថា កងកម្លាំងនគរបាលទាំងអស់បានខិតខំអនុវត្តទៅតាមបទបញ្ជា របស់សម្តេចតេជោនាយករដ្ឋមន្ត្រី និងនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ ជុំវិញការទប់ស្កាត់បញ្ហាជំងឺកូវីដ១៩ តាមរយៈការណែនាំជាប្រចាំ ហើយជាពិសេសគឺការអនុវត្ត៣កុំ និង៣ការពារ។ បន្ថែមលើសពីនេះ លោកឧត្ដមសេនីយ៍ទោ ហួត សុធី បានឱ្យទៀតថា ដើម្បីចូលរួមទប់ស្កាត់ការឆ្លងរាលដាលជំងឺកូវីដ១៩ក្នុងសហគមន៍ កងកម្លាំងនគរបាលបានចូលរួមការពារទីតាំងធ្វើចត្តាឡីស័ក និងមណ្ឌលព្យាបាលកូវីដ១៩ គ្រប់ទីតាំងនៃស្រុក-ក្រុងចំនួន ៥ ផងដែរ៕ អត្ថបទ៖ សេក ឧត្តម

គ្រូពេទ្យស្ម័គ្រចិត្តឯកឧត្ដម ហ៊ុន ម៉ានី បំពេញបេសកកម្មចុះចាក់វ៉ាក់សាំងជូនពលរដ្ឋខេត្តឧត្តរមានជ័យ

ឧត្តរមានជ័យ៖ តបតាមការឧទ្ទេសនាមរបស់គណៈកម្មការចំពោះកិច្ចចាក់វ៉ាក់សាំងកូវីដ-១៩ ក្របខណ្ឌទូទាំងប្រទេស នាព្រឹកថ្ងៃទី១១ ខែកក្កដា ឆ្នាំ២០២១នេះ តាមយុទ្ធសាស្ត្រ《ផ្ការីក》ដែលជាចក្ខុវិស័យដ៏ខ្ពង់ខ្ពស់របស់តេជោ ហ៊ុន សែន កម្លាំងជំនាញក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី មាន ២២ក្រុមស្មើនឹង ២២០នាក់ ដឹកនាំដោយប្រធានក្រុមសម្របសម្រួល ១៨នាក់ និងជំនួយការចំនួន ៥៣នាក់ សរុបទាំងអស់មានចំនួន ២៩១នាក់បានចុះបេសកកម្មទៅកាន់ខេត្តឧត្តរមានជ័យ ដើម្បីចាក់វ៉ាក់សាំងជូនបងប្អូនប្រជាពលរដ្ឋ។ឯកឧត្តម លេង ផាលី ប្រធានប្រតិបត្តិក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី តំណាងឯកឧត្តម ហ៊ុន ម៉ានី ប្រធានកិត្តិយសក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានមានប្រសាសន៍ថា ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ក្រោមការដឹកនាំចង្អុលបង្ហាញដោយផ្ទាល់របស់បងប្រធាន ហ៊ុន ម៉ានី ស្ម័គ្រចិត្តចូលរួមកិច្ចការសង្គម បម្រើប្រជាជន និងជាតិមាតុភូមិគ្រប់ទីកន្លែង មិនថាទីជិត ទីឆ្ងាយឯនាយជាយដែននោះទេ។ សម្រាប់យុទ្ធនាការចាក់វ៉ាក់សាំងកូវីដ-១៩ ក្នុងក្រុងសំរោង ស្រុកអន្លង់វែង និងស្រុកត្រពាំងប្រាសាទ ខេត្តឧត្តរមានជ័យ ដូសទី១ ចាប់ពីថ្ងៃទី១២ ដល់ថ្ងៃទី២៦ ខែកក្កដា ឆ្នាំ២០២១ និងដូសទី២ ចាប់ពីថ្ងៃទី២៧ ខែកក្កដាដល់ថ្ងៃទី០៩ ខែសីហា ឆ្នាំ២០២១។ បើតាមបណ្ឌិត អ៊ី លីម៉ា អនុប្រធានក្រុមគ្រូពេទ្យស្ម័គ្រចិត្តឯកឧត្តម ហ៊ុន ម៉ានី និងជាសាកលវិទ្យាធិការរងនៃសាកលវិទ្យាល័យចេនឡាបានលើកឡើងថា ក្រោយពីទទួលបានលិខិតឧទ្ទេសនាមពីក្រសួងសុខាភិបាល និងក្រោមការដឹកនាំរបស់ឯកឧត្តម លេង ផាលី ប្រធានប្រតិបតិ្តក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី និងមានតំណាងប្រធាន អនុប្រធានក្រុមនីមួយៗបានរៀបចំចាត់ចែង ដើម្បីឲ្យយុទ្ធនាការចាក់វ៉ាក់សាំងទទួលបានជោគជ័យ គឺក្រុមការងារគ្រូពេទ្យបានទំនាក់ទំនង និងធ្វើកិច្ចសហការជាមួយថ្នាក់ដឹកនាំខេត្ត និងប្រធានសហភាពសហព័ន្ធយុវជនកម្ពុជាខេត្ត និងមនី្ទរសុខាភិបាលខេត្តឧត្តរមានជ័យ ដើម្បីដោះស្រាយធ្វើយ៉ាងណាឲ្យសម្ភារៈ ការស្នាក់នៅ និងដំណើរការចាក់វ៉ាក់សាំងជូនប្រជាពលរដ្ឋ មានភាពរលូនល្អប្រសើរ។ជាចុងក្រោយឯកឧត្តម លេង ផាលី បានបញ្ជាក់ទៀតថា ដំណើរបេសកកម្មថ្មីនេះត្រូវបានអនុវត្ត បន្ទាប់ពីក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានបញ្ចប់ដោយជោគជ័យក្នុងការចូលរួមចាក់វ៉ាក់សាំងកូវីដ-១៩ ក្នុងភូមិសាស្ត្ររាជធានីភ្នំពេញ និងខេត្តកណ្ដាល។ ដូច្នេះសូមបងប្អូនប្រជាពលរដ្ឋដែលដល់វេន ទទួលការចាក់វ៉ាក់សាំងបង្ការជំងឺកូវីដ-១៩ សូមអញ្ជើញទៅចាក់វ៉ាក់សាំងឱ្យបានគ្រប់ៗគ្នា និងសូមឱ្យមានការជឿជាក់លើការដឹកនាំរបស់សម្តេចអគ្គមហាសេនាបតីតេជោ ហ៊ុន សែន ដែលបានលះបង់ទាំងកម្លាំងកាយ កម្លាំងចិត្ត មិនខ្លាចការនឿយហត់ ដើម្បីសេចកី្តសុខទុក្ខប្រជាពលរដ្ឋទូទាំងប្រទេស។ ហើយក៏សូមឲ្យលោកគ្រូ អ្នកគ្រូពេទ្យ ប្រធានក្រុមសម្របសម្រួល និងក្រុមការងារទាំងអស់យកចិត្តទុកដាក់ថែរក្សាសុខភាព និងសូមជូនពរបងប្អូនធ្វើដំណើរដោយសុខសុវត្ថិភាព និងជោគជ័យក្នុងបេសកកម្មចាក់វ៉ាក់សាំងកូវីដ១៩ ជូនបងប្អូនប្រជាពលរដ្ឋខេត្តឧត្តរមានជ័យ៕អត្ថបទ៖ រដ្ឋា

អភិបាលខេត្តបន្ទាយមានជ័យបន្តចុះពិនិត្យសកម្មភាពការចាក់វ៉ាក់សាំងជូនពលរដ្ឋក្រុងសិរីសោភ័ណ

បន្ទាយមានជ័យ៖ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ ឯកឧត្តម សេង ធារិន មេបញ្ជាការនាយសេនាធិការយោធភូមិភាគទី៥ ជាប្រធានដឹកនាំក្រុមការងារគ្រពេទ្យយោធភូមិទី៥ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត បានបន្តសកម្មភាពចុះត្រួតពិនិត្យមើលការងារចាក់វ៉ាក់សាំងបង្ការជំងឺកូវីដ-១៩ ជូនដល់ពលរដ្ឋ ព្រះសង្ឃ និងកម្មករ អាជីវករទូទាំងក្រុងសិរីសោភ័ណ ដែលចាក់ដោយក្រុមគ្រូពេទ្យយោធាយោធភូមិភាគទីនៅថ្ងៃអាទិត្យចុងសប្ដាហ៍នេះ។ឯកឧត្ដម អ៊ុំ រាត្រី អភិបាលខេត្តបន្ទាយមានជ័យបានមានប្រសាសន៍ថា ដើម្បីរួមគ្នាទប់ស្កាត់ការឆ្លងរីករាលដាលនៃជំងឺកូវីដ១៩ ប្រមុខរាជរដ្ឋាភិបាលនៃព្រះរាជាណាចក្រកម្ពុជា ដឹកនាំដោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានផ្ដល់នូវវ៉ាក់សាំងចាក់ជូនដល់មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទូទាំងប្រទេស។ ឯកឧត្ដមអភិបាលខេត្តក៏បានបញ្ជាក់ផងដែរថា អ្នកដែលបានចាក់វ៉ាក់សាំងលើកទី១ រួចហើយ ត្រូវតែអនុវត្តតាមវិធានសុខាភិបាលឲ្យបានត្រឹមត្រូវ ទាំងមុនពេលចាក់ និងក្រោយពេលចាក់ដូសទី១ រហូតដល់ថ្ងៃចាក់ដូសទី២ ត្រូវអនុវត្តតាមការណែនាំរបស់គ្រូពេទ្យ រហូតដល់ថ្ងៃកំណត់ដែលគ្រូពេទ្យបានណែនាំនោះ ទើបវ៉ាក់សាំងមានប្រសិទ្ធភាពខ្ពស់។ឯកឧត្ដមអភិបាលខេត្តបានបន្តថា បើទោះបីជាបងប្អូនបានធ្វើការចាក់វ៉ាក់សាំងបង្ការជំងឺកូវីដ១៩ ហើយក្ដី ក៏បងប្អូនត្រូវតែបន្តអនុវត្តតាមការណែនាំរបស់ក្រសួងសុខាភិបាល និងអនុវត្តវិធាន ៣ការពារ និង៣កុំឱ្យបានខ្ជាប់ខ្ជួន។ គូសបញ្ជាក់ថា មកដល់ថ្ងៃទី២ នេះប្រជាពលរដ្ឋនៅតែបន្តសកម្មភាពមកចាក់វ៉ាក់សាំងយ៉ាងច្រើនកុះករ ដោយសារតែពួកគាត់មានការយល់ដឹងច្រើនពីបញ្ហាបង្ការទប់ស្កាត់ជំងឺកូវីដ-១៩៕អត្ថបទ៖ ឃិន សារិទ្ធ

សម្តេចតេជោ៖ កាលៈទេសៈណាក៏ដោយរាជរដ្ឋាភិបាលនៅតែបន្តផ្តល់អាទិភាពដល់វិស័យសុខភាពសាធារណៈ

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានគូសបញ្ជាក់ថា ទោះក្នុងកាលៈទេសៈណាក៏ដោយ រាជរដ្ឋាភិបាលនៅតែផ្ដល់អាទិភាពខ្ពស់លើវិស័យសុខភាពសាធារណៈ តាមរយៈការបង្កើនកិច្ចអន្តរាគមន៍ និងការបង្កើនថវិកាជាតិរៀងរាល់ឆ្នាំ។តាមរយៈសារលិខិតផ្ញើជូនជនរួមជាតិ នៅលើហ្វេសប៊ុកផ្លូវការរបស់សម្តេចព្រឹកថ្ងៃទី១១កក្កដា ក្នុងឱកាសទិវាប្រជាជនពិភពលោកលើកទី៣២ ថ្ងៃទី១១ ខែកក្កដា ឆ្នាំ២០២១នេះ សម្តេចបញ្ជាក់ថា កាលៈទេសៈណាក៏ដោយ រាជរដ្ឋាភិបាលនៅតែផ្ដល់អាទិភាពខ្ពស់ដល់វិស័យសុខភាពសាធារណៈ តាមរយៈការបង្កើនកិច្ចអន្តរាគមន៍ និងការបង្កើនថវិកាជាតិរៀងរាល់ឆ្នាំ ជាពិសេសលើវិស័យសុខភាពបន្តពូជ និងសុខភាពផ្លូវភេទ សំដៅពង្រឹងការលើកកម្ពស់សុខភាពបន្តពូជ និងសុខភាពផ្លូវភេទ ដែលជាមធ្យោបាយមួយនៃការឈានទៅសម្រេចបាន គោលដៅការកាត់បន្ថយអត្រាមរណភាពមាតា និងទារក ដែលបានកំណត់ក្នុងផែនការយុទ្ធសាស្ត្រសុខាភិបាល ផែនការយុទ្ធសាស្ត្រអភិវឌ្ឍន៍ជាតិ និងគោលដៅអភិវឌ្ឍប្រកបដោយចីរភាព។ ឆ្លៀតឱកាសដ៏មានតម្លៃនេះ សម្តេចបានថ្លែងអំណរគុណដល់ជនរួមជាតិទាំងអស់ ជាពិសេសមន្ត្រីសុខាភិបាលជួរមុខ កងកម្លាំងប្រដាប់អាវុធ និងមន្ត្រីរាជការគ្រប់លំដាប់ថ្នាក់ដែលបានចូលរួមគាំទ្រ និងរួមចំណែកជាមួយនឹងរាជរដ្ឋាភិបាល ក្នុងការប្រយុទ្ធប្រឆាំងនឹងជំងឺកូវីដ-១៩ និងសូមជនរួមជាតិទាំងអស់បន្តអនុវត្តឱ្យបានខ្ជាប់ខ្ជួននូវវិធានការ ៣កុំ និង ៣ការពារ ដើម្បីរួមចំណែកក្នុងការបញ្ឈប់ការរីករាលដាលជំងឺកូវីដ-១៩ ទាំងស្រុងនៅក្នុងប្រទេសកម្ពុជា។ឆ្លៀតក្នុងឱកាសនេះ សម្តេចក៏បានថ្លែងអំណរគុណដ៏ជ្រាលជ្រៅបំផុតចំពោះអង្គការសហប្រជាជាតិ ជាពិសេសអង្គការសុខភាពពិភពលោក និងបណ្ដាប្រទេសជាមិត្តទាំងអស់ដែលបានគាំទ្រដល់កម្ពុជា ទាំងស្មារតី ទាំងសម្ភារៈសុខាភិបាល និងវិធីសាស្ត្រព្យាបាល និងទប់ស្កាត់ការឆ្លងកូវីដ-១៩ នៅក្នុងស្ថានភាពដ៏លំបាកនេះ ជាពិសេសសាធារណរដ្ឋប្រជាមានិតចិន ប្រទេសជប៉ុន និងសហរដ្ឋអាមេរិក។ សម្តេចបានលើកឡើងក្នុងនៅក្នុងសារលិខិតនេះថា អង្គការសហប្រជាជាតិតែងតែលើកទឹកចិត្តដល់បណ្ដារដ្ឋភាគីទាំងអស់ ឱ្យប្រារព្ធទិវាប្រជាជនពិភពលោកជារៀងរាល់ឆ្នាំនៅថ្ងៃទី១១ ខែកក្កដា ដោយផ្តោតលើប្រធានបទផ្សេងៗគ្នា ហើយប្រធានបទឆ្នាំ២០២១នេះគឺ “សិទ្ធិ និងជម្រើសគឺជាចម្លើយ មិនចំពោះថាក្នុងដំណាក់កាលបន្ទុះ ឬសម្រុតទារកនោះទេ ដំណោះស្រាយគឺស្ថិតនៅលើការផ្តល់អាទិភាពដល់សិទ្ធិ និងសុខភាពបន្តពូជសម្រាប់មនុស្សគ្រប់រូប។ ប្រធានបទនេះពិតជាមានអត្ថន័យធំធេង ក្នុងស្ថានភាពដែលពិភពលោកទាំងមូលកំពុងប្រយុទ្ធប្រឆាំង នឹងការរីករាលដាលនៃជំងឺផ្លូវដង្ហើមធ្ងន់ធ្ងរ (កូវីដ-១៩) ដែលប៉ះពាល់យ៉ាងធ្ងន់ធ្ងរដល់ជីវិតមនុស្ស សហគមន៍ សេដ្ឋកិច្ចសង្គម និងសុខភាពសាធារណៈនៅគ្រប់ទិសទីទូទាំងពិភពលោក។ ស្ត្រី និងក្មេងស្រីគឺជាក្រុមជនដែលងាយរងគ្រោះជាងគេ ដោយសារជំងឺរាតត្បាតកូវីដ-១៩ ជាពិសេសលើបញ្ហាសុខភាពបន្តពូជ និងសុខភាពផ្លូវភេទ៕អត្ថបទ៖ មុត សុទ្ធ

សាខាកាកបាទក្រហមកម្ពុជាខេត្តកំពតទទួលជំនួយបំពង់អុកស៊ីសែនពីសប្បុរសជន

កំពត៖ ដើម្បីរួមចំណែកក្នុងការបំពេញតម្រូវការខ្វះខាតរបស់មន្ទីរពេទ្យ សម្រាប់ជួយសង្គ្រោះអាយុជីវិតអ្នកជំងឺមានស្ថានភាពធ្ងន់ធ្ងរឲ្យទាន់ពេលវេលា និងជាពិសេសដើម្បីការចូលរួមចំណែកជាមួយរដ្ឋបាលខេត្តកំពត នៅក្នុងស្ថានភាពនៃប្រយុទ្ធប្រឆាំង និងបង្ការទប់ស្កាត់ការរីករាលដាលជំងឺឆ្លងកូវីដ១៩ ដែលមានការឆ្លងច្រើនក្នុងរយៈពេលចុងក្រោយនេះ សប្បុរសជននានាបាននាំយកបំពង់អុកស៊ីសែន មកជូនដល់សាខាកាកបាទក្រហមកម្ពុជាខេត្តកំពត ដើម្បីយកទៅប្រើប្រាស់តាមតម្រូវការចាំបាច់។ពិធីប្រគល់បំពង់អុកស៊ីសែនចំនួន ៣៥បំពង់ជូនដល់សាខាកាកបាទក្រហមកម្ពុជាខេត្តកំពតនេះ ធ្វើឡើងកាលពីថ្ងៃទី១០ ខែកក្កដា ឆ្នាំ២០២១។ លោកជំទាវ លាង ហៃ ជាវតាយ អនុប្រធានអចិន្ត្រៃយ៍គណៈកម្មាធិការសាខាកាកបាទក្រហមកម្ពុជាខេត្តកំពត បានសម្ដែងការកោតសរសើរ និងថ្លែងអំណរគុណយ៉ាងជ្រាលជ្រៅបំផុត ជូនចំពោះសប្បុរសជនដែលតែងតែបានឧបត្ថម្ភ នូវឧបករណ៍សម្ភារៈជូនសាខាកាកបាទក្រហមកម្ពុជាខេត្ត ដើម្បីយកទៅចែកជូនជំនាញ និងប្រជាពលរដ្ឋប្រើប្រាស់។ ពិសេសការផ្តល់ជាបំពង់អុកស៊ីសែននាពេលនេះ គឺអាចជួយបំពេញតម្រូវការខ្វះខាតរបស់មន្ទីរពេទ្យក្នុងខេត្ត ដើម្បីជួយសង្គ្រោះអាយុជីវិតប្រជាពលរដ្ឋដែលមានជំងឺធ្ងន់ធ្ងរ។ ហើយបំពង់អុកស៊ីសែននេះដែរ វាក៏អាចជួយកាត់បន្ថយនូវអត្រាស្លាប់របស់អ្នកជំងឺកូវីដ១៩ ដែលមានបញ្ហាសួតធ្ងន់ធ្ងរផងដែរ ដែលវាឆ្លើយតបតាមការចង់បានរបស់ប្រមុខរាជរដ្ឋាភិបាល ក៏ដូចជារដ្ឋបាលខេត្តកំពត ដែលបាននឹងកំពុងយកចិត្តទុកដាក់ក្នុងការងារប្រយុទ្ធប្រឆាំង និងបង្ការទប់ស្កាត់ជំងឺកូវីដ១៩ នាពេលបច្ចុប្បន្ន។លោកជំទាវសង្ឃឹមថា នឹងមានសប្បុរសជនជាច្រើនទៀត បន្តជួយឧបត្ថម្ភគាំទ្រដល់កាកបាទក្រហមកម្ពុជា ដើម្បីជួយដល់ប្រជាពលរដ្ឋក្នុងគ្រាដ៏សែនលំបាក នៃបរិបទកូវីដ១៩ នេះ។ សូមបញ្ជាក់ថា សប្បុរសជនទាំងបីរូបរួមមាន ១-លោកជំទាវ ចាង វួច បានឧបត្ថម្ភបំពង់អុកស៊ីសែន ចំនួន ២០បំពង់, ២- លោកជំទាវ អ៊ឹង សុគន្ធា បានឧបត្ថម្ភបំពង់អុកស៊ីសែនចំនួន ១០បំពង់ និងលោកជំទាវ ជុំ សុគន្ធា បានឧបត្ថម្ភចំនួន ៥បំពង់៕អត្ថបទ៖ អន សារីម

សម្តេចក្រឡាហោម ស ខេង តែងតាំងឯកឧត្តម តាន់ សុខវិជ្ជា និងលោក កែវ សុផាន់ ជា អនុប្រធានក្រុមការងារគណបក្សប្រជាជន ស្រុកពារាំង

ភ្នំពេញ៖ សម្តេចក្រឡាហោម ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបាត់ដំបង និងខេត្តព្រៃវែង បានតែងតាំងឯកឧត្តម ឧត្តមសេនីយ៍ឯក តាន់ សុខវិជ្ជា ប្រធានលេខាធិការដ្ឋាន នៃគណៈកម្មាធិការប្រយុទ្ធប្រឆាំងផលិតផលក្លែងក្លែយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ក្រសួងមហាផ្ទៃ ជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកពារាំង ខេត្តព្រៃវែង ដើម្បីពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រតុកោណដំណាក់កាលទី៤ របស់រាជរដ្ឋាភិបាលកម្ពុជា។ការតែងតាំងឯកឧត្តម ឧត្តមសេនីយ៍ឯក តាន់ សុខវិជ្ជា ជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកពារាំង ខេត្តព្រៃវែង បន្ទាប់ពីថ្នាក់ដឹកនាំគណបក្សប្រជាជនកម្ពុជា បានឃើញការខិតខំប្រឹងប្រែងរបស់ឯកឧត្តម មានស្នាដៃល្អ លះបង់កម្លាំងកាយចិត្ត ការបម្រើជាតិមាតុភូមិ និងប្រជាជនកម្ពុជា មិនខ្លាចនឿតហត់ មានទំនាក់ទំនងល្អជាមួយបងប្អូនប្រជាពលរដ្ឋ និងមានការគាំទ្រនិងជំនឿទុកចិត្តពីប្រជាពលរដ្ឋដល់គណបក្សប្រជាជនកម្ពុជា។សម្តេចក្រឡាហោម ស ខេង បានកោតសរសើរឯកឧត្តម ឧត្តមសេនីយ៍ឯក តាន់ សុខវិជ្ជា ជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកពារាំង ខេត្តព្រៃវែង បានបំពេញការងារដោយស្មារតីទទួលខុសត្រូវខ្ពស់ លើកកម្ពស់សេវាសាធារណៈ ដោះស្រាយសំណូមពរនានារបស់ប្រជាពលរដ្ឋ ក្នុងរយពេលកន្លងមក។សូមបញ្ជាក់ថា សម្តេចក្រឡាហោម ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបាត់ដំបង និងខេត្តព្រៃវែង បានផ្ទេរឯកឧត្តម ឧត្តមសេនីយ៍ឯក តាន់ សុខវិជ្ជា ពីអនុប្រធានគណបក្សប្រជាជនកម្ពុជា ស្រុកបាណន់ ខេត្តបាត់ដំបង ទៅជាអនុប្រធានក្រុមការងារគណបក្សប្រជាជនកម្ពុជាស្រុកពារាំង ខេត្តព្រៃវែង និងតែងតាំង លោក កែវ សុផាន់ ជាអនុប្រធានក្រុមការងារគណបក្សប្រជាជនកម្ពុជា ស្រុកពារាំង ខេត្តព្រៃវែង ៕

ទេសរដ្ឋមន្រ្តី គន់ គីម សរសើរសកម្មភាពរបស់បញ្ជាការដ្ឋានអង្គរក្សក្នុងការដឹកជញ្ជូន សម្ភារៈគ្រប់បែបយ៉ាងជូនដល់ពលរដ្ឋរងគ្រោះដោយសារកូវីដ១៩

ភ្នំពេញ ៖ អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ ឯកឧត្តមទេសរដ្ឋមន្រ្តី គន់ គីម បានថ្លែងកោតសរសើរចំពោះសកម្មភាពរបស់កងកម្លាំងនៃបញ្ជាការដ្ឋានអង្គរក្ស ដែលបានខិតខំទាំងយប់ទាំងថ្ងៃ ដោយមិនខ្លាចនឿយហត់ ក្នុងការដឹកជញ្ជូនស្បៀង និងសម្ភារៈផ្សេងៗជូនដល់បងប្អូនប្រជាពលរដ្ឋដែលរងគ្រោះដោយសារបញ្ហាកូវីដ១៩ មិនថានៅរាជធានីភ្នំពេញ និងតាមបណ្តាខេត្តនានា។ថ្លែងក្នុងពិធីចែកសម្ភារៈបរិក្ខា សម្រាប់បង្ការ ទប់ស្កាត់ និងសង្រ្គោះគ្រោះហន្តរាយ ដែលជាអំណោយរបស់សម្តេចតេជោ ប៊ុន សែន នាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា នាព្រឹកថ្ងៃទី១០ ខែកក្កដាឆ្នាំ២០២១នេះ នៅបញ្ជាការដ្ឋានអង្គរក្ស ។ឯកឧត្តមគន់ គីម បានលើកឡើងថា សកម្មភាពរបស់នាយទាហានពលទាហាន នៃបញ្ជាការដ្ឋានអង្គរក្ស នាពេលកន្លងមក ក៏ដូចសព្វថ្ងៃនេះគឺមិនអាចកាត់ថ្លៃបាននោះឡើយ ដោយពួកគេបានខិតខំលើកដាក់ ដឹកជញ្ជូនទាំងយប់ទាំងថ្ងៃនូវស្បៀងអាហារ និងសម្ភារៈជាច្រើនទៀតជូនដល់បងប្អូនប្រជាពលរដ្ឋដែលបានបិទខ្ទប់ដោយសារបញ្ហាកូវីដ១៩ ហើយតាមរយៈសកម្មភាពទាំងនេះ គឺជាការបញ្ជាក់ឲ្យឃើញយ៉ាងច្បាស់ថា នាយទាហានពលទាហានទាំងអស់ពិតជាស្រលាញ់ប្រជាពលរដ្ឋ និងគិតគូរអំពីសុខភាពរបស់ប្រជាពលរដ្ឋរូប ដូចអ្វីដែលរាជរដ្ឋាភិបាលបាននឹងកំពុងធ្វើ។ជាមួយគ្នានោះដែរឯកឧត្តមទេសរដ្ឋមន្រ្តី គន់ គីម ក៏បានជំរុញដល់នាយទាហានពលទាហាននៃបញ្ជាការដ្ឋានអង្គរក្សទាំងអស់បន្តខិតខំកិច្ចការងាររបស់ខ្លួនឲ្យបានខ្ជាប់ខ្ជួនបន្ថែមទៀត ជាពិសេសសកម្មភាពចុះជួយបងប្អូនប្រជាពលរដ្ឋដែលកំពុងរងគ្រោះដោយសារបញ្ហាកូវីដ១៩ និងគ្រោះមហន្តរាយផ្សេងៗទៀត។ ឯកឧត្តមទេសរដ្ឋមន្រ្តី ក៏បានអំពាវនាវដល់នាយទាហានពលទាហានទាំងអស់ ត្រូវបន្តអនុវត្តវិធានការរបស់ក្រសួងសុខាភិបាល និងរាជរដ្ឋាភិបាលដោយត្រូវប្រកាន់ខ្ជាប់គ្រប់ពេលវេលាទាំងអស់នូវិធាន៣ការពារ និង៣កុំនោះ។បើតាមការឲ្យដឹងពីឯកឧត្តម នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង អគ្គមេបញ្ជាការរងខ.ភ.ម និងជាមេបញ្ជាការបញ្ជាការដ្ឋានអង្គរក្ស បានឲ្យដឹងថា ក្នុងដំណាក់កាលជួបវិបត្តិកូវីដ១៩នេះ កងកម្លាំងនាយទាហានពលទាហាននៃបញ្ជាការដ្ឋានអង្គរក្សចំនួន៣០០០នាក់ បានចេញប្រតិបត្តិការដោយប្រឈមក្នុងតំបន់មាត់ជ្រោះតំបន់ក្រហម ដោយពួកគេបានធ្វើការដឹកជញ្ជូន លី វេចខ្ចប់ លើកដាក់គ្រប់បែបយ៉ាងនៅក្នុងរាជធានីភ្នំពេញ និងតាមបណ្តាខេត្តនានា ស្របទៅតាមបទបញ្ជារបស់ប្រមុខរាជរដ្ឋាភិបាល ៕អត្ថបទ ៖ បាន ចក់

សម្តេចតេជោ ហ៊ុន សែន ប្រគល់អំណោយរថយន្តដឹកវ៉ាក់សាំងចំនួន៣០គ្រឿង ជូនទៅមន្ទីរសុខាភិបាលរាជធានី-ខេត្ត

ភ្នំពេញ ៖ លោកជំទាវ វេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មាការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស នឹងអញ្ជើញជាអធិបតីក្នុងពិធីប្រគល់រថយន្តដឹកវ៉ាក់សាំងចំនួន៣០គ្រឿង ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រី ជូនទៅមន្ទីរសុខាភិបាលរាជធានី-ខេត្តទាំង២៥ នៅឃ្លាំងឱសថកណ្តាល (CMS) នៅព្រឹកថ្ងៃទី០៩ ខែកក្កដា ឆ្នាំ២០២១នេះ។លោកជំទាវ វេជ្ជបណ្ឌិត ឱ វណ្ណឌីន បានថ្លែងថា ដោយគោរពតាមបទបញ្ជាដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្រ្តី លោកមានការគិតគូរទៅដល់ការខ្វះខាតរបស់ក្រុមការងារចាក់វ៉ាក់សាំងកូវីដ-19 ជាពិសេសបណ្តារាជធានី-ខេត្តទាំង២៥។ ក្រោយពីមានការសម្រេចដ៏ខ្ពង់ខ្ពស់ពីសម្តេចតេជោ ក្នុងការប្រគល់រថយន្តដឹកវ៉ាក់សាំងកូវីដ-១៩ សម្រាប់ចាក់វ៉ាក់សាំងជូនបងប្អូនប្រជាពលរដ្ឋ ជូនទៅដល់ក្រុមគ្រូពេទ្យកងទ័ពចំនួន១០គ្រឿង រួចមកហើយ កាលពីថ្ងៃទី៥ ខែកក្កដា ឆ្នាំ២០២១ កន្លងទៅនេះ។លោកជំទាវវេជ្ជបណ្ឌិត ឱ វណ្ណឌីន បានបញ្ជាក់ទៀតថា រថយន្តដឹកវ៉ាក់សាំងនេះ នឹងចូលរួមបម្រើសេវាចាក់វ៉ាក់សាំងបង្ការជំងឺកូវីដ-១៩ នៅទូទាំងប្រទេស។ ជាពិសេសរថយន្តនេះ ជាអំណោយរបស់សប្បុរសជនខ្មែរ តាមរយះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី។ ទន្ទឹមនឹងនោះក្នុងនាមក្រសួងសុខាភិបាល គណៈកម្មាការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស និងប្រធានមន្ទីរសុខាភិបាល រាជធានី-ខេត្ត សូមគោរពថ្លែងអំណរគុណជូនចំពោះ សម្តេចតេជោ ហ៊ុន សែន ដែលមានទឹកចិត្តដ៏មហិមា និងសម្រេចប្រគល់ជូននូវរថយន្តដឹកវ៉ាក់សាំង សម្រាប់ចាក់វ៉ាក់សាំងការពារជំងឺកូវីដ-១៩ ជូនប្រជាពលរដ្ឋ ដែលជាការជម្រុញឲ្យដំណើរការចាក់វ៉ាក់សាំង កាន់តែរលូន និងល្អប្រសើរបន្ថែមទៀត៕អត្ថបទ រដ្ឋា

មាត្រាចំនួន១០ នៃច្បាប់ការងារធ្វើវិសោធនកម្ម ត្រូវបានគណៈរដ្ឋមន្ត្រីអនុម័តទាំងស្រុងហើយ

ភ្នំពេញ ៖ តាមរយៈកិច្ចប្រជុំពេញអង្គគណៈរដ្ឋមន្ត្រីពីចម្ងាយតាមប្រព័ន្ធវីដេអូក្រោមអធិបតីភាពដ៏ខ្ពង់ខ្ពស់ សម្តេចតេជោ ហ៊ុន សែន នាយករដ្ឋមន្ត្រី នៅព្រឹកថ្ងៃទី៩កក្កដានេះ សេចក្តីព្រាងច្បាប់ ស្តីពី វិសោធនកម្មមាត្រាចំនួន ១០នៃច្បាប់ការងារត្រូវបានគណៈរដ្ឋមន្ត្រីអនុម័តទាំងស្រុងហើយ។មាត្រាចំនួន១០ ត្រូវបានធ្វើវិសោធនកម្ម ដែលគណៈរដ្ឋមន្ត្រីអនុម័តនៅថ្ងៃនេះ រួមមាន ៖ មាត្រា១២៣ ,មាត្រា១៣៨, មាត្រា១៦២,មាត្រា៣០០, មាត្រា៣៤៣,មាត្រា៣៥០, មាត្រា៣៦៣, មាត្រា៣៥០, មាត្រា៣៦៣ និងមាត្រា៣៦៧ នៃច្បាប់ស្តីពីការងារ ដែលត្រូវប្រកាសឱ្យប្រើដោយ ព្រះរាជក្រមចុះថ្ងៃទី១៣ខែមីនា ឆ្នាំ១៩៩៧” ។ នេះបើយោងតាមផេកហ្វេសបុករបស់ ឯកឧត្តម ផៃ ស៊ី ផាន រដ្ឋមន្ត្រីប្រតិភូអមនាយករដ្ឋមន្ត្រីនាព្រឹកថ្ងៃទី ៩ខែកក្កដា នេះ ។សេចក្តីព្រាងច្បាប់ស្តីពីវិសោធនកម្មចំនួន១០មាត្រានៃច្បាប់ស្តីពីការងារនេះរៀបចំឡើង ក្នុងគោលបំណង ៖ កែសម្រួលបទប្បញ្ញត្តិពាក់ព័ន្ធនឹងវេនការងាររបស់រោងចក្រសហគ្រាសដែលមាន ដំណើរការលើសពី១វេនជាប្រចាំ ដើម្បីបង្កើនភាពទាក់ទាញឧស្សាហកម្មទំនើបដូចជារោងចក្រ ផលិតបរិក្ខារអគ្គិសនីគ្រឿងអេឡិចត្រូនិច និងការកែច្នៃម្ហូបអាហារជាដើម និងបង្កើនការងារជូន ប្រជាពលរដ្ឋ ។ពង្រីកវិសាលភាពសេវាកម្មរបស់ក្រុមប្រឹក្សាអាជ្ញាកណ្តាលក្នុងការដោះស្រាយវិវាទបុគ្គលដើម្បី ពង្រឹងប្រសិទ្ធភាព នៃយន្តការដោះស្រាយវិវាទការងារ និងឆ្លើយតប នឹងតម្រូវការរបស់ភាគីវិវាទ ព្រមទាំងកាន់តែធានាបាននូវសុខដុមរមនាក្នុងទំនាក់ទំនងវិជ្ជាជីវៈ ។លុបការឈប់នៅថ្ងៃបន្ទាប់ សម្រាប់ថ្ងៃឈប់សម្រាកបុណ្យចំថ្ងៃអាទិត្យដែលដូចគ្នាទៅនឹងការមិនលើកពេលឈប់សម្រាក បុណ្យចំថ្ងៃអាទិត្យរបស់មន្ត្រីរាជការ ដើម្បីឆ្លើយតបទៅនឹងការវិវឌ្ឍផ្នែកសង្គម - សេដ្ឋកិច្ចកម្ពុជា សំដៅលើកកម្ពស់ផលិតភាពការងារនិងពង្រឹងភាពប្រកួតប្រជែងសេដ្ឋកិច្ចកម្ពុជា ទាំងក្នុងតំបន់ និងសកលលោក ។ផ្តល់នីតិសម្បទាជានគរបាល យុត្តិធម៌ដល់អធិការការងារឱ្យពិនិត្យបទល្មើសនៃច្បាប់ ស្តីពីការងារ ស្របតាមបទប្បញ្ញត្តិនៃក្រមនីតិវិធី ព្រហ្មទណ្ឌ និងស្របតាមភារកិច្ច ដែលមន្ត្រីអធិការកិច្ច ការងារ ត្រូវធ្វើនិងបានកំពុងធ្វើ ។ កែសម្រួលមាត្រាពាក់ព័ន្ធ នឹងមាត្រាដែលត្រូវបានធ្វើវិសោធនកម្មក្នុងឆ្នាំ ២០០៧ និងឆ្នាំ២០១៨ ហើយមិនទាន់ត្រូវបានធ្វើវិសោធនកម្មឱ្យមានសង្គតិភាពនឹងគ្នា ។សូមជម្រាបថា កិច្ចប្រជុំគណៈរដ្ឋមន្ត្រីនៅព្រឹកថ្ងៃទី៩ខែកក្កដានេះ ក្រៅពីពិនិត្យពិភាក្សាអនុម័តលើ សេចក្តីព្រាងច្បាប់ ស្តីពីវិនិយោគនៃព្រះរាជាណាចក្រកម្ពុជា និងសេចក្តីព្រាងច្បាប់ ស្តីពីវិសោធន កម្មដែលមាន១០មាត្រាស្តីពីការងារ ដែលត្រូវប្រកាសឱ្យប្រើដោយព្រះរាជក្រមលេខ ជ ស / រកម ០៣៩៧/០១ ចុះ ថ្ងៃទី១៣ខែមីនា ឆ្នាំ១៩៩៧ កិច្ចប្រជុំក៏បានអនុម័តលើសំណើសុំការយល់ព្រម ពីគណៈរដ្ឋមន្ត្រី ដើម្បីសុំការអនុម័ត ពីស្ថាប័ននីតិប្បញ្ញត្តិ លើសេចក្តីព្រាងច្បាប់ ស្ដីពីការអនុម័ត យល់ព្រមលើពិធីសារ ធ្វើវិសោធនកម្មកិច្ចព្រមព្រៀងអាស៊ានបូកបីស្តីពីការត្រៀមបម្រុងអង្ករសង្ក្រោះបន្ទាន់ផងដែរ៕អត្ថបទ មុត សុទ្ធ

បណ្ដាញសង្គម

ព័ត៌មានថ្មីៗ

រដ្ឋមន្រ្តីក្រសួងវប្បធម៌ ជួបពិភាក្សាការងារជាមួយអនុប្រធានបេសកកម្មស្ថានទូតសាធារណរដ្ឋកូរ៉េប្រចាំកម្ពុជា

អង្គភាពប្រឆាំងអំពើពុករលួយធ្វើការសម្រេចលើពាក្យបណ្តឹងចំនួន៣៣ ក្នុងខែសីហា ឆ្នាំ២០២៦

លោក Trump៖ អ៊ីរ៉ង់បច្ចុប្បន្នគឺជាប្រទេសបរាជ័យ ហើយការបិទច្រក គឺជារឿងមិនគួរឲ្យជឿទាល់តែសោះ

នាយករដ្ឋមន្ត្រីបែលហ្ស៊ិក៖ អឺរ៉ុបកំពុងដើរយឺតជាងអាមេរិក និងចិន ក្នុងវិស័យនវានុវត្តន៍ និងផលិតភាព

ការវាយប្រហាររបស់អ៊ីរ៉ង់លើអេមីរ៉ាតអារ៉ាប់រួម និងហ្ស៊កដានី ត្រូវបានថ្កោលទោសយ៉ាងដាច់អហង្ការ

ក្រុមគ្រូពេទ្យនិយាយថា ការវាយប្រហាររបស់អ៊ីស្រាអែល បានសម្លាប់មនុស្ស ២នាក់ នៅតំបន់ហ្កាហ្សា

ប្រធានាធិបតីលីបង់ ជំរុញឱ្យអនុវត្តកិច្ចព្រមព្រៀងក្របខ័ណ្ឌយ៉ាងពេញលេញ និងមិនលម្អៀង ជាមួយអ៊ីស្រាអែល

ទួរគី អារ៉ាប៊ីសាអ៊ូឌីត និងប៉ាគីស្ថាន រៀបចំជំនួបគណៈកម្មាធិការកិច្ចព្រមព្រៀងការពារជាតិលើកដំបូង

យានដ្រូនរបស់រុស្ស៊ី ស្រោចសន្ធាប់លើទីក្រុងគីវ ជាថ្ងៃទី៥ ដោយរំខានដល់ជីវិតប្រចាំថ្ងៃ នៅទូទាំងរដ្ឋធានី

គោលដៅចំនួន៥ទីតាំងនៅកម្ពុជា នឹងត្រូវរឹតបន្តឹងខ្លាំងខាងផ្នែកចរាចរណ៍ ដើម្បីរួមចំណែកកាត់បន្ថយការគ្រោះថ្នាក់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

ស្នងការខេត្តឧត្តរមានជ័យបញ្ជាក់ថា ការឆ្លងដែនខុសច្បាប់ចូលកម្ពុជាត្រូវបានទប់ស្កាត់ទាំងស្រុង

គ្រូពេទ្យស្ម័គ្រចិត្តឯកឧត្ដម ហ៊ុន ម៉ានី បំពេញបេសកកម្មចុះចាក់វ៉ាក់សាំងជូនពលរដ្ឋខេត្តឧត្តរមានជ័យ

អភិបាលខេត្តបន្ទាយមានជ័យបន្តចុះពិនិត្យសកម្មភាពការចាក់វ៉ាក់សាំងជូនពលរដ្ឋក្រុងសិរីសោភ័ណ

សម្តេចតេជោ៖ កាលៈទេសៈណាក៏ដោយរាជរដ្ឋាភិបាលនៅតែបន្តផ្តល់អាទិភាពដល់វិស័យសុខភាពសាធារណៈ

សាខាកាកបាទក្រហមកម្ពុជាខេត្តកំពតទទួលជំនួយបំពង់អុកស៊ីសែនពីសប្បុរសជន

សម្តេចតេជោ ហ៊ុន សែន ប្រគល់អំណោយរថយន្តដឹកវ៉ាក់សាំងចំនួន៣០គ្រឿង ជូនទៅមន្ទីរសុខាភិបាលរាជធានី-ខេត្ត

មាត្រាចំនួន១០ នៃច្បាប់ការងារធ្វើវិសោធនកម្ម ត្រូវបានគណៈរដ្ឋមន្ត្រីអនុម័តទាំងស្រុងហើយ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

អភិបាលខេត្ត​បន្ទាយមានជ័យ​បន្ត​ចុះ​ពិនិត្យ​សកម្មភាព​ការ​ចាក់​វ៉ាក់សាំង​ជូន​ពលរដ្ឋ​ក្រុង​សិរីសោភ័ណ​

សម្តេច​តេ​ជោ​៖ កាលៈទេសៈ​ណា​ក៏​ដោយ​រាជរដ្ឋាភិបាល​នៅតែ​បន្ត​ផ្តល់​អាទិភាព​ដល់​វិស័យ​សុខភាព​សាធារណៈ​

សាខា​កាក​បាទ​ក្រហម​កម្ពុជា​ខេត្ត​កំពត​ទទួល​ជំនួយ​បំពង់​អុកស៊ីសែន​ពី​សប្បុរសជន​

សម្តេចតេជោ ហ៊ុន សែន ប្រគល់អំណោយរថយន្តដឹកវ៉ាក់សាំងចំនួន៣០គ្រឿង ជូនទៅ​មន្ទីរ​សុខាភិបាល​រាជធានី-ខេត្ត

មាត្រាចំនួន១០ នៃច្បាប់ការងារធ្វើ​វិសោធនកម្ម​​ ត្រូវ​បាន​គណៈរដ្ឋមន្ត្រីអនុម័តទាំងស្រុងហើយ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

អភិបាលខេត្តបន្ទាយមានជ័យបន្តចុះពិនិត្យសកម្មភាពការចាក់វ៉ាក់សាំងជូនពលរដ្ឋក្រុងសិរីសោភ័ណ

សម្តេចតេជោ៖ កាលៈទេសៈណាក៏ដោយរាជរដ្ឋាភិបាលនៅតែបន្តផ្តល់អាទិភាពដល់វិស័យសុខភាពសាធារណៈ

សាខាកាកបាទក្រហមកម្ពុជាខេត្តកំពតទទួលជំនួយបំពង់អុកស៊ីសែនពីសប្បុរសជន

សម្តេចតេជោ ហ៊ុន សែន ប្រគល់អំណោយរថយន្តដឹកវ៉ាក់សាំងចំនួន៣០គ្រឿង ជូនទៅមន្ទីរសុខាភិបាលរាជធានី-ខេត្ត

មាត្រាចំនួន១០ នៃច្បាប់ការងារធ្វើវិសោធនកម្ម ត្រូវបានគណៈរដ្ឋមន្ត្រីអនុម័តទាំងស្រុងហើយ