BTV NEWS

សម្តេចតេជោ ហ៊ុន សែន ជួបពិភាក្សាការងារតាមប្រព័ន្ធវីដេអូជាមួយប្រធានរដ្ឋសភា អាស៊ែបៃហ្សង់

គណៈប្រតិភូនៃសន្និសីទប្រធានសភានៃអន្តរសភា វាយតម្លៃខ្ពស់ចំពោះជោគជ័យនៃ «សន្និសីទប្រធានសភានៃអន្តរសភា លើកទី២» នៅកម្ពុជា

ប្រធានរដ្ឋសភាម៉ាឡេស៊ី ប្ដេជ្ញាបន្តលើកកម្ពស់កិច្ចសហប្រតិបត្តិការទ្វេភាគីជាមួយកម្ពុជាឱ្យកាន់តែរីកចម្រើន និងរឹងមាំ

ព្រីតថេន នឹងបន្តគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា

នយោបាយ និង ការអភិវឌ្ឍន៍

មន្ទីរពេទ្យព្រះអង្គឌួង គ្រោងដាក់ដំណើរការអគារសង្គ្រោះបន្ទាន់ព្យាបាលអ្នកជំងឺកូវីដ-១៩

ភ្នំពេញ ៖ ឯកឧត្តម សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ព្រឹកថ្ងៃទី២៤ ខែឧសភា ឆ្នាំ២០២១នេះ បានអញ្ជើញចុះពិនិត្យ មន្ទីរពេទ្យព្រះអង្គឌួង គ្រោងដាក់ដំណើរការអគារសង្គ្រោះបន្ទាន់ព្យាបាលអ្នកជំងឺកូវីដ-19 នាពេល ខាងមុខនេះ។ឯកឧត្តម សាស្ត្រាចារ្យ ម៉ម ប៊ុនហេង បានថ្លែងថា ការរៀបចំបន្ថែមអគារសង្គ្រោះបន្ទាន់ព្យាបាលជំងឺកូវីដ-១៩នេះ គឺជាការប្រតិបត្តិនូវគោលនយោបាយរបស់រាជរដ្ឋាភិបាល ដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត បានសម្រេចឲ្យរៀបចំនូវសេវាជួយសង្គ្រោះបន្ទាន់លើផ្នែកអុកហ្ស៊ីហ្សែន ចំពោះអ្នកជំងឺធ្ងន់។ ដូច្នេះក្រៅពីមនី្ទរពេទ្យមិត្តភាពខ្មែរ-សូវៀត ក្រសួងសុខាភិបាល បានពង្រីករួចហើយចំនួន១៥០គ្រែ និងមណ្ឌលថែទាំព្យាបាលជំងឺកូវីដ១៩ សែនសុខ២ ចំនួន១០០គ្រែ និងមណ្ឌលសុខភាពចាក់អង្រែ ចំនួន១០០គ្រែ។ ដោយឡែកសម្រាប់មនី្ទរពេទ្យអង្គឌួង ដែលគ្រោងដាក់ដំណើរការអគារសង្គ្រោះបន្ទាន់ព្យាបាលអ្នកជំងឺកូវីដ-១៩ មានចំនួន៣៥គ្រែ និងក្រុមគ្រូពេទ្យសម្រាប់ ព្យាបាលជំងឺកូវីដ១៩ មានចំនួន៦០នាក់ផងដែរ។ បញ្ហាជំងឺកូវីដ១៩ មិនទាន់មានការថមថយ ខណៈដែលក្រសួងសុខាភិបាលបន្តបង្កើនការប្រុងប្រយ័ត្នជានិច្ច ដូចជាការពង្រីកទីតាំងបន្ថែមសម្រាប់ពិនិត្យព្យាបាលជំងឺកូវីដ១៩ ទាំងកម្រិតស្រាល កម្រិតមធ្យម និងកម្រិតធ្ងន់ និងរាជរដ្ឋាភិបាល បានចាក់វ៉ាក់សាំងបង្ការជំងឺកូវីដ១៩ ជូនប្រជាពលរដ្ឋ ដែលជាទូទៅអ្នកឆ្លងជំងឺកូវីដ១៩ ដែលចាក់វ៉ាក់សាំងរួច មិនសូវស្ថិតក្នុងសភាពធ្ងន់ធ្ងរនោះទេ៕អត្ថបទ រដ្ឋា

ប្រធានក្រុមការងារ ចុះជួយឃុំក្នុងខេត្តស្វាយរៀង ស្នើឱ្យពលរដ្ឋបង្កើនការចូលរួមទប់ស្កាត់ជំងឺកូវីដ-១៩

ស្វាយរៀង ៖ ប្រធានក្រុមការងារចុះជួយឃុំ ក្នុងខេត្តស្វាយរៀង បានអំពាវនាវឱ្យពលរដ្ឋបង្កើនការចូលរួមទប់ស្កាត់ ការឆ្លងរាលដាលជំងឺកូវីដ-១៩ ខណៈវាបាននឹងកំពុងឆ្លងរាលដាលច្រើនគួរឱ្យព្រួយបារម្ភ ក្នុងចំណោមកម្មកររោងចក្រ ក្នុងក្រុងបាវិត។លោក ប៉ាង ឡេង ប្រធានក្រុមការងាររាជរដ្ឋាភិបាល ចុះជួយឃុំសំឡី ស្រុកកំពង់រោទិ៍ ខេត្តស្វាយរៀង ក្នុងពិធីផ្ដល់ស្បៀងរបស់រាជរដ្ឋាភិបាល ជូនអតីតយុទ្ធជន និងគ្រួសារ ចំនួន៣០គ្រួសារ នៅក្នុងឃុំសំឡី ស្រុកកំពង់រោទិ៍ កាលពីម្សិលមិញ បានអំពាវនាវដល់ប្រជាពលរដ្ឋ បន្តអនុវត្តវិធានការសុខាភិបាល ពិសេស វិធានករ ៣ការពារ និង ៣កុំ ឱ្យបានខ្ជាប់ខ្ជួន ដើម្បីចូលរួមទប់ស្កាត់ការឆ្លងរាលដាលជំងឺកូវីដ១៩ ចូលសហគមន៍ ខណៈដែលជំងឺនេះ បាននឹងកំពុងផ្ទុះ និងចម្លងក្នុងចំណោមកម្មករ កម្មការិនី ដែលជាកូន ជាចៅ នៅក្នុង និងនៅជិតៗមូលដ្ឋាននេះ។លោក បានបន្តថា ជំងឺកូវីដ១៩ ជាជំងឺ ដែលសកលលោក បាននឹងកំពុងយកចិត្តទុកដាក់កម្ចាត់ ដូច្នេះក្នុងនាមជាប្រជាពលរដ្ឋ ត្រូវតែមានកាតព្វកិច្ចចូលរួមកម្ចាត់ជំងឺនេះផងដែរ ដោយប្រកាន់ខ្ជាប់នូវវិធានការសុខាភិបាល មិនត្រូវចេញទៅណាផ្ដេសផ្ដាស និងកុំជួបជុំគ្នាច្រើន ក្នុងករណីមិនចាំបាច់ ដោយ ងាកមកប្រើពេលវេលានេះ គិតគូរដាំដុះបន្លែបង្ការ ចិញ្ចឹមសត្វ ដើម្បីហូបចុក និងបម្រើទីផ្សារ ដើម្បីបង្កើនប្រាក់ចំណូលគ្រួសារ។តំណាងគ្រួសារអតីតយុទ្ធជន ដែលបានទទួលអំណោយរាជរដ្ឋាភិបាល បានថ្លែងអំណរគុណចំពោះប្រមុខរាជរដ្ឋាភិបាល សម្តេចតេជោ ហ៊ុន សែន នាយករដ្ឋមន្ត្រី និងជាប្រធានសហគមន៍អតីតយុទ្ធជនកម្ពុជា ដែលបានបន្តគិតគូរឧបត្ថម្ភស្បៀងអាហារ សម្ភារប្រើប្រាស់ ពិសេសប្រាក់បៀរវត្សរ៍ប្រចាំខែ បានទាន់ពេលដល់ពួកគេ។លោក ប៉ែន សុវណ្ណនី ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តស្វាយរៀង បានបញ្ជាក់អំពីការយកចិត្តទុកដាក់របស់រាជរដ្ឋាភិបាលចំពោះអតីតយុទ្ធជន និងគ្រួសារមានគុណបំណាច់។ក្នុងរយៈពេលប៉ុន្មានថ្ងៃចុងក្រោយនេះ នៅក្នុងតំបន់សេដ្ឋកិច្ចពិសេស មួយចំនួន ក្នុងក្រុងបាវិត បានរងនូវការគំរាមកំហែងដោយជំងឺកូវីដ-១៩ ដែលបាននឹងកំពុងឆ្លងរាលដាលលើកម្មកររោងចក្រ ដែល ក្នុងមួយថ្ងៃ គឺរហូតដល់ជិត១០០នាក់៕អត្ថបទ៖ ភា សារិត

សម្តេចកិត្តិព្រឹទ្ធបណ្ឌិត ចាត់តំណាងចុះពិនិត្យការសាងសង់ផ្ទះជូនអតីតយុទ្ធជននៅខេត្តពោធិ៍សាត់

ពោធិ៍សាត់៖ នៅថ្ងៃទី២២ ខែឧសភា ឆ្នាំ២០២១ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យក្រុមការងារកាកបាទក្រហមកម្ពុជា ដឹកនាំដោយលោកជំទាវ ម៉ែន នារីសោភ័គ អគ្គលេខាធិការរងទី១ រួមជាមួយឯកឧត្តមទេសរដ្ឋមន្ត្រី គន់ គីម អគ្គលេខាធិកាសមាគមអតីតយុទ្ធជនកម្ពុជា និងឯកឧត្តម ម៉ៅ ធនិន អភិបាលខេត្តពោធិ៍សាត់ ចុះជួបសំណេះសំណាល សួរសុខទុក្ខគ្រួសារអតីតយុទ្ធជនក្រីក្រ និងមានពិការភាពចំនួន ៤២គ្រួសារ ដែលបានចូលមករស់នៅក្នុងផ្ទះសាងសង់រួចជាបណ្តើរៗ ក្នុងចំណោម ៦២៨ខ្នងផ្ទះ និងសំណេះសំណាលជាមួយកងកម្លាំង និងក្រុមជាងសាងសង់ផ្ទះមកពីសមាគមអតីតយុទ្ធជន និងមន្ត្រីពាក់ព័ន្ធទាំងអស់ ដែលបានខិតខំបំពេញការងាររៀបចំហេដ្ឋារចនាសម្ព័ន្ធភូមិឋានថ្មីនេះ។ លោកជំទាវ ម៉ែន នារីសោភ័គ បានមានប្រសាសន៍ថា ដោយមានការគិតគូរពីស្ថានភាពរស់នៅរបស់គ្រួសារអតីតយុទ្ធជន ដែលកន្លងបានលះបង់យ៉ាងធំធេង ចំពោះជាតិមាតុភូមិ ក៏ដូចជាការចូលរួមចំណែកជាមួយរាជរដ្ឋាភិបាល សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានសម្រេចផ្តល់ថវិកាចំនួន ៥០ម៉ឺនដុល្លារ ក្នុងជំហានទី១ តាមរយៈសមាគមអតីតយុទ្ធជនកម្ពុជា សម្រាប់សង់ផ្ទះជូនគ្រួសារអតីតយុទ្ធជនក្រីក្រ និងមានពិការភាពសរុបចំនួន ៦២៨គ្រួសារ នៅលើដីសម្បទានសង្គមកិច្ចទំហំជាង ៩០០ហិកតា ដោយក្នុង១គ្រួសារ ទទួលបានដី ៧០ម៉ែត្រ x ១៥០ម៉ែត្រ ស្ថិតនៅតំបន់ដំណាក់ត្រយឹង ឃុំព្រងិល ស្រុកក្រវាញ ខេត្តពោធិ៍សាត់។ ដោយផ្ទះនីមួយៗមានទំហំ ៥ម៉ែត្រ x ៧ម៉ែត្រ គ្រឿងបង្គុំធ្វើពីដែក សសរបេតុង ជញ្ជាំងស្មាតបត ដំបូលស័ង្កសី តតាកក្រោយផ្ទះជាចង្ក្រានបាយ និងបង្គន់អនាម័យដាច់ដោយឡែក ដែលចំណាយថវិកាក្នុង១ខ្នងផ្ទះតម្លៃ ៣៥០០ដុល្លារអាមេរិក។គួរបញ្ជាក់ថា កាកបាទក្រហមកម្ពុជា និងសមាគមអតីតយុទ្ធជន រួមជាមួយគណៈបញ្ជាការឯកភាពខេត្តពោធិ៍សាត់ និងមន្ត្រីពាក់ព័ន្ធទាំងអស់ បានប្រើប្រាស់កម្លាំងសរុប មធ្យោបាយសរុប ដើម្បីពន្លឿនដំណើរការរៀបចំហេដ្ឋារចនាសម្ព័ន្ធ ផ្លូវថ្នល់ សាងសង់ផ្ទះចំនួន ៦២៨ខ្នង សង់បង្គន់អនាម័យ ខួងអណ្តូងទឹក បំពាក់ប្រព័ន្ធសូឡា ឱ្យបានឆាប់រហ័ស ដើម្បីផ្តល់ជូនគ្រួសារអតីតយុទ្ធជនទាន់រដូវវស្សា ដែលជារដូវបង្កបង្កើនផល។ ជាមួយគ្នានេះ កាកបាទក្រហមកម្ពុជា នឹងធ្វើពិធីប្រគល់-ទទួលផ្ទះចំនួន ៥០ខ្នង នៅសប្តាហ៍ទី២ ខែមិថុនាខាងមុខ និងប្រគល់ជូនទៅតាមកាលបរិច្ឆេទបន្តបន្ទាប់ទៀត។ ក្នុងឱកាសនោះ ក្រុមការងារកាកបាទក្រហមកម្ពុជា ក៏បាននាំយកនូវស្បៀងអាហារមួយចំនួនប្រគល់ជូនដល់កងកម្លាំង និងក្រុមជាងសាងសង់ផ្ទះផងដែរ៕

យុទ្ធនាការចាក់វ៉ាក់សាំងកូវីដ-១៩សម្រេចបានជាង២២% ពលរដ្ឋជាង២.២៦លាននាក់បានចាក់វ៉ាក់សាំង

ភ្នំពេញ៖ របាយការណ៍របស់គណៈកម្មការចំពោះកិច្ចការចាក់វ៉ាក់សាំងបង្ការជំងឺកូវីដ-១៩ បានឱ្យដឹងថា ដំណើរការចាក់វ៉ាក់សាំងទូទាំងប្រទេសសម្រេចបានខ្ទង់ ២២.២៦ភាគរយ ហើយនៅត្រឹមថ្ងៃម្សិលមិញនេះ។របាយការណ៍ដដែលនេះ បានឱ្យដឹងថា ដំណើរការចាក់វ៉ាក់សាំងទូទាំងប្រទេស បានផ្ដល់វ៉ាក់សាំងជូនប្រជាពលរដ្ឋបានដល់ទៅជាង ២លាន ២២ម៉ឺននាក់ចាប់ពីថ្ងៃចាប់ផ្ដើមយុទ្ធនាការកាលពីថ្ងៃទី១០ ខែកុម្ភៈ រហូតមកដល់ថ្ងៃទី២១ ខែឧសភាម្សិលមិញនេះ។របាយការណ៍នេះ បានឱ្យដឹងទៀតថា ដំណើរការចាក់វ៉ាក់សាំងនេះ សម្រេចបាន ២២.២៦ភាគរយ នៃចំនួនពលរដ្ឋសរុប ១០លាននាក់ ដែលរាជរដ្ឋាភិបាលបានកំណត់ចាក់វ៉ាក់សាំងជូននៅត្រឹមដំណាច់ឆ្នាំ២០២១នេះ។បើតាមរបាយការណ៍ដដែលនេះ ប្រជាពលរដ្ឋដល់ទៅជាង ១លាន ៤៤ម៉ឺននាក់ហើយបានទទួលវ៉ាក់សាំងទាំងពីរដូសរួចរាល់ហើយនៅអំឡុងរយៈពេល ១០១ថ្ងៃមកនេះ។ក្នុងរយៈពេលនេះ ប្រជាពលរដ្ឋដល់ទៅជិត ២លាន ៣០ម៉ឺននាក់ បានស្ម័គ្រចិត្តដើម្បីទទួលការចាក់វ៉ាក់សាំង ប៉ុន្តែ ប្រជាពលរដ្ឋជិត ៧ម៉ឺននាក់ មិនត្រូវបានអនុញ្ញាតឱ្យចាក់វ៉ាក់សាំងទេដោយសារបញ្ហាសុខភាព៕

អំណោយរបស់ឯកឧត្តមបណ្ឌិត ហ៊ុន ម៉ាណែត ត្រូវបានប្រគល់ជូនគណបក្សស្រុក និងក្រុមការងារយុវជនឃុំទាំង១៥ នៅស្រុកព្រៃឈរ

កំពង់ចាម ៖ អំណោយរបស់ឯកឧត្តមបណ្ឌិត ហ៊ុន ម៉ាណែត និងលោកជំទាវ ត្រូវបានក្រុម ការងារជនបង្គោលយុវជនថ្នាក់កណ្តាលដឹកនាំដោយឯកឧត្តម ជ្រុន ថេរ៉ាវ៉ាត និងសហការី នាំយកទៅប្រគល់ជូនគណបក្សស្រុក,ក្រុមការងារយុវជនស្រុក និងក្រុមការងារយុវជនឃុំទាំង១៥ នៅថ្ងៃទី ២២ខែឧសភានេះ ។អំណោយទាំងនោះរួមមាន ៖ អង្ករ ៤ តោន,មីជាតិ ២០០កេះ,ទឹកបរិសុទ្ធ ៥០០ យូរ,ម៉ាស់ ៤៥,០០០ ម៉ាស់, អាល់កុល ១៨ ធុង ស្មើ ៤៥០ លីត្រ និងធុងសម្រាប់បាញ់អាល់កុលចំនួន ១០០ ធុង ។ ជាមួយគ្នានោះដែរ ឯកឧត្តម ក៏បានទៅពិនិត្យមើលទីតាំងមណ្ឌលចត្តាឡីស័កនៅវិទ្យាល័យ ហ៊ុន សែន ព្រៃទទឹង ដែលអាចទទួលព្យាបានប្រមាណ៤០០ នាក់ ។

អគារទីទួលសុវត្ថិភាពចំនួន២នៅខេត្តពោធិ៍សាត់ ជាជំនួយរបស់ជប៉ុន បានដាក់ឲ្យដំណើរការហើយ

ពោធិ៍សាត់ ៖ អគារទីទទួលសុវត្ថិភាពចំនួន២នៅខេត្តពោធិ៍សាត់ សម្រាប់ឱ្យប្រជាពលរដ្ឋស្នាក់អាស្រ័យ នៅពេលជួបគ្រោះទឹកជំនន់នោះ បានសម្ពោធដាក់ឲ្យដំណើរការជាស្ថាពរហើយអគារទីទួលសុវត្ថិភាពទាំងពីរនេះ ជាការបង្កើតឡើងក្រោមកិច្ចសហការរវាងអង្គការស្បៀងអាហារពិភពលោក និងគណៈកម្មាធិការជាតិគ្រប់គ្រងគ្រោះមហន្តរាយ។នៅក្នុងពិធីដាក់ឱ្យដំណើរអគារទីទួលសុវត្ថិភាពនេះគឺប្រព្រឹត្តិទៅ នាថ្ងៃទី២១ ខែឧសភា ឆ្នាំ២០២១នេះ ក្រោមអធិបតីភាព លោក ម៉ៅ ធនិន្ទ អភិបាលខេត្តពោធិ៍សាត់ និងលោកស្រី Emma Conlan តំណាងអង្គការស្បៀងអាហារពិភពលោកប្រចាំប្រទេសកម្ពុជា និងមន្រ្តីមកពីគណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.)។ថ្លែងនៅក្នុងកម្មវិធីនោះ លោកម៉ៅ ធនិន្ទ បានឲ្យដឹងថា ប្រជាពលរដ្ឋនៅតាមបណ្តាឃុំមួយចំនួនក្នុងស្រុកបាកាន និងស្រុកកណ្ដើង តែងរងគ្រោះទឹកជំនន់ ហើយជួបការលំបាកខ្លាំង ខ្វះទីទួលសុវត្ថិភាពនៅពេលមានការជម្លៀសចេញពីភូមិឋានពេលទឹកជំនន់ម្ដងៗ។ លោកបានបញ្ជាក់បន្ថែមថា អគារទួលសុវត្ថិភាពទាំងពីរនេះ ត្រូវបានចំណាយថវិកាសាងសង់ដែលជាគាំទ្រដោយរដ្ឋាភិបាលជប៉ុនប្រមាណ ៤៤ម៉ឺនដុល្លារអាមេរិក ហើយអគារទីទួលសុវត្ថិភាពនេះ មួយទីតាំងស្ថិតនៅភូមិឫស្សីតាម៉ាន់ ឃុំបឹងបត់កណ្តោល ស្រុកបាកានដែលមានទំហំអគារ ៨៦៤ម៉ែត្រការ៉េ សង់លើដីសាធារណៈរបស់រដ្ឋ។ លោក បន្តថា មួយទីតាំងទៀត ស្ថិតនៅក្រោយវត្តក្តីឧត្តម ភូមិក្តីល្អិត ឃុំស្រែស្តុក ស្រុកកណ្ដើង ដែលមាន ទំហំអគារ ១៦៨៥.០៦ម៉ែត្រការ៉េ សង់លើដីជាការបរិច្ចាគរបស់ព្រះចៅអធិការវត្តក្តីឧត្តម។ អគារទួលសុវត្ថិភាពនេះ បានចាប់ផ្តើមសាងសង់នៅឆ្នាំ២០២០ ហើយបានបញ្ចប់ការសាងសង់ ជាស្ថាពរនៅខែមេសា ឆ្នាំ២០២១ថ្មីៗនេះ ក្រោមការតាមដានត្រួតពិនិត្យផ្ទាល់ពីគណៈកម្មាធិការជាតិគ្រប់គ្រង គ្រោះមហន្តរាយ អាជ្ញាធរខេត្ត ស្រុក ឃុំ និងអង្គការស្បៀងអាហារពិភពលោកជាដើម។ដោយសារការខ្វះហេដ្ឋារចនាសម្ព័ន្ធទីទួលសុវត្ថិភាពនេះ បានបង្កការលំបាកជាខ្លាំងសម្រាប់ការស្នាក់អាស្រ័យរបស់ប្រជាពលរដ្ឋទាំងការបន្ទោរបង់ និងការប្រើប្រាស់ទឹកស្អាតជាដើម។ អគារទីទួលសុវត្ថិភាពនេះ បានបំពាក់នូវហេដ្ឋារចនាសម្ព័ន្ធទាំងអស់នេះ ដែលជួយសម្រួលដល់ការស្នាក់អាស្រ័យរបស់ពេលក្នុងកំលុងពេលជម្លៀសពីលំនៅឋានរបស់ពួកគាត់។ លោកអភិបាលខេត្ត បានឲ្យដឹងផងដែរថា អគារទីទួលសុវត្ថិភាពនេះ ត្រូវបានសាងសង់ឡើងដោយផ្អែកលើស្ដង់ដារអន្តរជាតិ និងបំពាក់ទៅដោយសម្ភារៈ កន្លែងសំខាន់ៗ ដូចជាផ្ទះបាយ កន្លែងបោកគក់ បន្ទប់ស្តុកអីវ៉ាន់ បន្ទប់ទឹក កន្លែងលាងដៃ កន្លែងសត្វ ប្រព័ន្ធទឹក អគ្គិសនី និង ប្រព័ន្ធការពារន្ទះជាដើម។ថ្លែងនៅក្នុងពិធីនោះដែរ លោកស្រី Emma Conlan តំណាងអង្គការស្បៀងអាហារពិភពលោកប្រចាំប្រទេសកម្ពុជា បានលើកឡើងថា ប្រទេសកម្ពុជា គឺជាប្រទេសមួយក្នុងចំណោមប្រទេសដែលងាយទទួលរងផលប៉ះពាល់ពីការប្រែប្រួលធាតុអាកាស ដូចជាទឹកជំនន់ និងគ្រោះរាំងស្ងួតជាដើម។ លោក ស្រីបន្តថា ការស្ថាបនាមជ្ឈមណ្ឌលទាំងនេះ គឺជាផ្នែកមួយនៃភាពជាដៃគូយូរអង្វែងរវាងកម្មវិធីស្បៀងអាហារពិភពលោក និងគណៈកម្មាធិការជាតិគ្រប់គ្រងគ្រោះមហន្តរាយ ដើម្បីកាត់បន្ថយហានិភ័យ គ្រោះមហន្តរាយ និងពង្រឹងការត្រៀមបង្ការ និងការឆ្លើយតបជាបន្ទាន់នៅក្នុងប្រទេស។លោកស្រី បានលើកឡើងទៀតថា« អគារទួលសុវត្ថិភាពនេះ គឺមានសារសំខាន់ខ្លាំងណាស់សម្រាប់ប្រជាពលរដ្ឋក្នុងភូមិ ឃុំ ដែលប្រឈមគ្រោះទឹកជំនន់ ដែលអាចធ្វើការជម្លៀសពីលំនៅឋានរងគ្រោះដោយទឹក ជំនន់ មកស្នាក់នៅបណ្តោះអាសន្នបានរហូតដល់ទឹកជំនន់ស្រកទៅវិញ»។ថ្លែងនៅក្នុងពិធីសម្ពោធនោះដែរ លោក ឡាំ ហេងហួត អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.) បានថ្លែងកោតសរសើរ ការខិតខំប្រឹងប្រែងរបស់គណៈកម្មាធិការគ្រប់គ្រងគ្រោះមហន្តរាយ រាជធានី ខេត្ត លើការឆ្លើយតបគ្រោះមហន្តរាយកន្លងមក ហើយត្រូវបន្តប្រកាន់ខ្ជាប់នូវគោលការណ៍ គឺផែនការត្រៀមបង្ការកម្រិតសហគមន៍មូលដ្ឋាន និងក្រុមគ្រួសារ។ លោក ក៏បានបន្តណែនាំគណៈកម្មាធិការគ្រប់គ្រងគ្រោះមហន្តរាយឃុំ/សង្កាត់ ឱ្យគ្រួសារនីមួយៗ ដែលប្រឈមនឹងហានិភ័យគ្រោះមហន្តរាយរៀបចំផ្ទះសំបែង ឱ្យបានរឹងមាំធន់នឹងទឹកជំនន់ ខ្យល់កន្ត្រាក់។ល។ គ្រួសារនីមួយៗត្រូវដឹងពីទីទួលសុវត្ថិភាពនៅជិតបំផុត ផ្លូវដែលត្រូវទៅកាន់ទីនោះ និងទីតាំងមណ្ឌលសុខភាព។ រៀបចំមធ្យោបាយដឹកជញ្ជូន និងប្រកាសឱ្យប្រជាជនដឹងលេខទូរស័ព្ទរបស់គណៈកម្មាធិការគ្រប់គ្រងគ្រោះមហន្តរាយឃុំ/សង្កាត់របស់ខ្លួន និងជំរុញឱ្យតាមគ្រួសារចុះឈ្មោះក្នុងប្រព័ន្ធប្រកាសប្រាប់ឱ្យដឹងជាមុន ១២៩៤ ងាយស្រួល ក្នុងការទទួលដំណឹងពីមុខសញ្ញាគ្រោះថ្នាក់គ្រោះមហន្តរាយផងដែរ៕អត្ថបទបាន ចក់

វិស័យឯកជន និងសប្បុរសជនចូលរួមទប់ស្កាត់ជំងឺកូវីដ-១៩ នៅកម្ពុជាតាមរយៈការផ្តល់ជំនួយ

ភ្នំពេញ៖ វិស័យឯកជន និងសប្បុរសជនចំនួន ០៩ទៀត បានចូលរួមគាំទ្រដល់រាជរដ្ឋាភិបាលកម្ពុជា ក្នុងដំណើរការងារចាក់វ៉ាក់សាំង និងការទប់ស្កាត់ជំងឺកូវីដ-១៩នៅកម្ពុជា ក្រោមការសម្របសម្រួលរបស់ ឯកឧត្ដមទេសរដ្ឋមន្ត្រី លី ធុជ តាមរយៈ លោក សាឡា អេអ៊ីសា ដោយប្រគល់សម្ភារចាំបាច់មួយចំនួន ជូនលោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈ កម្មការចំពោះកិច្ចចាក់វ៉ាក់សាំងកូវីដ-១៩ នារសៀលថ្ងៃទី២០ ខែឧសភា ឆ្នាំ២០២១ នៅទីស្តីការក្រសួងសុខាភិបាល។ សម្ភារដែលត្រូវប្រគល់ជូននោះ រួមមាន៖ សម្លៀកបំពាក់ពេទ្យ(PPE), ឧបករណ៍វាស់សម្ពាធឈាម, ម៉ាស៊ីនស្កេនកម្ដៅ, កុំព្យូទ័រ, ស្រោមដៃ, ស្រោមជើង, វ៉ែនតាសុវត្ថិភាព, មួកការពារ, របាំងមុខ, ម៉ាស់, អាលកុល, ជែលសរុបថវិកាប្រមាណ ៥ម៉ឺនដុល្លារអាមេរិក។វិស័យឯកជន និងសប្បុរសជនទាំង ០៩ រួមមាន៖ទី១៖ H.E SALAH A ESSA ទី២៖ MANHATTAN SPECIAL ECONOMIC ZONE & MEDTECS GROUP ទី៣៖ HONG LEONG BANK CAMBODIAទី៤៖ MITSUBISHI CORPORATION ទី៥៖ INTERNATIONAL BUSINESS CHAMBER OF CAMBODIAទី៦៖ GIGA SPECIAL ECONOMIC & BAVET SQUAREទី៧៖ CAMBODIA INVESMENT MANAGEMENT TAX SERVICE *ទី៨៖ TILLEKE & GIBBINS (CAMBODIA) LTDទី៩៖ MR. ANTREW TEY។ ឯកឧត្តមទេសរដ្ឋមន្ត្រី លី ធុជ បានបញ្ជាក់ថា នេះជាលើកទី២ ក្រោមការសម្របសម្រួលរបស់ឯកឧត្តម ក្នុងនាមរាជរដ្ឋាភិបាលកម្ពុជា តាមរយៈ លោក សាឡា អេអ៊ីសា ដែលបាននាំមកនូវសម្ភារប្រគល់ជូនក្រសួងសុខាភិបាល តាមរយៈគណៈកម្មការចំពោះកិច្ចចាក់វ៉ាក់សាំងកូវីដ-១៩ សម្រាប់ប្រើប្រាស់ក្នុងការងារចាក់វ៉ាក់សាំង និងការងារប្រយុទ្ធប្រឆាំងនឹងការរីករាលជំងឺកូវីដនៅកម្ពុជា ក្នុងនោះលើកទី១ មានអ្នកវិនិយោគបរទេស និងសប្បុរសជនចំនួន ១៤ បានប្រគល់ជូនកាលពីថ្ងៃទី១៣ ខែមេសា ឆ្នាំ២០២១ គិតជាទឹកប្រាក់ប្រមាណ ៣០ ម៉ឺនដុល្លារ ដែលជំនួយសប្បុរសធម៌នេះ នឹងមកដល់ជាបន្តបន្ទាប់ទៀត។ឯកឧត្តមទេសរដ្ឋមន្ត្រី បានលើកឡើងថា អំណោយសប្បុរសនេះ គឺបានឆ្លុះបញ្ចាំងឲ្យឃើញអំពីការយកចិត្តទុកដាក់ និងទឹកចិត្តសាមគ្គីគ្នា ក្នុងការចូលរួមចំណែកពីសំណាក់ក្រុមធុរកិច្ចទាំងអស់ និងសប្បុរសជននានា គាំទ្ររាជរដ្ឋាភិបាលកម្ពុជា សំដៅឱ្យដំណើរការងារចាក់វ៉ាក់សាំង និងការប្រយុទ្ធប្រឆាំងការរីករាលដាលជំងឺកូវីដ១៩ បានប្រព្រឹត្តទៅដោយជោគជ័យ។ ជាងនេះទៅទៀត ឯកឧត្តម ទេសរដ្ឋមន្ត្រី ក៏បានសម្តែងនូវការដឹងគុណ និងវាយតម្លៃខ្ពស់ចំពោះកិច្ចខិតខំប្រឹងប្រែង និងការពលីគ្រប់បែបរបស់ក្រុមគ្រូពេទ្យ ក៏ដូចជាកងកម្លាំងប្រដាប់អាវុធ ដែលបានបំពេញបេសកកម្មការងារដ៏មានតម្លៃ និងសកម្មបំផុត ក្នុងការជួយសង្គ្រោះអាយុជីវិតរបស់បងប្អូនប្រជាពលរដ្ឋកម្ពុជា ដែលទទួលរងផលប៉ះពាល់ដោយសារជំងឺកូវីដ-១៩ ព្រមទាំងបានជួយជ្រោមជ្រែងដល់ការអនុវត្តនូវវិធានការការពារទប់ស្កាត់ និងការឆ្លើយតបទៅនឹងការរីករាលដាលជំងឺកូវីដ១៩៕ អត្ថបទ៖ ដាវណ្ណ

រដ្ឋបាលខេត្តកោះកុង ផ្តើមកែលម្អសួនច្បារ និងរៀបការ៉ូឡាថ្មីជាង៥០០ម៉ែត្រ

កោះកុង ៖ រដ្ឋបាលខេត្តកោះកុង សហការជាមួយក្រុមហ៊ុនម៉ៅការឯកជន ផ្តើមអនុវត្តគម្រោងកែលម្អសួនច្បារ និងរៀបចំការ៉ូឡាថ្មីជាង៥០០ម៉ែត្រ ដើម្បីលើកកម្ពស់សោភ័ណភាពទីក្រុង ព្រមទាំងទាក់ទាញភ្ញៀវទេសចរបន្ថែម។គម្រោងសាងសង់កែលម្អសួនច្បារក្រោលការ៉ូក្រនីត ចាក់បេតុងចិញ្ចើម ផ្លូវសងខាងសួន និងរៀបជម្រាលជើងទេរថ្មភ្នំប្រវែងបណ្តោយ៥០០ម៉ែត្រ និងទទឹង២៧ម៉ែត្រ នឹងលេចរូបរាងចេញជាស្ថាពរនៅចុងឆ្នាំ២០២១ខាងមុខនេះ។នេះបើតាមការបញ្ជាក់របស់លោក វ៉ែន សុខា នាយកទីចាត់ការផែនការ និងវិនិយោគខេត្តកោះកុង ថ្លែងនៅថ្ងៃទី២១ ខែឧសភា ថា មូលហេតុដែលរដ្ឋបាលខេត្ត ផ្ដួចផ្ដើមបង្កើតជាគម្រោងនេះឡើងចាប់ពីមុខផ្ទះអតីតអភិបាលខេត្តរហូតដល់មុខបញ្ជាការដ្ឋានកងរាជអាវុធហត្ថ ក្រោយការមើលឃើញពីស្ថានភាពសួនច្បារនៅមិនទាន់ស្អាតល្អ និងបង្កើនភាពទាក់ទាញសម្រាប់ប្រជាពលរដ្ឋ និងភ្ញៀវអ្នកទេសចរគ្រប់មជ្ឈដ្ឋាន។លោក វ៉ែន សុខា គូសបញ្ជាក់ទៀតថា បើគ្មានការប្រែប្រួលទេ គម្រោងអនុវត្តខាងលើ នឹងបិទបញ្ចប់ចុងឆ្នាំ២០២១ខាងមុខនេះហើយ។ កាលដែលទើបតែផ្ដើមអនុវត្ត ក៏ព្រោះតែការផ្ទុះព្រឹត្តិការណ៍ឆ្លងជំងឺកូវីដ១៩សហគមន៍ ២០ កុម្ភៈ បង្កឱ្យមានការពន្យារពេលវេលា។ ក្រៅពីកែលម្អសួនច្បារ រៀបចំការ៉ូឡាថ្មី បន្ថែមបង់អង្គុយ រដ្ឋបាលខេត្ត ក៏មានបំណងបញ្ជាទិញឧបករណ៍ក្មេងលេងកម្សាន្តផងដែរ គ្រាបច្ចុប្បន្នទីរួមខេត្តមានតែកន្លែងហាត់ប្រាណមនុស្សចាស់ពេញវ័យ។ចំណែកឯក្រុមពលរដ្ឋ អាជីវករលក់ដូរនៅតាមដងផ្លូវក្បែរការដ្ឋានគម្រោង បានបង្ហាញការពេញចិត្តជាខ្លាំងពេលដឹងថា មានការកែលម្អថ្មីបែបនេះ ដោយសព្វថ្ងៃសួនច្បារមានតែដើមឈើ ព្រមទាំងបង់អង្គុយលេងបន្តិចបន្តួចប៉ុណ្ណោះ។ពលរដ្ឋ និងអាជីវករ រំពឹងទុកជាមុនថា នៅពេលគម្រោងកែលម្អសួនច្បារ រៀបចំការ៉ូឡាថ្មី ឬសួនកុមារ វារឹតតែលើកកម្ពស់សោភ័ណទីក្រុង ក៏ដូចជាបង្កើនការទាក់ទាញដល់ភ្ញៀវទេសចរមកលេងកម្សាន្តកាន់តែច្រើនឡើងថែមទៀត ក្រោយជំងឺកូវីដធូរស្រាលខ្លាំងជាងនេះ។គួរជម្រាបថា នេះគ្រាន់តែជាគម្រោងជំហានទី១ទេ នៅមានគម្រោងកែលម្អជំហានទី២ដែលនឹងបន្តចេញពីមុខបញ្ជាការដ្ឋានកងរាជអាវុធហត្ថទៅដល់មុខស្តូបវិមានឯករាជ្យ៕អត្ថបទ ៖ ឈឹម មករា

គ្រប់មន្ទីរពេទ្យរដ្ឋ និងឯកជន ត្រូវខិតខំផ្តល់សេវាពិនិត្យព្យាបាល ជំងឺទូទៅជូនពលរដ្ឋក្នុងបរិបទកូវីដ

ភ្នំពេញ ៖ ស្ថិតក្នុងបរិបទជំងឺកូវីដ-19 ក្រសួងសុខាភិបាល បានលើកឡើងថា មន្ទីរពេទ្យរដ្ឋ និងឯកជនអាចធ្វើតេស្តរកជំងឺកូវីដ-19 ក្នុងករណីចំបាច់ មុនអនុញ្ញាតដល់អ្នកជំងឺចូលសម្រាកព្យាបាលនៅមន្ទីរពេទ្យ ប៉ុន្តែករណីខ្លះ ក៏ត្រូវមានលើកលែងផងដែរ។មានប្រសាសន៍ប្រាប់BTV តាមបណ្តាញទំនាក់ទំនងតេឡេក្រោម នាថ្ងៃទី២១ ខែឧសភានេះ លោកវេជ្ជបណ្ឌិត ង៉ូវ កាង រដ្ឋលេខាធិការក្រសួងសុខាភិបាល និងជាប្រធានក្រុមការងារសម្របសម្រួលមណ្ឌលព្យាបាលអ្នកជំងឺកូវីដ-19 នៅសែនសុខ១ និងសែនសុខពីរ បានឱ្យដឹងថា តាមការណែនាំរបស់ក្រសួងសុខាភិបាលមន្ទីរពេទ្យរដ្ឋ និងជន អាចធ្វើតេស្តរកជំងឺកូវីដ-19 មុនអនុញ្ញាតដល់អ្នកជំងឺចូលសម្រាកព្យាបាលនៅមន្ទីរពេទ្យក្នុងករណីចាំបាច់ ដើម្បីការពារ កុំឱ្យឆ្លងជំងឺកូវីដ-19 ចូលមន្ទីរពេទ្យ ប៉ុន្តែករណីខ្លះក៏ត្រូវមានការលើកលែងផងដែរ ពោលគឺអាស្រ័យទៅលើការវាយតម្លៃរបស់ក្រុមគ្រូពេទ្យនៅទីតាំងនោះ។លើសពីនេះលោកវេជ្ជបណ្ឌិត បានស្នើដល់មន្ទីរពេទ្យមួយចំនួន មិនគួរមិនទទួលព្យាបាលអ្នកជំងឺដោយគ្មានហេតុផលនោះទេ ក្នុងបរិបទជំងឺកូវីដ-19នេះ។គិតត្រឹមថ្ងៃទី២១ខែឧសភានេះ ក្រសួងសុខាភិបាលសម្រេចអនុញ្ញាតដល់មន្ទីរពេទ្យឯកចំនួន៩០នៅទូទាំងប្រទេស អាចធ្វើតេស្តរកជំងឺកូវីដ-19បាន និងមន្ទីរពេទ្យឯកជនចំនួន៤ទទួលសម្រាក និងព្យាបាលអ្នកជំងឺកូវីដ-19 ។មន្ទីរពេទ្យទាំង៤នោះ រួមមាន ៖ មន្ទីរពេទ្យសង់ត្រាល់ មន្ទីរពេទ្យរ៉ូយ៉ាល់ភ្នំពេញ មន្ទីរពហុព្យាបាលវិសាលសុខ និងមន្ទីរពេទ្យសាកលវិទ្យាល័យអន្តរជាតិសែនសុខ។បើតាមលោកវេជ្ជបណ្ឌិត ជា សំអាន ប្រធានមន្ទីរពហុព្យាបាលវិសាលសុខ ដែលមានទីតាំងស្ថិតនៅផ្លូវមុនីរ៉ែត សង្កាត់ទូលស្វាយព្រៃ២ ខណ្ឌបឹងកេង រាជធានីភ្នំពេញ បានប្រាប់BTVឱ្យដឹងថា បច្ចុប្បន្នមន្ទីរពេទ្យបានរៀបចំកន្លែងដាច់ដោយឡែកពីគ្នារវាងអ្នកជំងឺកូវី-19 និងអ្នកជំងឺទូទៅ ដោយគោរពទៅតាមការណែនាំរបស់ក្រសួងសុខាភិបាល។ក្រៅពីនេះ លោកវេជ្ជបណ្ឌិត បញ្ជាក់ថា មន្ទីរពេទ្យបានបង្ហាញតម្លៃច្បាស់លាស់ទៅកាន់អ្នកជំងឺកូវីដ-19 មុនគាត់សម្រេចយល់ព្រមព្យាបាលនៅទីនេះ ឫមិនយល់ ដោយមិនមែនការបង្ខិតបង្ខំនោះទេ។ដើម្បីជួយសម្រាលបន្ទុករបស់មន្ទីរពេទ្យរដ្ឋ ក្រសួងសុខាភិបាលអនុញ្ញាតឱ្យសេវាព្យាបាលឯកជន និងសម្ភពស្របច្បាប់ក្នុងរាជធានីភ្នំពេញអាចព្យាបាលអ្នកជំងឺកូវីដ-19 បាន ដោយត្រូវស្នើទៅក្រសួងសុខាភិបាល និងត្រូវគោរពតាមលក្ខខណ្ឌមួយចំនួនដូចជា ៖ មានទីតាំងមូលដ្ឋានសុខាភិបាលឯកជនសមស្រប, មានផ្លូវ និងចំណតផ្លូវសមស្រប ,មានរថយន្តគិលានសង្គ្រោះ ដែលមានបំពាក់សម្ភារៈវេជ្ជសាស្ត្រគ្រប់គ្រាន់,មានបន្ទប់សមស្របដាក់អ្នកជំងឺព្យាបាល ដោយរក្សាសុវត្ថិភាពគ្រប់គ្រាន់ និងត្រូវផ្តល់របាយការណ៍ទៀងទាត់ និងទាន់ពេលវេលាមកក្រសួងសុខាភិបាលជាដើម៕អត្ថបទ ៖ ទូច សោភ័ណ

ក្រសួងអប់រំ មិនទាន់អាចកំណត់កាលបរិច្ឆេទបើកសាលាវិញនោះទេ ខណៈព្រឹត្តិការណ៍២០កុម្ភៈមិនទាន់បិទបញ្ចប់

ភ្នំពេញ ៖ ក្រសួងអប់រំយុវជន និងកីឡា គិតមកត្រឹមពេលនេះ មិនទាន់អាចកំណត់កាលបរិច្ឆេទបើកដំណើរការសាលារៀនទាំងរដ្ឋ និងឯកជនគ្រប់សិក្សាវិញនោះទេ។ ការមិនទាន់អាចសម្រេច និងកំណត់ពេលវេលាច្បាស់លាស់បើកសាលាឡើងវិញនេះ គឺដោយសារព្រឹត្តិការណ៍សហគមន៍ ២០កុម្ភៈ មិនទាន់បានបិទបញ្ចប់នៅឡើយ។ នេះជាការលើកឡើងរបស់ ឯកឧត្តម រស់ សុវាចា អ្នកនាំពាក្យក្រសួងអប់រំ។ក្រោយផ្អាកដំណើរការសាលារៀនទូទាំងប្រទេសចាប់តាំងពី ថ្ងៃទី ២០ខែមិនាមកទល់ពេលនេះ ក្រសួងអប់រំយុវជន និងកីឡា នៅតែមិនទាន់អាចកំណត់កាលបរិច្ឆេទបើកដំណើរការសាលារៀនទូទាំងប្រទេសវិញនោះទេ។ ការមិនទាន់អាចកំណត់នេះ គឺដោយសារតែព្រឹត្តិការណ៍សហគមន៍ ២០ កុម្ភៈមិនទាន់បានបិទបញ្ចប់ ហើយករណីឆ្លងនៅបន្តច្រើនរយនាក់ជារៀងរាល់ថ្ងៃ ទោះមួយរយៈពេលចុងក្រោយនេះ មានករណីឆ្លងថមថយមួយចំនួនក្ដី។ នេះជាការលើកឡើងរបស់ ឯកឧត្តម រស់ សុវាចា អ្នកនាំពាក្យក្រសួងអប់រំយុវជន និងកីឡា។ឯកឧត្តម អ្នកនាំពាក្យ លើកឡើងបន្ថែមថា ទោះបីជាមិនទាន់អាចកំណត់កាលបរិច្ឆេទបើកដំណើរការសាលារៀនឡើងវិញ យ៉ាងណាក្ដី ក្រសួងអប់រំក៏បានប្រជុំពីការកំណត់យុទ្ធសាស្ត្រសម្រាប់ការបើកសាលារៀនឡើងវិញ ក្រោយបិទបញ្ចប់ព្រឹត្តិការណ៍សហគមន៍ ២០កុម្ភៈ ដើម្បីសុវត្ថិភាព។ ម្យ៉ាងវិញទៀតខណៈពេលនេះ គ្រូបង្រៀននិងបុគ្គលិកអប់រំទូទាំងប្រទេសចំនួន ៨៥ភាគរយ នៃចំនួនសរុប១៥៨ ០០០នាក់បានចាក់វ៉ាក់សាំងរួចរាល់។ក្នុងដំណាក់កាលបច្ចុប្បន្ននេះ ក្រសួងអប់រំយុវជន និងកីឡា បន្តលើកទឹកចិត្តឱ្យសិស្សគ្រប់រូបត្រូវតែយកចិត្តទុកដាក់ដោយធ្វើស្វ័យសិក្សា និងសិក្សាតាមប្រពន្ធអនឡាញ។ ការសិក្សាតាមប្រព័ន្ធអនឡាញ ក្នុងប្រទេសកម្ពុជា បានចាប់ផ្ដើមអនុវត្តតាំងពីវិបត្តិកូវីដ-១៩ ដែលកើតឡើងតាំងពីឆ្នាំ ២០២០មកម្ល៉េះ។ បច្ចុប្បន្ននេះ ក្រសួងអប់រំក៏មានជម្រើសជាច្រើនសម្រាប់សិស្សគ្រប់រូបអាចសិក្សាពីចម្ងាយបាន ដោយមានការបង្រៀនតាមទូរទស្សន៍ ទទក ២ ការបង្រៀនតាមប្រព័ន្ធយូធូប និងការបង្រៀនតាមទំព័រហ្វេសប៊ុកផ្លូវការរបស់ក្រសួងអប់រំផងដែរ។ ថ្មីៗនេះក្រសួងអប់រំ ក៏បានសហការជាមួយសហភាពសហព័ន្ធយុវជនកម្ពុជា ដោយបានបង្កើតនិងដាក់ឱ្យប្រើប្រាស់ កម្មវិធីស្វ័យសិក្សា MoEYS E-Learning។ លើសពីនេះ ក៏មានការចូលរួមពីវិស័យឯកជន E-School Cambodia ដើម្បីផ្ដល់ការសិក្សាតាមប្រព័ន្ធអនឡាញផងដែរ។បច្ចុប្បន្ននេះ កម្ពុជាកំពុងជំរុញយុទ្ធនាការចាក់វ៉ាក់សាំងកូវីដ-១៩ ទូទាំងប្រទេស ជាពិសេសនៅទីតាំងភូមិសាស្ត្រដែលមានការឆ្លងខ្ពស់ដូចជានៅរាជធានីភ្នំពេញ។ គិតមកត្រឹមថ្ងៃទី ២០ឧសភា កម្ពុជាបានចាក់វ៉ាក់សាំងដល់ពលរដ្ឋចំនួន ២ ១៩៨ ៥៤៧ នាក់ នៃចំនួនប្រជាជនគោលដៅទទួលការចាក់វ៉ាក់សាំងចំនួន ១០លាននាក់។ យ៉ាងណាម៉ិញ មកទល់ពេលនេះកម្ពុជា មិនទាន់មានយុទ្ធនាការចាក់វ៉ាក់សាំងជូនដល់ប្រជាពលរដ្ឋ អាយុក្រោម១៨ឆ្នាំនោះទេ៕អត្ថបទ ៖ គឹមហុក

បណ្ដាញសង្គម

ព័ត៌មានថ្មីៗ

ករណីយុវតីម្នាក់ស្លាប់ក្នុងគ្រោះថ្នាក់ចរាចរណ៍នៅខណ្ឌដូនពេញ គឺជាការជួបគ្រោះថ្នាក់ដោយខ្លួនឯង ឯម៉ូតូមានបុរសម្នាក់ជួយយកទុកឲ្យប៉ុណ្ណោះ

ក្រសួងការពារជាតិកម្ពុជាទាត់ចោលការចោទប្រកាន់របស់ថៃ ដែលចោទថាទាហានកម្ពុជា ជាអ្នកបាញ់មុន ខណៈពិភពលោកគេបានដឹងថាទាហានថៃទៅវិញទេជាអ្នកឈ្លានពានមកលើកម្ពុជា

[UPDATE] ភ្លើងឆេះលំនៅឋានពលរដ្ឋនៅខណ្ឌជ្រោយចង្វាររលត់ហើយ

ក្រុមAOTបន្ដចុះសង្កេតការណ៍ផ្ទៀងផ្ទាត់ និងរាយការណ៍អំពីស្ថានភាពតាមបណ្តោយព្រំដែនកម្ពុជា-ថៃ នៅចំណុចកោះយ៉ស្ថិតក្នុងភូមិប៉ាក់ខ្លងឃុំប៉ាក់ខ្លងស្រុកមណ្ឌលសីមាខេត្តកោះកុង

នាយករដ្ឋមន្ត្រីប៉ាគីស្ថានប្រាប់កិច្ចប្រជុំកំពូល SCO ថា កតិកាសញ្ញាក្រុង Mecca មិនសំដៅលើរដ្ឋណាទេ

មនុស្សរាប់រយនាក់ត្រូវចាប់ខ្លួន និងអាវុធរាប់សិបដើមត្រូវរឹបអូស នៅឯពិធីបុណ្យ Notting Hill Carnival ក្នុងក្រុងឡុងដ្រ៍

រុស្ស៊ី៖ ការឆ្លើយតបរបស់ខ្លួនចំពោះសកម្មភាពអរិភាពនៅតំបន់បាល់ទិក នឹងមានលក្ខណៈធ្ងន់ធ្ងរ

តំណាងរាស្រ្តកូរ៉េខាងត្បូង៖កូរ៉េខាងជើង និងសហរដ្ឋអាមេរិក បង្ហាញសញ្ញានៃការចាប់ផ្តើមឡើងវិញកិច្ចសន្ទនា

រដ្ឋាភិបាលអូស្រ្តាលី បញ្ជូនជំនួយ និងគ្រឿងផ្គត់ផ្គង់សង្រ្គោះបន្ទាន់ដល់ប្រទេសនេប៉ាល់

ប្រធានាធិបតីអាល់ហ្សេរី អំពាវនាវឲ្យមានទោសប្រហារជីវិតសម្រាប់អ្នកដែលបង្កឲ្យមានភ្លើងឆេះព្រៃដោយចេតនា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

មន្ទីរពេទ្យព្រះអង្គឌួង គ្រោងដាក់ដំណើរការអគារសង្គ្រោះបន្ទាន់ព្យាបាលអ្នកជំងឺកូវីដ-១៩

ប្រធានក្រុមការងារ ចុះជួយឃុំក្នុងខេត្តស្វាយរៀង ស្នើឱ្យពលរដ្ឋបង្កើនការចូលរួមទប់ស្កាត់ជំងឺកូវីដ-១៩

សម្តេចកិត្តិព្រឹទ្ធបណ្ឌិត ចាត់តំណាងចុះពិនិត្យការសាងសង់ផ្ទះជូនអតីតយុទ្ធជននៅខេត្តពោធិ៍សាត់

យុទ្ធនាការចាក់វ៉ាក់សាំងកូវីដ-១៩សម្រេចបានជាង២២% ពលរដ្ឋជាង២.២៦លាននាក់បានចាក់វ៉ាក់សាំង

អគារទីទួលសុវត្ថិភាពចំនួន២នៅខេត្តពោធិ៍សាត់ ជាជំនួយរបស់ជប៉ុន បានដាក់ឲ្យដំណើរការហើយ

វិស័យឯកជន និងសប្បុរសជនចូលរួមទប់ស្កាត់ជំងឺកូវីដ-១៩ នៅកម្ពុជាតាមរយៈការផ្តល់ជំនួយ

រដ្ឋបាលខេត្តកោះកុង ផ្តើមកែលម្អសួនច្បារ និងរៀបការ៉ូឡាថ្មីជាង៥០០ម៉ែត្រ

គ្រប់មន្ទីរពេទ្យរដ្ឋ និងឯកជន ត្រូវខិតខំផ្តល់សេវាពិនិត្យព្យាបាល ជំងឺទូទៅជូនពលរដ្ឋក្នុងបរិបទកូវីដ

ក្រសួងអប់រំ មិនទាន់អាចកំណត់កាលបរិច្ឆេទបើកសាលាវិញនោះទេ ខណៈព្រឹត្តិការណ៍២០កុម្ភៈមិនទាន់បិទបញ្ចប់

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

មន្ទីរពេទ្យ​ព្រះអង្គ​ឌួង ​គ្រោង​ដាក់​ដំណើរការ​អគារ​សង្គ្រោះ​បន្ទាន់​ព្យាបាល​អ្នកជំងឺ​កូ​វីដ​-១៩

សម្តេចកិត្តិព្រឹទ្ធបណ្ឌិត ចាត់តំណាងចុះពិនិត្យការសាងសង់ផ្ទះជូនអតីតយុទ្ធជននៅខេត្តពោធិ៍សាត់

យុទ្ធនាការចាក់វ៉ាក់សាំងកូវីដ-១៩សម្រេចបានជាង២២% ពលរដ្ឋជាង២.២៦លាននាក់បានចាក់វ៉ាក់សាំង

អគារទីទួលសុវត្ថិភាពចំនួន២នៅខេត្តពោធិ៍សាត់ ជាជំនួយរបស់ជប៉ុន បានដាក់ឲ្យដំណើរការហើយ

វិស័យ​ឯកជន​ និង​សប្បុរសជន​ចូលរួម​ទប់ស្កាត់​ជំងឺ​កូ​វីដ​-១៩ ​នៅ​កម្ពុជា​តាមរយៈ​ការ​ផ្តល់​ជំនួយ​

រដ្ឋបាល​ខេត្តកោះកុង​ ផ្តើម​កែ​លម្អ​សួនច្បារ និង​រៀប​ការ៉ូឡា​ថ្មី​ជាង​៥០០​ម៉ែត្រ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

មន្ទីរពេទ្យព្រះអង្គឌួង គ្រោងដាក់ដំណើរការអគារសង្គ្រោះបន្ទាន់ព្យាបាលអ្នកជំងឺកូវីដ-១៩

វិស័យឯកជន និងសប្បុរសជនចូលរួមទប់ស្កាត់ជំងឺកូវីដ-១៩ នៅកម្ពុជាតាមរយៈការផ្តល់ជំនួយ

រដ្ឋបាលខេត្តកោះកុង ផ្តើមកែលម្អសួនច្បារ និងរៀបការ៉ូឡាថ្មីជាង៥០០ម៉ែត្រ