BTV NEWS

សម្តេចតេជោ ហ៊ុន សែន ជួបពិភាក្សាការងារតាមប្រព័ន្ធវីដេអូជាមួយប្រធានរដ្ឋសភា អាស៊ែបៃហ្សង់

គណៈប្រតិភូនៃសន្និសីទប្រធានសភានៃអន្តរសភា វាយតម្លៃខ្ពស់ចំពោះជោគជ័យនៃ «សន្និសីទប្រធានសភានៃអន្តរសភា លើកទី២» នៅកម្ពុជា

ប្រធានរដ្ឋសភាម៉ាឡេស៊ី ប្ដេជ្ញាបន្តលើកកម្ពស់កិច្ចសហប្រតិបត្តិការទ្វេភាគីជាមួយកម្ពុជាឱ្យកាន់តែរីកចម្រើន និងរឹងមាំ

ព្រីតថេន នឹងបន្តគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា

នយោបាយ និង ការអភិវឌ្ឍន៍

មន្ទីរសុខាភិបាល អំពាវនាវ ឱ្យពលរដ្ឋធ្លាប់ទាក់ទង ជាមួយស្ត្រីផ្ទុកកូវីដ-១៩ នៅបាត់ដំបង ទៅជួបជំនាញ

បាត់ដំបង ៖ មន្ត្រីមន្ទីរសុខាភិបាលខេត្តបាត់ដំបង បានអំពាវនាវដល់ពលរដ្ឋ ដែលធ្លាប់ប្រាស្រ័យទាក់ទង ជាមួយស្ត្រី ទើបឆ្លងកូវីដ១៩ មានទីលំនៅក្នុងសង្កាត់ក្ដុលដូនទាវ ក្រុងបាត់ដំបង ទៅជួបមន្ត្រីសុខាភិបាលខេត្ត ដើម្បីយកសំណាកទៅពិនិត្យរកកូវីដ១៩ និងដាក់ខ្លួននៅដាច់ដោយឡែក (ចត្តាឡីស័ក) ។ក្នុងពេលចុះផ្សព្វផ្សាយបញ្ហាជំងឺកូវីដ១៩ នៅព្រឹកថ្ងៃទី៣ ខែសីហា នេះក្នុងសង្កាត់ក្ដុលដូនទាវ លោកវេជ្ជបណ្ឌិត អ៊ុក វិទ្យា អនុប្រធានមន្ទីរសុខាភិបាលខេត្តបាត់ដំបង បានឱ្យដឹងថា បច្ចុប្បន្ន ស្ត្រីឆ្លងកូវីដ ១៩ ទើបមកពីអាមេរិកនោះ កំពុងសម្រាកព្យាបាលនៅក្នុងមន្ទីរពេទ្យបង្អែកខេត្ត ដោយក្រុមគ្រូពេទ្យជួរមុខ បាននឹងកំពុងយកចិត្តដាក់ថែទាំ ។ ចំពោះអ្នកធ្លាប់ប្រាស្រ័យទាក់ទង អំឡុងស្ត្រីឆ្លងជំងឺកូវីដ១៩នេះ ជំនាញទើបរកឃើញបាន៨នាក់ ដែលជាសមាជិកក្រុមគ្រួសារ ខណៈអ្នកផ្សេងទៀត មន្ត្រីសុខាភិបាល អាជ្ញាធរមូលដ្ឋាន កំពុងធ្វើការស្រាវជ្រាវស្វែងរកបន្ថែម ។លោកវេជ្ជបណ្ឌិត បានស្នើឱ្យអាជ្ញាធរមូលដ្ឋាន បន្តជួយស្រាវជ្រាវរកអ្នកធ្លាប់ជួបប្រាស្រ័យជាមួយ អ្នកជំងឺ ដើម្បីឲ្យពួកគេទៅជួបមន្ត្រីសុខាភិបាល ដើម្បីយកសំណាកទៅពិនិត្យ និងដើម្បីធ្វើចត្តាឡីស័ក ចៀសវាងកុំឱ្យមានការឆ្លងរាលដាលក្នុងសហគមន៍ ។លោក អែម ស៊ីយឿន ចៅសង្កាត់ក្ដុលដូនទាវ បានបញ្ជាក់ថា ក្រោយពីការរកឃើញផ្ទុកកូវីដ១៩ លើស្ត្រីម្នាក់ ក្នុងតំបន់នេះ ធ្វើឱ្យពលរដ្ឋមានការព្រួយបារម្ភ ដោយអ្នកខ្លះមិនហានចេញក្រៅ ។ស្ត្រី ដែលទើបឆ្លងកូវីដ១៩ រស់នៅក្នុងសង្កាត់ក្ដុលដូនទាវ ក្រុងបាត់ដំបងនេះ គឺជាអ្នកជំងឺ កូវីដទី ៩ហើយ ដែលបានរកឃើញនៅក្នុងខេត្តបាត់ដំបង ខណៈអ្នកឆ្លងចំនួន៨នាក់ ផ្សេងទៀត បានជាសះ ស្បើយអស់ហើយ៕អត្ថបទ៖ បាន សុខរិទ្ធ

ក្រសួងបរិស្ថានព្រមានចាត់វិធានការលើអ្នកទន្ទ្រានយកដីក្នុងដែនជម្រកសត្វព្រៃកែវសីមា

មណ្ឌលគិរី ៖ មន្ត្រីជាន់ខ្ពស់ក្រសួងបរិស្ថាន បានឱ្យដឹងថា ក្រសួងនឹងចាត់វិធានការម៉ឺងម៉ាត់វែកមុខអ្នកទន្ទ្រានយកដីក្នុងដែនជម្រកសត្វព្រៃកែវសីមា នៃខេត្តមណ្ឌលគិរី ដើម្បីថែរក្សាព្រៃឈើធ្វើជាទីជម្រកសត្វព្រៃកម្រៗ និងថែរក្សាជីវចម្រុះជាច្រើនប្រភេទ ដែលមាននៅក្នុងដែនជម្រកនេះ។ឯកឧត្តម នេត្រ ភត្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បាននឹងកំពុងដឹកនាំក្រុម ប្រតិភូក្រសួង និងក្រុមអ្នកសារព័ត៌មាន ចុះសិក្សាស្វែងយល់ពីការងារការពារធនធានធម្មជាតិ ក្នុងភូមិ សាស្ត្រខេត្តមណ្ឌលគិរី (ពីថ្ងៃទី៣ ដល់ថ្ងៃទី៥ ខែតុលា នេះ) បានបញ្ជាក់ថា មន្ត្រីឧទ្យានុរក្ស នៃក្រសួងបរិស្ថាន បាននឹងកំពុងយកចិត្តទុកដាក់ការពារថែរក្សាព្រៃឈើ និងធនធានធម្មជាតិ ក្នុងដែនជម្រកសត្វព្រៃ កែវសីមា តាមរយៈការចុះល្បាតទាំងយប់ទាំងថ្ងៃ ដើម្បីទប់ស្កាត់បទល្មើសព្រៃឈើ និងសត្វព្រៃ ជាពិសេស ការទន្ទ្រានយកដីដោយខុសច្បាប់។ដែនជម្រកសត្វព្រៃកែវសីមា គ្របដណ្ដប់លើផ្ទៃដីទហំជាង២៩ម៉ឺនហិកតា ឋិតក្នុងភូមិសាស្ត្រខេត្ត មណ្ឌលគិរី និងខេត្តក្រចេះ ។ ដែនជម្រកសត្វព្រៃ ដែលសម្បូរទៅដោយជីវៈចម្រុះច្រើនប្រភេទនេះ ជាទី ជម្រកនៃសត្វព្រៃកម្រៗ។ ដែនជម្រកសត្វព្រៃកែវសីមា មានអំណោយផលខ្ពស់ផ្នែកទេសចរណ៍ធម្មជាតិ ដែលមានទាំងទឹកធ្លាក់ វាលស្មៅ ជម្រាលភ្នំ ព្រមទាំងសហគមន៍ជនជាតិដើមភាគតិច។ ដែនជម្រកសត្វ ព្រៃមួយនេះ បានលក់ឥណទានកាបូនទៅកាន់ទីផ្សារអន្តរជាតិ តាំងពីឆ្នាំ២០១៦មកម្ល៉េះ៕អត្ថបទ៖ ចេន សុជាតា

រដ្ឋមន្ត្រីក្រសួងវប្បធម៌ ៖ មន្ត្រីរាជការមានពិការភាពបំរើការងារក្នុងក្របខណ្ឌវប្បធម៌ មានប្រមាណជិត៣ភាគរយ

ភ្នំពេញ ៖ រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកជំទាវបណ្ឌិតសភាចារ្យ ភឿង សកុណា បានអះអាងថា បច្ចុប្បន្ននេះ មន្រី្តរាជការដែលមានពិការភាព កំពុងបំរើការងារក្នុងក្របខណ្ឌរបស់ក្រសួងវប្បធម៌ មានប្រមាណជិតភាគរយ។ការថ្លែងរបស់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ យ៉ាងដូច្នេះ ក្នុងពិធីបើកសិក្ខាសាលាផ្សព្វផ្សាយច្បាប់ ស្តីពីកិច្ចការពារ និងលើកកម្ពស់សិទ្ធិជនពិការ និងលិខិតបទដ្ឋានគតិយុត្តផ្សេងៗ” នាព្រឹកថ្ងៃទី០៥ ខែតុលា ឆ្នាំ២០២០នេះ នៅទីស្តីការក្រសួងវប្បធម៌ និងវិចិត្រសិល្បៈ។លោកជំទាវបណ្ឌិតសភាចារ្យ ភឿង សកុណា បានបន្ថែមទៀតថា សិក្ខាសាលានេះ ដើម្បីបញ្ជ្រាបនូវចំណេះដឹង ចែករំលែកបទពិសោធន៍ការងារពាក់ព័ន្ធនឹងពិការភាព និងបទដ្ឋានគតិយុត្តផ្សេងៗ ជូនដល់ថ្នាក់ដឹកនាំមន្ត្រីរាជការមកពីបណ្តា អង្គភាព អាជ្ញាធរ និងមន្ទីរទាំងអស់ ក្រោមឱវាទក្រសួងវប្បធម៌និងវិចិត្រសិល្បៈ សម្រាប់ជួយផ្តល់ឱកាសដល់ជនពិការ បានចូលបម្រើការងារតាមមនី្ទររបស់ខ្លួន។លោកជំទាវ បណ្ឌិតសភាចារ្យ រដ្ឋមន្រី្ត សង្ឃឹមថា តាមរយៈសិក្ខាសាលានេះនឹងផ្តល់ជូនដល់សិក្ខាកាមទាំងអស់នូវចំណេះដឹងស្តីពីការលើកកម្ពស់សិទ្ធិជនពិការ ដើម្បីផ្តល់ឱកាសជូនពួកគាត់បានចូលរួមក្នុងជីវភាពសង្គម វប្បធម៌ សិល្បៈនិងសេដ្ឋកិច្ច ប្រែក្លាយកម្ពុជាជាប្រទេសដែលគោរពនិងលើកតម្កើងសិទ្ធិជនពិការ ។ឯកឧត្តម ឯម ច័ន្ទមករា អគ្គលេខាធិការ នៃអគ្គលេខាធិការដ្ឋានក្រុមប្រឹក្សាសកម្មភាពជនពិការ បានឲ្យដឹងដែរថា ការចូលរួមដោយស្មើភាពក្នុងសកម្មភាពសង្គមរបស់ជនពិការលើវិស័យ វប្បធម៌ សិល្បៈ សាសនា កីឡា ការសម្រាកលំហែនិងសកម្មភាពផ្សេងៗទៀតដែលបានកំណត់ក្នុងទិសដៅជាយុទ្ធសាស្ដ្រទី៥ គោលដៅទី៣ នៃផែនការយុទ្ធសាស្ត្ររបស់រាជរដ្ឋាភិបាលកម្ពុជាឆ្នាំ២០១៩–២០២៣ ហើយការចូលរួមរបស់ជនពិការក្នុងវិស័យវប្បធម៌ គឺចូលរួមអភិវឌ្ឍធនធានមនុស្សក្នុងវិស័យវប្បធម៌ អក្សរសាស្ត្រ សិល្បៈ និងវិទ្យាសាស្ត្រ ដែលជាសក្តានុពលទាក់ទាញការវិនិយោគលើវិស័យឧស្សាហកម្មច្នៃប្រឌិត បង្កើនផលិតផលវប្បធម៌ក្នុងស្រុកថ្មីៗ ដើម្បីប្រកួតប្រជែងក្នុងសម័យសាកលភាវូបនីយកម្ម បង្កើតការងារក្នុងស្រុក និងបង្កើនចំណូលថវិកាជាតិ ដែលស្របនឹងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា ក្នុងចំណុចទី៥ នៃមុំទី២ ចតុកោណទី២ ដែលបានដាក់ចេញនូវ “ការជំរុញការអភិវឌ្ឍវិស័យសេវាកំសាន្ត អក្សរសាស្ត្រ សិល្បៈ គំនូរជីវចលនិងភាពយន្ត ដែលជាឧស្សាហកម្មច្នៃប្រឌិតមានសក្តានុពលខ្ពស់ក្នុងការបង្កើតតម្លៃបន្ថែម និងបង្កើតការងារ ព្រមទាំងការលើកកម្ពស់ការផលិតនិងការប្រើប្រាស់ផលិតផលក្នុងស្រុក ជាពិសេសផលិតផលមានលក្ខណៈ ប្រពៃណីខែ្មរ និងផលិតផលសម្គាល់ភូមសាស្ត្រ៕អត្ថបទ ៖ រដ្ឋា

រដ្ឋសភា បានអនុម័តច្បាប់គ្រប់គ្រងល្បែងពាណិជ្ជកម្ម ដើម្បីបង្កើតប្រភពចំណូលថវិកាជាតិ

ភ្នំពេញ ៖ រដ្ឋសភា នៅថ្ងៃនេះ បានអនុម័ត លើសេចក្តីព្រាងច្បាប់គ្រប់គ្រងល្បែងពាណិជ្ជកម្ម ដើម្បី បង្កើតប្រភពចំណូលថវិកាជាតិ និងជំរុញសេដ្ឋកិច្ចកម្ពុជា។នៅថ្ងៃទី៥ ខែតុលា នេះ រដ្ឋសភា បានបើកសម័យប្រជុំរដ្ឋសភាលើកទី៥ នីតិកាលទី៦ ក្រោមអធិបតីភាព សម្តេចពញាចក្រី ហេង សំរិន ប្រធានរដ្ឋសភា ដោយមានសមាជិក សមាជិកានៃរដ្ឋសភាចូលរួមចំនួន ១១៨រូប និងមានរបៀបវារៈចំនួន១១ រួមមាន សេចក្តីព្រាងច្បាប់ពាក់ព័ន្ធនឹងការយោគយល់គ្នាចំពោះការវិនិយោគរវាងកម្ពុជា និងបណ្តាប្រទេសនៅអាស៊ីអាគ្នេយ៍ ការជួយគ្នាទៅវិញទៅមកពាក់ព័ន្ធនឹងវិស័យព្រហ្មទណ្ឌ បរិស្ថាន ការគ្រប់គ្រងល្បែងពាណិជ្ជកម្ម និងច្បាប់ពាក់ព័ន្ធវិស័យជាច្រើនផ្សេងទៀត។ក្នុងសម័យប្រជុំរដ្ឋសភាលើកទី៥ នីតិកាលទី៦នេះ សមាជិក សមាជិកានៃរដ្ឋសភាដែលមានវត្តមានចូលរួមនៅថ្ងៃនេះ បានអនុម័តជាឯកច្ឆ័នលើសេចក្តីព្រាងច្បាប់ការគ្រប់គ្រងល្បែងពាណិជ្ជកម្ម ដោយសំឡេង ១១៨ /១១៨សំឡេង។មុនរដ្ឋសភាសម្រេចអនុម័តសេចក្ដីព្រាងច្បាប់គ្រប់គ្រងល្បែងពាណិជ្ជកម្ម ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច បានធ្វើសេចក្តីថ្លែងហេតុច្បាប់នេះចំពោះមុខសម័យប្រជុំសភាថា សេចក្តីព្រាងច្បាប់ស្តីពីការគ្រប់គ្រងល្បែងពាណិជ្ជកម្មនេះ ត្រូវបានតាក់តែងឡើងក្នុងគោលបំណងធានាដល់ការគ្រប់គ្រងមណ្ឌលល្បែងពាណិជ្ជកម្មសមាហរ័ណ និងល្បែងពាណិជ្ជកម្ម ដើម្បីរួមចំណែកជំរុញកំណើនសេដ្ឋកិច្ច បង្កើតប្រភពចំណូលថវិកាជាតិ លើកកម្ពស់វិស័យទេសចរណ៍ បង្កើតការងារ រក្សាសុវត្ថិភាព និងសន្តិសុខសង្គម ដែលជាទស្សនទានមួយថ្មីនៃការអភិវឌ្ឍសេដ្ឋកិច្ចកម្ពុជា។ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន បានបន្តថា សេចក្តីព្រាងច្បាប់គ្រប់គ្រងល្បែងពាណិជ្ជកម្មនេះ បានសិក្សាអស់រយះពេលជាច្រើនឆ្នាំ ដើម្បីឆ្លើយតបទៅនឹងការគ្រប់គ្រងល្បែងពាណិជ្ជកម្មទាំងអស់ ឲ្យមានការអនុវត្តត្រឹមត្រូវតាមកំណត់នៃច្បាប់ និងផ្តល់លទ្ធភាពចូលរួមការដោះស្រាយបញ្ហាសេដ្ឋកិច្ចកម្ពុជាក្រោយប្រឈមជំងឺកូវីដ១៩។ ឯកឧត្តម បានបន្ថែមថា រាល់ម្ចាស់អាជីវកម្មល្បែងពាណិជ្ជកម្មទាំងអស់ដែលមិនអនុវត្តទៅតាមច្បាប់នេះ នឹងត្រូវប្រឈមការពិន័យជាអន្តរកាល និងឈានដល់ការរឹបអូសទ្រព្យសម្បត្តិជាដើម។មុនសេចក្តីព្រាងច្បាប់នេះបានបញ្ជូនដល់រដ្ឋសភា រាជរដ្ឋាភិបាល បានសង្កេតឃើញថា បច្ចុប្បន្ននេះប្រទេសជាច្រើននៅលើពិភពលោកបានប្រែក្លាយល្បែងពាណិជ្ជកម្មទៅជាមណ្ឌលល្បែងពាណិជ្ជកម្មសមាហរ័ណ និងជាកន្លែងកម្សាន្តទាក់ទាញទេសចរជាច្រើន តាមរយៈការរៀបចំទីតាំងល្បែងពាណិជ្ជកម្ម ដោយរួមបញ្ចូលនូវទីតាំងបដិសណ្ឋារកិច្ច ភោជនីយដ្ឋាន ផ្សារទំនើប សណ្ឋាគារ មណ្ឌលកីឡា មណ្ឌលកម្សាន្តនិងទស្សនា មណ្ឌលសន្និបាត ឬពិព័រណ៍ និងហាងលក់ទំនិញរួចពន្ធជាដើម គឺជាប្រភពចំណូលថវិកាដ៏សំខាន់ និងជាទីតាំងបង្កើតការងារជាច្រើនប្រភេទនៃឧស្សាហកម្មគ្មានផ្សែង ព្រមទាំងបានរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ច។សូមបញ្ជាក់ថា សេចក្តីព្រាងច្បាប់នេះ នឹងអនុញ្ញាតឱ្យមានការគ្រប់គ្រងលើវិស័យកាស៊ីណូ និងល្បែងពាណិជ្ជកម្មដទៃទៀតយ៉ាងតឹងរ៉ឹង និងប្រកបដោយប្រសិទ្ធភាពខ្ពស់ តាមរយៈការកំណត់ចំនួនទុនវិនិយោគអប្បបរមាសម្រាប់អាជីវកម្មកាស៊ីណូ ការកំណត់តំបន់ដែលគួរអនុញ្ញាតឱ្យមានល្បែងពាណិជ្ជកម្ម ឬមិនគួរអនុញ្ញាត ការពង្រឹងសមត្ថភាពស្ថាប័ន និងការបំពាក់នូវបច្ចេកវិទ្យាសមស្របក្នុងការត្រួតពិនិត្យជាប្រចាំលើកិច្ចដំណើរការរបស់ប្រតិបត្តិករល្បែងពាណិជ្ជកម្ម ព្រមទាំងបានគិតគូរផងដែរអំពីយន្តការយ៉ាងតឹងរ៉ឹងពាក់ព័ន្ធនឹងការប្រឆាំងការលាងសម្អាតប្រាក់និងហិរញ្ញប្បទានភេរវកម្ម៕

អភិបាលរាជធានី ជំរុញជាថ្មីឱ្យអាជ្ញាធរ ត្រូវបន្តតាមដាន ត្រួតពិនិត្យក្លឹបកំសាន្ត និងខារ៉ាអូខេ ដែលបើកលួចលាក់

ភ្នំពេញ ៖ អភិបាលរាជធានីភ្នំពេញបាន ជំរុញជាថ្មីម្ដងទៀតឱ្យអាជ្ញាធរ និងសមត្ថកិច្ច ត្រូវបន្តតាមដានត្រួតពិនិត្យក្លឹបកំសាន្ត និង ខារ៉ាអូខេ ដែលបានបើកលួចលាក់ ដោយមិនមានការកែប្រែជាភោជណីយដ្ឋាន ដើម្បីបង្ការទប់ស្កាត់ការរីករាលដាល នៃជំងឺកូវីដ–១៩ ។ជាថ្មីម្ដងទៀត ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ បានជំរុញឱ្យអាជ្ញាធរមូលដ្ឋាប និងសមត្ថកិច្ចតាមបណ្ដាខណ្ឌទាំង១៤នៅក្នុងរាជធានីភ្នំពេញ ត្រូវបន្តការតាមដាន និងត្រួតពិនិត្យទៅលើក្លឹបកំសាន្ត និងខារ៉ាអូខេ ដែលលួចលាក់ ដើម្បីបង្ការទប់ស្កាត់នូវការរីករាលដាលនៃជំងឺកូវីដ–១៩ ខណៈដែលជំងឺនេះ បាននឹងកំពុងរីករាលដាលនៅឡើយ បើទោះបីប្រទេសកម្ពុជាមិនមានអ្នកស្លាប់ដោយកូវីដ–១៩នេះក៏ដោយ ។ ឯកឧត្ដម ឃួង ស្រេង បានលើកឡើង នៅថ្ងៃទី០៥ ខែតុលា ឆ្នាំ២០២០ ក្នុងពិធីបើកសិក្ខាសាលាស្ដីពី ការគ្រប់គ្រងការរាតត្បាតនៃជំងឺកូវីដ–១៩ សម្រាប់អាជ្ញាធរមូលដ្ឋាន ខណ្ឌ សង្កាត់នៅរាជធានីភ្នំពេញ ក្រោមកិច្ចសហការក្នុងភាពជាដៃគូរ រវាងរដ្ឋបាលរាជធានីភ្នំពេញ និងសមាគមអន្តរជាតិនៃអភិបាលក្រុងប្រើប្រាស់ភាសាបារាំង ដែលហៅថា AIMF នៅសាលារាជធានីភ្នំពេញ។ឯកឧត្ដម ឃួង ស្រេង មានប្រសាសន៍លើកឡើងថា យើងអាចភ្លេចជំងឺកូវីដ–១៩ តែជំងឺកូវីដ–១៩ មិនភ្លេចយើងទេ ។ ដូច្នេះទេ ក្នុងនាមអាជ្ញាធរខណ្ឌ សង្កាត់ត្រូវបន្តការផ្សព្វផ្សាយឱ្យប្រជាពលរដ្ឋចូលរួមបង្ការ និងទប់ស្កាត់នូវជំងឺ–១៩នេះ និងបន្តតាមដាននៅក្នុងមូលដ្ឋានរបស់ខ្លួន ពាក់ព័ន្ធ នឹងការលួចបើកក្លឹបកម្សាន្ត និងខារ៉ាអូខេ ដែលអាចធ្វើឱ្យរីករាលដាលនៃជម្ងឺកូវីដ–១៩នេះ ។ឯកឧត្ដម ឃួង ស្រេង បានបញ្ជាក់ផងដែរថា ការបើកអង្គសិក្ខាសាលានេះឡើង គឺក្នុងគោលបំណង ដើម្បីបង្កើនប្រសិទ្ធភាពនៃការឆ្លើយតបលើកិច្ចការបង្ការ និងទប់ស្កាត់ការរាលដាលនៃវីរុស covid-19 នៅក្នុងខណ្ឌ សង្កាត់ និយាយដោយឡែក និងនិយាយជារួមដើម្បីឈានទៅពង្រឹង និងពង្រីកកិច្ចសហប្រតិបត្តិការកាន់តែស៊ីជម្រៅ និងទូលំទូលាយក្នុងភាពជាដៃគូររវាងសមាគម AIMF និងរដ្ឋបាលរាជធានីភ្នំពេញ តាមស្មារតីនៃឯកសារវិសោធនកម្មលេខ ២ ស្តីពីការត្រៀមបង្ការចំពោះស្ថានភាពបន្ទាន់ គំនិតផ្ដួចផ្តើម ដើម្បីសុខភាព និងអនាម័យល្អក្នុងទីក្រុង។ សម្រាប់ប្រទេសកម្ពុជា ក៏មិនអាចគេចផុតពីការគំរាមកំហែងនៃជំងឺកូវីដ–១៩ ដូចគ្នានេះផងដែរ បើទោះបី ជាមកដល់ពេលនេះ ប្រជាពលរដ្ឋខ្មែររួម និងជនបរទេសដែលកំពុងស្នាក់នៅក្នុងប្រទេសកម្ពុជាមិនទាន់មាននរណាម្នាក់រងគ្រោះរហូតដល់បាត់បង់ជីវិតនៅឡើយក្តី។ ប៉ុន្តែជាកត្តាសត្យានុម័ត បញ្ហានេះ បានបង្កើតឱ្យមានផលប៉ះពាល់លើវិស័យជាច្រើន ពិសេសក្នុងវិស័យសេដ្ឋកិច្ច និងសង្គមកិច្ចជៀសមិនរួច។ ដូច្នេះ ការរៀបចំសិក្ខាសាលាក្នុងពេលនេះ គឺជាផ្នែកមួយនៃការអនុវត្តន៍គម្រោងត្រៀមបង្ការ និងឆ្លើយតបចំពោះស្ថានភាពបន្ទាន់ ក្នុងនោះ រយៈពេលកន្លងមកក្រុមការងារអនុវត្ត គម្រោងនៃសមាគម AIMF សហការជាមួយ នឹងមន្ទីរសុខាភិបាលរាជធានីភ្នំពេញបើកវគ្គបណ្ដុះបណ្ដាល ចំនួន០៩លើករួចមកហើយ ដោយផ្ដោតសំខាន់លើស្ថានភាពទូទៅនៃជំងឺកូវី–១៩ វិធានការការពារការចម្លងរោគ ការប្រើប្រាស់សំភារៈការពារខ្លួន ការប្រមូលវេចខ្ចប់ និងការដឹកជញ្ជូនសំណាករបស់អ្នកជម្ងឺកូវីដ–១៩ ជាដើម។គួរបញ្ជាក់ថា អង្គសិក្ខាសាលានេះនឹងធ្វើឡើងក្នុងរយៈពេលពីរថ្ងៃពេញ ហើយនៅក្នុងពិធីនោះ រដ្ឋបាលរាជធានីភ្នំពេញក៏បានប្រគល់បរិក្ខាពេទ្យសម្រាប់ការពារ និងទប់ស្កាត់ជំងឺកូវីដ–១៩ ជូនដល់ក្រុមឆ្លើយតបបន្ទាន់នៃមន្ទីរសុខាភិបាលរាជធានីភ្នំពេញផងដែរ ដើម្បីប្រើប្រាស់បន្តគាំទ្រក្នុងយុទ្ធនាការប្រយុទ្ធប្រឆាំងនឹងការរីករាលដាលជំងឺកូវីដ–១៩ នៅរាជធានីភ្នំពេញ៕អត្ថបទ ៖ ប្រាក់ វ៉ាន់ដា

ទិវាគ្រូបង្រៀន ៥ តុលា ៖ សិស្សានុសិស្សអរគុណលោកគ្រូអ្នកគ្រូដែលបង្រៀនពួកគេឲ្យមានអនាគតល្អ

ភ្នំពេញ ៖ នៅក្នុងឱកាសថ្ងៃប្រារព្ធទិវាគ្រូបង្រៀន ៥ តុលា ឆ្នាំ២០២០នេះ បណ្តាសិស្សានុសិស្ស បានថ្លែងការដឹង គុណលោកគ្រូ អ្នកគ្រូ ដែលបានបង្ហាត់បង្រៀន សិស្សានុសិស្សទាំងអស់គ្នា តាំងពីកម្រិតថ្នាក់ដំបូង និងបានដឹកនាំណែនាំសិស្សប្រៀនប្រដៅប្រៀបដូចជា ឪពុក–ម្តាយទី២ ចង់អោយសិស្សនុសិស្សមានអនាគតល្អ នៅថ្ងៃខាងមុខ។បើតាមយុវសិស្ស ញ៉េន សៅវណ្ណាក់ មកពីវិទ្យាល័យហ៊ុន សែន សេរីភាព ក្រុងតាខ្មៅ ខេត្តកណ្តាល បានប្រាប់ពី BTV នៅថ្ងៃទី៥ ខែតុលានេះ ថា គ្រប់សកម្មភាពរបស់លោកគ្រូអ្នកគ្រូ គឺបានរួមចំណែកខ្លាំងណាស់ក្នុងការជួយអភិវឌ្ឍសង្គម អភិវឌ្ឍប្រទេសជាតិ ជាពិសេសគឺលោកបានជួយណែនាំតម្រង់ទិសជីវិតរបស់សិស្សគ្រប់រូប អោយមានអនាគតល្អ ដើម្បីអោយពួកយើងមានធនធានសម្រាប់បន្តការងារអភិវឌ្ឍន៍ប្រទេសជាតិ បន្តការរីកចំរើន។បណ្តាសិស្សានុសិស្សនានាទៀត បានចាត់ទុកលោកគ្រូ អ្នកគ្រូជា មាតាបិតាទី២ របស់ពួកគេ ខណៈដែលការអភិវឌ្ឍន៍សមត្ថភាពចំណេះដឹងនានា របស់សិស្ស គឺមិនអាចកាត់ផ្តាច់ពីការពន្យល់បង្ហាត់បង្ហាញពីលោកគ្រូអ្នកគ្រូឡើយ។បើតាមអ្នកនាំពាក្យក្រសួងអប់រំយុវជន និងកីឡា ឯកឧត្តម រស់ សុវាចា មានប្រសាសន៍ថា នៅក្នុងឆ្នាំ២០២០នេះ នៅទូទាំងប្រទេស មានគ្រូបង្រៀនគ្រប់កម្រិតសិក្សាមានប្រមាណជាង១២ម៉ឺននាក់ បាននឹងកំពុងបំរើការងារ ផ្តល់ការបង្ហាត់បង្រៀនជូនដល់បណ្តាសិស្សានុសិស្សគ្រប់កម្រិតទូទាំងប្រទេស៕អត្ថបទ ៖ ស៊ុម សុខជា

គ្រឹះស្ថានសិក្សាឯកជនក្នុងខេត្តសៀមរាប ចំនួន១០ត្រូវបាន អនុញ្ញាតឱ្យបើកឡើងវិញ

សៀមរាប ៖ គ្រឹះស្ថានសិក្សាឯកជន ក្នុងខេត្តសៀមរាប ចំនួន១០ ត្រូវបានអនុញ្ញាតឱ្យបើកដំណើរការឡើងវិញ បន្ទាប់ពីស្ថានការណ៍កូវីដ–១៩ បានធូរស្រាលវិញ ប៉ុន្ដែដំណើរការបង្រៀនឡើងវិញនេះ គឺតម្រូវឱ្យធ្វើទៅ តាមវិធានការអនាម័យរបស់ក្រសួងសុខាភិបាល និងក្រសួងអប់រំ ដើម្បីទប់ស្កាត់ការឆ្លងជំងឺ។លោក លី ប៊ុនណា ប្រធានមន្ទីរអប់រំ យុវជន និងកីឡា ខេត្ដសៀមរាប បានឱ្យយដឹងថា សាលា រៀនឯកជននៅក្នុងខេត្ដនេះ នឹងបើកឱ្យដំណើរការឡើងវិញ មានប្រមាណ១០សាលា ខណៈមានសាលា ចំនួនជិត៤០ បានដាក់ពាក្យ ស្នើសុំបើកបង្រៀនឡើងវិញ ។លោក បានបញ្ជាក់ថា ការអនុញ្ញាតឱ្យសាលាឯកជនចំនួន១០បើកឡើងវិញ គឺតម្រូវឱ្យអ្នកគ្រប់ គ្រងសាលា រៀបចំ និងពង្រឹង ការអប់រំផ្សព្វផ្សាយខ្លឹមសារសុខភាពសំខាន់ៗ ពាក់ព័ន្ធនឹងការបង្ការទប់ស្កាត់ ជំងឺកូវីដ–១៩ ឬជំងឺឆ្លងស្រួចស្រាល់នានា ដល់អ្នកសិក្សា បុគ្គលិកអប់រំ និងបុគ្គលិកផ្សេងទៀត។ ណែនាំពី សារសំខាន់ នៃការរក្សាគម្លាតសុវត្ថិភាព និងការសម្លាប់មេរោគ នៅតាមគ្រឹះស្ថានសិក្សា។លោក លាវ ឱរ៉ា នាយកវិទ្យាស្ថានអប់រំសាំងហ្គាពួរ ដែលជាសាលាមួយក្នុងចំណោមសាលាឯកជន ទាំង១០ ដែលត្រូវបានអនុញ្ញាតឱ្យបើកឡើងវិញ បានឱ្យដឹងថា វិទ្យាស្ថានអប់រំ សាំងហ្គាពួរ ត្រូវបានក្រសួងអប់រំ អនុញ្ញាតឱ្យបើកដំណើរឡើងវិញ កាលពីចុងខែកញ្ញា ប៉ុន្ដែសាលា នឹងឱ្យសិស្សចូលបវេសនកាល ថ្មី នៅថ្ងៃទី១៩ ខែតុលា នេះ។លោកបានឱ្យដឹងទៀតថា សាលារៀន បានត្រៀមរួចរាល់អនុវត្តតាមវិធានអនាម័យ ដើម្បីការពារ ការឆ្លងជំងឺផ្សេងៗ ពិសេសកូវីដ១៩ ដោយមិនឱ្យមានការប្រមូលផ្ដុំគ្រប់រូបភាព រក្សាគម្លាតសុវត្ថិភាពយ៉ាង ហោច១,៥ម៉ែត្រឡើងទៅ ហើយមានគ្រូពេទ្យប្រចាំផងដែរ។ កន្លែងកម្សាន្ត ឬទីលានកីឡា ដែលមាន លក្ខណៈប្រមូលផ្តុំក្នុងបរិវេណគ្រឹះស្ថានសិក្សា ត្រូវបានផ្អាកផងដែរ ដើម្បីចៀសវាងហានីភ័យ នៃការឆ្លង កូវីដ១៩៕អត្ថបទ៖ ឈិត សាវី

ជយលាភីប្រកួតរ៉ូបូតថ្នាក់ជាតិកម្ពុជា នឹងបានទៅចូលរួមប្រកួតរ៉ូបូតអន្តរជាតិ ABU Robocon 2020 នៅចុងឆ្នាំនេះ

ភ្នំពេញ៖ ការប្រកួតប្រជែងរ៉ូបូតថ្នាក់ជាតិ សម្រាប់ឆ្នាំ ២០២០នេះ បានបញ្ចប់ដោយភាពជោគជ័យដោយបានរកឃើញជយលាភីចំនួន ៧ក្រុម ហើយជយលាភីលេខ១ សម្រាប់ប្រកួតរ៉ូបូតថ្នាក់ជាតិកម្ពុជានឹងបានទៅចូលរួមប្រកួតរ៉ូបូតអន្តរជាតិABU Robocon 2020 នៅចុងឆ្នាំ២០២០ នៅប្រទេសហ្វីជី។កម្មវិធីប្រកួតប្រជែងរ៉ូបូតថ្នាក់ជាតិសម្រាប់ឆ្នាំ២០២០ ដើម្បីស្វែងរកជយលាភីប្រចាំឆ្នាំក្នុងការបន្តតំណាងកម្ពុជាទៅប្រកួតរ៉ូបូតថ្នាក់អន្តរជាតិ និងលើកកម្ពស់សមត្ថភាពយុវជនខ្មែរក្នុងវិស័យរ៉ូបូតនិងស្វ័យប្រវត្តិកម្ម បានប្រព្រឹត្តទៅកាលពីចុងសប្តាហ៍កន្លងទៅនេះ ក្រោមវត្តមានឯកឧត្ដម ខៀវ កាញារីទ្ធ រដ្ឋមន្ត្រីក្រសួងព័ត៌មាន ,ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ឯកឧត្ដម មិកាមិ ម៉ាសាហ៊ីរុ ឯកអគ្គរាជទូតជប៉ុនប្រចាំកម្ពុជា និងមានការចូលរួមពីអ្នកទស្សនាប្រមាណជិត៤០០នាក់ នៅសាកលវិទ្យាល័យភូមិន្ទភ្នំពេញ។សម្រាប់ការប្រកួតប្រជែងរ៉ូបូតថ្នាក់ជាតិលើកទី៧ ឆ្នាំ២០២០ រៀបចំឡើងក្រោមប្រធានបទ រ៉ូបូតបាល់ឱប បានរកឃើញនូវក្រុមជយលាភីចំនួន ៧ក្រុម ដោយជយលាភីទី ១ បានទៅលើក្រុម NPIC02 ជយលាភីលេខ ២បានទៅលើក្រុម NPIC01 ជយលាភីផ្នែកវិស្វកម្ម បានទៅលើក្រុម PPI01 ជយលាភីផ្នែកគំនិត បានទៅលើក្រុម NTTI01 ជយលាភីផ្នែករចនា បានទៅលើក្រុម RUPP01 ជយលាភីផ្នែកប្រជាប្រិយភាពបានទៅលើក្រុម PPI01 និងជយលាភីតូយ៉ូតា បានទៅលើក្រុម NUM01 ។ឯកឧត្ដម ខៀវ កញ្ញារិទ្ធ រដ្ឋមន្ត្រីក្រសួងព័ត៌មាន បានលើកឡើងថ្លែងអំណរគុណចំពោះក្រសួងអប់រំ ស្ថានទូតជប៉ុន សាកលវិទ្យាល័យ និងក្រុមការងារគ្រប់ផ្នែកពាក់ព័ន្ធទាំងអស់ ដែលបានចូលរួមសហការ និងបានធ្វើអោយកម្មវិធីនេះ ប្រព្រឹត្តទៅបានជោគជ័យ រហូតស្វែងរកបានក្រុមទទួលបានជ័យលាភី សំរាប់តំណាងកម្ពុជាបន្តចូលរួមប្រកួតនៅក្រៅប្រទេសទៀត ជាពិសេស គឺការចូលរួមរបស់ក្រុមនីមួយៗក្នុងការប្រកួតថ្នាក់ជាតិនេះ។នាឱកាសនោះដែរ ឯកឧត្តម ហង់ជួន ណារ៉ុន រដ្ឋមន្ត្រីក្រសួងអប់រំ បានការសម្ដែងការគាំទ្រចំពោះការរៀបចំកម្មវិធីនេះឡើង ហើយ ក៏បានលើកឡើងដែរថាការប្រកួតនេះ ផ្ដល់នូវសារៈប្រយោជន៍ ១០ចំណុចធំៗ សម្រាប់ក្រុមចូលប្រកួត ។សូមបញ្ជាក់ថា ទូរទស្សន៍ជាតិកម្ពុជា បានរៀបចំកម្មវិធីប្រកួតប្រជែងរ៉ូបូតនេះតាំងពីឆ្នាំ២០១៤មកម្ល៉េះហើយ សម្រាប់ឆ្នាំ២០២០នេះ គឺជាលើកទី៧ហើយ។ប្រធានបទ រ៉ូបូតបាល់ឱប ដែលរៀបចំនៅឆ្នាំនេះ គឺបំលែងចេញពីកីឡាបាល់ឱប ជាប្រពៃណីរបស់ប្រទេសហ្វីជី ដែលជាម្ចាស់ផ្ទះការប្រកួត រ៉ូបូតអន្តរជាតិABU Robocon 2020។ ការប្រកួតនេះ គឺតម្រូវឱ្យក្រុមនិមួយៗមាន រ៉ូបូតចំនួនពីរ រ៉ូបូតទាំងពីរនេះ ការសហការគ្នា ក្នុងការ ចាប់បញ្ជូន ទទួល ដាក់ និងទាត់បាល់បញ្ចូលទី។សម្រាប់ការប្រកួតនេះ មានថេរវេលាមួយប្រកួតរយៈពេល ៣ នាទី និង រយៈពេលនៃការត្រៀមរៀបចំមុន គឺ ១នាទី។ ក្នុងការប្រកួតមួយ ក្រុមរ៉ូបូតណា ដែលទទួលបានពិន្ទុច្រើនជាងគេ ក្រុមនោះនឹងឈ្នះ។សម្រាប់ក្រុមជយលាភីលេខ១នឹងត្រូវតំណាងកម្ពុជាចូលរួមប្រកួតប្រជែងរ៉ូបូតថ្នាក់អន្តរជាតិ ABU Robocon 2020 នាចុងឆ្នាំនេះ៕ អត្ថបទ៖ គឹមហុក

ថ្ងៃទី៤ នៃការចុះឈ្មោះបោះឆ្នោត មានពលរដ្ឋទៅចុះបោះឆ្នោតថ្មីជិត ២ម៉ឺននាក់

ភ្នំពេញ៖ គិតត្រឹមថ្ងៃទី៤ ខែតុលានេះ ក្នុងដំណើរការពិនិត្យបញ្ជីឈ្មោះបោះឆ្នោត និងការចុះឈ្មោះបោះឆ្នោត មានប្រជាពលរដ្ឋដែលបានទៅចុះឈ្មោះបោះឆ្នោតថ្មីចំនួនជិត ២ម៉ឺននាក់។ នេះបើយោងតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត ហៅកាត់ថា គជប។យោងតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី០៥ ខែតុលា ឆ្នាំ២០២០នេះ ស្តីពីលទ្ធផលបណ្ដោះអាសន្នសម្រាប់ថ្ងៃទី០៤ នៃការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២០ មានប្រជាពលរដ្ឋ ១៨.៧៣៧នាក់ បានទៅចុះឈ្មោះបោះឆ្នោតថ្មី។សេចក្តីប្រកាសព័ត៌មាន នេះបានឲ្យដឹងថា លទ្ធផលបណ្ដោះអាសន្ន នៃការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២០ សម្រាប់ថ្ងៃទី0៤ ខែតុលា ឆ្នាំ២០២០ នៅទូទាំងប្រទេសមានដូចខាងក្រោម ប្រជាពលរដ្ឋដែលបានមកចុះឈ្មោះបោះឆ្នោតថ្មី មានចំនួន ១៨.៧៣៧នាក់ , អ្នកដែលនឹងត្រូវលុបឈ្មោះចេញពីបញ្ជីបោះឆ្នោត មានចំនួន ១៥.០៨៤នាក់, អ្នកដែលបានកែតម្រូវទិន្នន័យ មានចំនួន ១២.៤៤៨នាក់ និងអ្នកដែលបានផ្ទេរទីលំនៅចូលក្នុងឃុំ សង្កាត់ថ្មី មានចំនួន ១៤.៣៤០នាក់។សេចក្តីប្រកាសព័ត៌មាន នេះបានបន្ត អំពាវនាវដល់ប្រជាពលរដ្ឋទាំងអស់អញ្ជើញទៅពិនិត្យមើលឈ្មោះក្នុងបញ្ជីបោះឆ្នោតចុងក្រោយ ដើម្បីស្នើសុំកែទិន្នន័យ ប្រសិនបើមានចំណុចខុសឆ្គងទៅចុះឈ្មោះបោះឆ្នោតឱ្យបានគ្រប់ៗគ្នា ចំពោះប្រជាពលរដ្ឋដែលទើបគ្រប់អាយុ ១៨ឆ្នាំ (កើតមុន ឬកើតត្រឹមថ្ងៃទី១ ខែមករា ឆ្នាំ២០០៣) និងប្រជាពលរដ្ឋដែលមិនធ្លាប់ចុះឈ្មោះបោះឆ្នោតពីមុនផងដែរ។សូមបញ្ជាក់ថា តាមការប៉ាន់ស្មានសម្រាប់ការចុះឈ្មោះបោះឆ្នោតឆ្នាំ២០២០របស់ គជប ចំនួនប្រជាពលរដ្ឋគ្រប់អាយុដែលត្រូវចុះឈ្មោះបោះឆ្នោតសរុបនៅទូទាំងប្រទេសមានចំនួនប្រមាណ ៣០ម៉ឺននាក់ ដោយការចុះបោះឆ្នោតនេះប្រព្រឹត្តទៅចាប់ពីថ្ងៃទី១នេះ រហូតដល់ថ្ងៃទី១៩ ខែតុលា ឆ្នាំ២០២០៕ អត្ថបទ៖ សេក ឧត្តម

ទុនបម្រុងអន្តរជាតិកើនដល់ ២០ ប៊ីលានដុល្លារ អាចធានានាំចូលទំនិញ និងសេវាបាន ១០ខែ

ភ្នំពេញ៖ ទុនបម្រុងអន្តរជាតិ ដែលគ្រប់គ្រងដោយធនាគារជាតិ នៃកម្ពុជា បានកើនឡើងដល់ ២០ប៊ីលានដុល្លារអាមេរិក ក្នុងកំណើនជាមធ្យម២១%ក្នុងមួយឆ្នាំ ដែលអាចធានាការនាំចូលទំនិញ និងសេវា សម្រាប់គ្រាបន្ទាប់បានចំនួនប្រមាណ ១០ ខែ។យោងតាមឯកសារដំណើរការឆ្ពោះទៅកាន់ប្រសិទ្ធភាព ប្រព័ន្ធធនាគារ និងរូបិយវត្ថុអន្តរជាតិ ដែលចេញដោយធនាគារជាតិ នៃកម្ពុជា បានបង្ហាញឲ្យដឹងថា មកដល់បច្ចុប្បន្ន ទុនបម្រុងអន្តរជាតិ ដែលគ្រប់គ្រងដោយធនាគារជាតិ នៃកម្ពុជាបានកើនដល់ ២០ ប៊ីលានដុល្លារអាមេរិក។ចាប់តាំងពីឆ្នាំ១៩៩៤ មក ទុនបម្រុងអន្តរជាតិបានកើនឡើង ១០០ ដង។ បើគិតរយៈពេល២ទស្សវត្សរ៍ចុងក្រោយ ចំនួននេះមានកំណើនជាមធ្យម ២១%។ ដូច្នេះមកដល់បច្ចុប្បន្នទុនបម្រុងអន្តរជាតិ កម្ពុជាអាចធានាការនាំចូលទំនិញ និងសេវាបានប្រមាណរយៈពេល ១០ខែ ខ្ពស់ជាងកម្រិតអប្បបរមាចំនួន ៣ខែ ដែលប្រទេសកំពុងអភិវឌ្ឍន៍គួរមាន។ធនាគារជាតិ នៃកម្ពុជាបានបញ្ជាក់ថា វិស័យធនាគារបានបន្តអភិវឌ្ឍប្រកបដោយភាពរឹងមាំ និងបានពង្រីកវិសាលភាពសេវាកម្មនៅទូទាំងប្រទេស។ជាក់ស្ដែងក្នុងរយៈពេលពីរទសវត្សរ៍ចុងក្រោយនេះ ទ្រព្យសកម្មវិស័យធនាគារបានកើនឡើង ៩៣ ដង ឥណទានបានកើនឡើង ១៧៨ដង និងប្រាក់បញ្ញើកើនឡើង ៩៥ ដង កំណើនទាំងនេះ បង្ហាញពីជំនឿទុកចិត្តរបស់វិនិយោគិននិងប្រជាពលរដ្ឋមកលើប្រព័ន្ធធនាគារនិងរូបិយវត្ថុកម្ពុជា។ជុំវិញសកម្មភាពរបស់វិនិយោគិន និងធនាគារ, នៅក្នុងឆមាសទី១ ឆ្នាំ២០២០ នេះ វិស័យសំខាន់ៗ ចំនួន ៣ បានហក់ឡើងខ្ពស់គួរជាទីកត់សម្គាល់ ក្នុងនោះ ទ្រព្យសកម្ម បានហក់ឡើង ២២៤ ទ្រីលានរៀល ត្រូវជាង ២០០% នៃផលិត ផលក្នុងស្រុកសរុប (ផ.សស) ។ ចំណែកទំហំឥណទាន មានចំនួន ១៤៦ ទ្រីលានរៀល ត្រូវ ១៣២% នៃ ផ.ស.ស, និងប្រាក់បញ្ញើមាន ១២៨ ទ្រីលានរៀល ត្រូវជាង ១១៣% នៃ ផលិតផលក្នុងស្រុកសរុប (ផ.សស) ផងដែរ៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

គណៈមេធាវីនៃព្រះរាជាណាចក្រកម្ពុជា និងក្រសួងទេសចរណ៍បង្កើនកិច្ចសហប្រតិបត្តិការលើកកម្ពស់ការយល់ដឹង និងការអនុវត្តច្បាប់ក្នុងវិស័យទេសចរណ៍

ប្រធានក្រុមការងារទទួលបន្ទុកជួសជុល និងសាងសង់ឡើងវិញអគារសិក្សាដែលជាអំណោយរបស់សម្ដេចតេជោដឹកនាំក្រុមការងារចុះពិនិត្យ សិក្សា និងវាយតម្លៃស្ថានភាពអគារសិក្សានៅតាមសាលារៀនចំនួន ៩ ក្នុងឃុំរវៀង និងឃុំសំរោង ស្រុកសំរោង ខេត្តតាកែវ

វិធានការបែងចែកទឹកចាប់ផ្តើមនៅតំបន់ Medellin របស់កូឡុំប៊ី ខណៈកើតមានផលប៉ះពាល់ពីបាតុភូតអែល នីញ៉ូ

ជប៉ុនបញ្ជូនជំនួយ និងក្រុមអ្នកជំនាញទៅកាន់ប្រទេសនេប៉ាល់ ដើម្បីជួយកំណត់អត្តសញ្ញាណជនរងគ្រោះ

ក្រុមបរិស្ថានម៉ាឡេស៊ី អំពាវនាវឲ្យមានការទទួលខុសត្រូវចំពោះផ្សែងអ័ព្ទឆ្លងព្រំដែនពីឥណ្ឌូនេស៊ី

មេដឹកនាំមីយ៉ាន់ម៉ា បំពេញទស្សនកិច្ចនៅវៀតណាម ជាការធ្វើដំណើរការទូតឡើងវិញ

មនុស្សរាប់ពាន់នាក់ ត្រូវបានជម្លៀសចេញ ក្រោយព្យុះទីហ្វុង Saudel នាំមកនូវភ្លៀងធ្លាក់ខ្លាំងនៅតំបន់ឆ្នេរប្រទេសចិន

សិស្សសាលាលីបង់រាប់ពាន់នាក់ បន្តជម្លៀសខ្លួន ដោយសារសង្រ្គាមរវាងអ៊ីស្រាអែល និងក្រុមហេសបូឡា

[UPDATE] អាជ្ញាធរ៖ អ្នកស្លាប់ ក្នុងទឹកជំនន់នៅនេប៉ាល់ កើនឡើងដល់ជិត ១.៣០០នាក់ និងអ្នកបាត់ខ្លួន លើស ៥.០០០នាក់

ឯកឧត្តម យក់ ប៊ុនណា បង្ហាញផែនការសកម្មភាព ១០ចំណុច ជំរុញទំនើបកម្មរដ្ឋបាលសាធារណៈតាមរយៈ «បណ្តាញអគ្គលេខាធិការ»

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

មន្ទីរសុខាភិបាល អំពាវនាវ ឱ្យពលរដ្ឋធ្លាប់ទាក់ទង ជាមួយស្ត្រីផ្ទុកកូវីដ-១៩ នៅបាត់ដំបង ទៅជួបជំនាញ

ក្រសួងបរិស្ថានព្រមានចាត់វិធានការលើអ្នកទន្ទ្រានយកដីក្នុងដែនជម្រកសត្វព្រៃកែវសីមា

រដ្ឋមន្ត្រីក្រសួងវប្បធម៌ ៖ មន្ត្រីរាជការមានពិការភាពបំរើការងារក្នុងក្របខណ្ឌវប្បធម៌ មានប្រមាណជិត៣ភាគរយ

រដ្ឋសភា បានអនុម័តច្បាប់គ្រប់គ្រងល្បែងពាណិជ្ជកម្ម ដើម្បីបង្កើតប្រភពចំណូលថវិកាជាតិ

ទិវាគ្រូបង្រៀន ៥ តុលា ៖ សិស្សានុសិស្សអរគុណលោកគ្រូអ្នកគ្រូដែលបង្រៀនពួកគេឲ្យមានអនាគតល្អ

គ្រឹះស្ថានសិក្សាឯកជនក្នុងខេត្តសៀមរាប ចំនួន១០ត្រូវបាន អនុញ្ញាតឱ្យបើកឡើងវិញ

ជយលាភីប្រកួតរ៉ូបូតថ្នាក់ជាតិកម្ពុជា នឹងបានទៅចូលរួមប្រកួតរ៉ូបូតអន្តរជាតិ ABU Robocon 2020 នៅចុងឆ្នាំនេះ

ថ្ងៃទី៤ នៃការចុះឈ្មោះបោះឆ្នោត មានពលរដ្ឋទៅចុះបោះឆ្នោតថ្មីជិត ២ម៉ឺននាក់

ទុនបម្រុងអន្តរជាតិកើនដល់ ២០ ប៊ីលានដុល្លារ អាចធានានាំចូលទំនិញ និងសេវាបាន ១០ខែ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

មន្ទីរសុខាភិបាល​ ​អំពាវនាវ ​ឱ្យពលរដ្ឋធ្លាប់ទាក់ទង ​ជាមួយស្ត្រីផ្ទុកកូវីដ-១៩ នៅបាត់ដំបង ទៅ​ជួប​ជំនាញ

ក្រសួងបរិស្ថាន​ព្រមាន​ចាត់វិធានការ​លើ​អ្នក​ទន្ទ្រាន​យក​ដី​ក្នុង​ដែន​ជម្រកសត្វព្រៃ​កែវ​សីមា​

រដ្ឋសភា​ បានអនុម័ត​ច្បាប់​គ្រប់គ្រង​ល្បែង​ពាណិជ្ជកម្ម​ ដើម្បី​បង្កើត​ប្រភព​ចំណូល​ថវិកាជាតិ

ទិវា​គ្រូបង្រៀន ៥ តុលា ​៖ សិស្សានុសិស្ស​អរគុណ​លោកគ្រូ​អ្នកគ្រូ​ដែល​បង្រៀន​ពួកគេ​ឲ្យ​មាន​អនាគត​ល្អ

គ្រឹះស្ថានសិក្សា​ឯកជន​ក្នុង​ខេត្តសៀមរាប​ ចំនួន​១០​ត្រូវ​បាន​ អនុញ្ញាតឱ្យ​បើក​ឡើងវិញ

ថ្ងៃ​ទី​៤​ នៃ​ការ​ចុះឈ្មោះ​បោះឆ្នោត ​មាន​ពលរដ្ឋ​ទៅ​ចុះ​បោះឆ្នោត​ថ្មី​ជិត ​២​ម៉ឺន​នាក់​

ទុន​បម្រុង​អន្តរជាតិ​កើន​ដល់ ២០ ប៊ី​លាន​ដុល្លារ អាច​ធានា​នាំចូល​ទំនិញ និង​សេវា​បាន ១០​ខែ​

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

មន្ទីរសុខាភិបាល អំពាវនាវ ឱ្យពលរដ្ឋធ្លាប់ទាក់ទង ជាមួយស្ត្រីផ្ទុកកូវីដ-១៩ នៅបាត់ដំបង ទៅជួបជំនាញ

ក្រសួងបរិស្ថានព្រមានចាត់វិធានការលើអ្នកទន្ទ្រានយកដីក្នុងដែនជម្រកសត្វព្រៃកែវសីមា

រដ្ឋសភា បានអនុម័តច្បាប់គ្រប់គ្រងល្បែងពាណិជ្ជកម្ម ដើម្បីបង្កើតប្រភពចំណូលថវិកាជាតិ

ទិវាគ្រូបង្រៀន ៥ តុលា ៖ សិស្សានុសិស្សអរគុណលោកគ្រូអ្នកគ្រូដែលបង្រៀនពួកគេឲ្យមានអនាគតល្អ

គ្រឹះស្ថានសិក្សាឯកជនក្នុងខេត្តសៀមរាប ចំនួន១០ត្រូវបាន អនុញ្ញាតឱ្យបើកឡើងវិញ

ថ្ងៃទី៤ នៃការចុះឈ្មោះបោះឆ្នោត មានពលរដ្ឋទៅចុះបោះឆ្នោតថ្មីជិត ២ម៉ឺននាក់

ទុនបម្រុងអន្តរជាតិកើនដល់ ២០ ប៊ីលានដុល្លារ អាចធានានាំចូលទំនិញ និងសេវាបាន ១០ខែ